ភ្នំពេញ ៖ រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា ឯកឧត្តមឧបនាយករដ្ឋមន្ត្រី ហោ ណាំហុង បានមានប្រសាសន៍កាលពីយប់ថ្ងៃច័ន្ទថា នៅក្នុងកិច្ចប្រជុំរដ្ឋមន្ត្រីការបរទេសអាស៊ី-អឺរ៉ុប ចាប់ពីថ្ងៃទី៥ ដល់ថ្ងៃទី៦ ខែវិច្ឆិកា ឆ្នាំ២០១៥ ខាងមុខ ឯកឧត្តមនឹងលើកឡើងពីបញ្ហាមួយចំនួន ដែលជាកង្វល់របស់ពិភពលោក។
ឯកឧត្តមឧបនាយករដ្ឋមន្ត្រី ហោ ណាំហុង បានមានប្រសាសន៍បែបនេះ នៅឯព្រលានយន្តហោះអន្តរជាតិភ្នំពេញ កាលពីព្រលប់ថ្ងៃទី០២ ខែវិច្ឆិកា ឆ្នាំ២០១៥ មុនពេលឡើងយន្តហោះ។ ឯកឧត្តមឧបនាយករដ្ឋមន្ត្រីបានមានប្រសាសន៍ថា នៅក្នុងកិច្ចប្រជុំនោះ ឯកឧត្តមនឹងលើកឡើងពីការប្រែប្រួលអាកាសធាតុ ការគ្រប់គ្រងគ្រោះមហន្តរាយ ដោយសារបញ្ហានេះ ជាបញ្ហាសកលលោក មិនមែនសំរាប់ប្រទេសណាមួយទេ ឬប្រទេសក្នុងតំបន់នោះទេ ជាបញ្ហាសកលដែលពិភពលោកទាំងមូលបារម្ភ។
តាមឯកឧត្តមឧបនាយករដ្ឋមន្ត្រី ហោ ណាំហុង អះអាងថា កិច្ចប្រជុំនោះត្រូវបានអនុញ្ញាតិឲ្យតំណាងប្រទេសកម្ពុជាឡើងថ្លែងសុន្ទរកថា នាំមុខកិច្ចប្រជុំ ប៉ុន្តែឯកឧត្តមមិនដឹងពីមូលហេតុអង្គប្រជុំឲ្យតំណាងកម្ពុជាឡើងថ្លែងមុនគេនោះ តែប្រហែលជាគេយល់ថា កម្ពុជាជាប្រទេសដែលមានការអភិវឌ្ឍន៍លើគ្រប់វិស័យក្រោមការដឹកនាំរបស់រាជរដ្ឋាភិបាលបច្ចុប្បន្ន។
ដោយឡែកទាក់ទងបញ្ហាសមាហរណកម្មអាស៊ាន នាពេលខាងមុខ ឯកឧត្តមឧបនាយករដ្ឋមន្ត្រី ហោ ណាំហុង បានមានប្រសាសន៍ថា “នៅក្នុងកិច្ចប្រជុំនោះដែរ ខ្ញុំនឹងលើកឡើងពីសមាហរណកម្មអាស៊ាន អំពីការកសាងសហគមន៍អាស៊ានធ្វើម៉េចឲ្យស៊ីសង្វាក់គ្នាជាមួយការអភិវឌ្ឍន៍ប្រកបដោយចិរភាពក្រោយឆ្នាំ២០១៥ គឺធ្វើម៉េចឲ្យបញ្ហាទាំងពីរនេះស៊ីជាមួយគ្នា។
សូមបញ្ជាក់ថា តាមការអញ្ជើញរបស់ជំទាវ ហ្វេដេរីកា ម៉ូហ្គេរីនី (Federiica Moghrini) តំណាងជាន់ខ្ពស់ និងជាអនុប្រធាន នៃកិច្ចការអឺរ៉ុប និងលោកហ្សង់ អាសេលប៊ន (Jean Asselborn) រដ្ឋមន្ត្រីការបរទេស និងកិច្ចការអឺរ៉ុប នៃប្រទេសលុចសំបួ ឯកឧត្តមឧបនាយករដ្ឋមន្ត្រី ហោ ណាំហុង នឹងដឹកនាំគណៈប្រតិភូអញ្ជើញចូលរួមក្នុងកិច្ចប្រជុំរដ្ឋមន្ត្រីការបរទេសអាស៊ី.អឺរ៉ុប លើកទី១២ ដែលនឹងប្រព្រឹត្តទៅនៅទីក្រុងលុចសំបួ ពីថ្ងៃទី៥ ដល់ថ្ងៃទី៦ ខែវិច្ឆិកា ឆ្នាំ២០១៥ ក្រោមប្រធានបទ “ធ្វើការរួមគ្នាដើម្បីអនាគតប្រកបដោយចីរភាព និងសន្តិសុខ។
តាមសេចក្តីប្រកាសពីក្រសួងការបរទេសកម្ពុជាបានឲ្យដឹងដែរថា ក្នុងនាមជាអ្នកនាំមុខឯកឧត្តមឧបនាយករដ្ឋមន្ត្រី ហោ ណាំហុង នឹងថ្លែងបទអន្តរាគមន៍នៅក្នុងកិច្ចប្រជុំពេញអង្គៈ “ការផ្លាស់ប្តូរអាកាសធាតុ របៀបវារៈ ឆ្នាំ២០៣០ សម្រាប់ការអភិវឌ្ឍន៍ប្រកបដោយចីរភាព ហើយនិងការកាត់បន្ថយ និងការគ្រប់គ្រងហានិភ័យគ្រោះមហន្តរាយ”។ លោកឧបនាយករដ្ឋមន្ត្រី នឹងថ្លែងសុន្ទរកថានៅក្នុងកិច្ចប្រជុំមិនចំហផងដែរ។
ក្នុងឱកាសចូលរួមកិច្ចប្រជុំររដ្ឋមន្ត្រីការបរទេសអាស៊ី-អឺរ៉ុបលើកទី១២ នោះដែរ ឯកឧត្តមឧបនាយករដ្ឋមន្ត្រី ហោ ណាំហុង នឹងជួបទ្វេភាគីជាមួយលោក ប៊ច ប្រេនដ៍ (Borge Brende) រដ្ឋមន្ត្រីការបរទេសន័រវវេស, លោកហ្គ្សីហ្គោរស៍ ស្លេធីណា រដ្ឋមន្ត្រីការបរទេស នៃសាធារណរដ្ឋប៉ូឡូញ និងលលោក សាតាច អាហ្ស៊ី ទីប្រឹក្សានាយករដ្ឋមន្ត្រីទទួលបន្ទុកកិច្ចការសន្តិសុខជាតិ និងកិច្ចការបរទេស នៃប្រទេសប៉ាគីស្ថាន។
កិច្ចប្រជុំអាស៊ី-អឺរ៉ុប គឺជាវេទិកាមួយដ៏សំខាន់សម្រាប់ការសន្ទនានយោបាយ កិច្ចសហប្រតិបត្តិការសេដ្ឋកិច្ច ហើយនឹងការផ្លាស់ប្តូរវប្បធម៌ និងសង្គម រវាងអាស៊ី និងអឺរ៉ុប ក្នុងគោលដៅពង្រឹងទំនាក់ទំនងរវាងតំបន់ទាំងពីរក្នុងស្មារតីគោរពគ្នាទៅវិញទៅមក និងដៃគូស្មើភាពគ្នា៕
រដ្ឋមន្ត្រីការបរទេសកម្ពុជានឹងលើកឡើងពីកង្វល់ របស់ពិភពលោកនៅក្នុងកិច្ចប្រជុំរដ្ឋមន្ត្រីការបរទេសអាស៊ី-អឺរ៉ុប
0 Comments