ក្រុមបាល់ទាត់ស្វាយរៀងអែហ្វស៊ី និងក្រុមក្រសួងការពារជាតិ ដែលជាសមាជិកក្នុងលីកកំពូលកម្ពុជា (Metfon Cambodian League 2015) នឹងធ្វើដំណើរទៅប្រកួតនៅប្រទេសវៀតណាម ថ្ងៃច័ន្ទ ទី ២៣ ខែ វិច្ឆិកា ដើមសប្ដាហ៍ក្រោយ ដើម្បីត្រៀមប្រកួតពានរង្វាន់អន្តរជាតិមួយទីនោះ ក្នុងអំឡុងសម្រាកត្រៀមទទួលរដូវកាលថ្មីឆ្នាំ២០១៦មកដល់។
មុនចេញដំណើរនេះ ក្រុមទាំង២ បានប្រកួតមិត្តភាពជាមួយគ្នា កាលពីល្ងាចថ្ងៃព្រហស្បតិ៍ ទី១៩ខែ វិច្ឆិកា ឆ្នាំ ២០១៥ កន្លងទៅលើទីលានពហុកីឡដ្ឋានកងយោធពលខេមរភូមិន្ទ (ស្ដាតចាស់) ហើយជាលទ្ធផលស្វាយរៀងអែហ្វស៊ី បានយកឈ្នះក្រសួងការពារជាតិ ដោយលទ្ធផល ៣ ទល់ ២។
យោងតាមថ្នាក់ដឹកនាំក្រុមទាំង២ បានឲ្យដឹងថា ក្រុមនឹងធ្វើដំណើរចេញពីរាជធានីភ្នំពេញ ឆ្ពោះទៅកាន់ទីក្រុងហូជីមិញ នៅវេលាម៉ោង ៧ ព្រឹក ខណៈក្រុមស្វាយរៀងអែហ្វស៊ី នឹងដឹងនាំដោយលោក សំ វ៉ាន់ដេត ហើយក្រុមក្រសួងការពារជាតិ ដឹកនាំដោយលោក ទេព ឡុងរចនា។
កីឡាករសំខាន់ៗដូចជា ឈិន ឈឿន, ច្រឹង ពលរដ្ឋ, កែ វណ្ណៈ, ខែក ខេមរិន្ទ, ពុំ ដារាំង, រឿម ចាន់រឿន, ទូច រ៉ូម៉ា, អ៊ុំ សេរីរ័ត្ន របស់ក្លិបក្រសួងការពារជាតិ កីឡាករ ហួយ ផល្លីន, ផាន់នី អ៊ីរដ្ឋា, នេន សុធារ័ត្ន, ប្រាក់ មុន្នីឧត្តម, ណុប តុលា, សំអឿន ពិដោរ, សឿយ វិសាល របស់ក្លិបស្វាយរៀង សុទ្ធតែអវត្តមានក្នុងការប្រកួតនេះ ព្រោះជាធ្វើដំណើរទៅប្រកួតក្នុងពានអាស៊ាន-ចិន 015 Yunnan-ASEAN International Football Open Tournament នៅប្រទេសចិន ជាមួយក្រុម ជម្រើសជាតិ។
ពានរង្វាន់ដែលក្លិបទាំង២គ្រោងចូលរួមនោះគឺបង្កើតឡើងដើម្បីរំលឹកខួបកងទ័ព និងបុណ្យឯករាជ្យជាតិវៀតណាម ដែលរៀបចំឡើងនៅទីក្រុងហូជីមិញ ដោយមានការប្រកួតបាល់ទាត់ ផងនិងបាល់ទះផង។ សម្រាប់បាល់ទាត់មានក្រុមស្វាយរៀងអែហ្វស៊ី ជាមួយក្រសួងការពារជាតិ ខណៈបាល់ទះមានក្រុមបាល់ទះនៃក្រសួងមហាផ្ទៃ និងក្រុមក្រសួងការពារជាតិ ចូលរួមផងដែរ។
សម្រាប់វិញ្ញាសាបាល់ទាត់មានក្រុមចូលរួមចំនួន៤ រួមមានក្រុម មកពី បាល់ទាត់ភូមិភាគ៧ សហព័ន្ធចំការកៅស៊ូវៀតណាម បូកក្រុមស្វាយរៀងអែហ្វស៊ី និងក្រុមក្រសួងការពារជាតិ របស់កម្ពុជា។ នេះបើតាមការឱ្យដឹងរបស់ថ្នាក់ដឹកនាំក្លិបទាំង២។
ការប្រកួតត្រូវធ្វើនៅថ្ងៃទី៥ខែ ធ្នូ ខាងមុខនោះទេ ប៉ុន្តែដោយកម្មវិធីជាន់គ្នាពានរង្វាន់នេះបានលើមកធ្វើនៅថ្ងៃទី ២៥ខែ វិច្ឆិកា ឆ្នាំ ២០១៥ វិញ ដោយតម្រូវឲ្យក្រុមទាំងអស់ធ្វើដំណើរទៅដល់នៅថ្ងៃទី ២៣ វិច្ឆិកា ហើយនៅថ្ងៃទី ២៤ វិច្ឆិកា ប្រជុំក្រុម។ នេះជាដំណើរការចេញទៅប្រកួតកម្ដៅសាច់ដុំរបស់ក្រុមក្នុងលីកកំពូលកម្ពុជា អំឡុងពេលសម្រាកចន្លោះរដូវកាល២០១៥ និងដើមរដូវកាល២០១៦ មកដល់នៅដើមឆ្នាំក្រោយ។
សូមរំលឹកថា សម្រាប់ក្លិបស្វាយរៀងអែហ្វស៊ី បានបញ្ចប់រដូវកាលរបស់ខ្លួនដោយឈរចំណាត់ថ្នាក់លេខ ៦ ក្នុងចំណោម ១២ ក្រុមក្រោយប្រកួត ២២ លើកឈ្នះ ១០ ស្មើ ៥ និងចាញ់ ៧ លើកមាន ៣៥ ពិន្ទុ ខណៈក្រុមក្រសួងការពារជាតិ ឈរចំណាត់ថ្នាក់លេខ៥ មាន៣៨ពិន្ទុ ក្រោយប្រកួត២២ លើកឈ្នះបាន ១២ ស្មើ ២ និងចាញ់ ៨ លើក៕
ស្វាយរៀងអែហ្វស៊ី និងក្រសួងការពារជាតិ ធ្វើដំណើរប្រកួតនៅប្រទេសវៀតណាម នៅថ្ងៃច័ន្ទខាងមុខ
0 Comments