មាន៣ករណីថ្មីនៃជំងឺ Ebola ត្រូវបានបញ្ជាក់អះអាងថា កើតឡើងនៅក្នុងប្រទេសលីបេរីយ៉ា។ នេះជាការវិលត្រឡប់មកវិញនៃវីរុសមរណៈចំពោះប្រទេសអាហ្វ្រិកខាងលិចមួយនេះ ដែលធ្លាប់បានប្រកាសថា ឆ្លងរួចផុតពី Ebola ទៅហើយនោះ។
ករណីជាលើកចុងក្រោយបង្អស់បានកើតឡើងចំពោះក្មេងប្រុសអាយុ១០ឆ្នាំម្នាក់ ដែលធ្លាក់ខ្លួនឈឺនៅសង្កាត់ជាយក្រុង Paynesville នៃរដ្ឋធានី Monrovia ហើយត្រូវបានបញ្ជូនមកសម្រាកព្យាបាលនៅមន្ទីរពេទ្យក្នុងក្រុង។ ក្រុមមន្ដ្រីសុខាភិបាលបាននិយាយកាលពីថ្ងៃសុក្រកន្លងទៅនេះថា រំពេចនោះស្រាប់តែមានសមាជិក២នាក់ផ្សេងទៀតនៃក្រុមគ្រួសារ ត្រូវបានធ្វើតេស្ដឃើញលទ្ធផលវិជ្ជមានដែរ។
អ្នកជំងឺទាំង៣នាក់ ជួនពេលជាមួយនឹងមនុស្ស៣នាក់ផ្សេងផងទៀត ដែលប្រហែលជាមានជាប់ពាក់ព័ន្ធទៅនឹងជំងឺនោះ ត្រូវបានបញ្ជូនទៅសម្រាកព្យាបាលនៅមជ្ឈមណ្ឌលព្យាបាល Ebola មួយកន្លែងខាងក្រៅក្រុង Monrovia រួចហើយ។
លីបេរីយ៉ា ត្រូវបានប្រកាសថា បានឆ្លងផុតពី Ebola កាលពីថ្ងៃទី០៩ ខែឧសភា ប៉ុន្ដែបែរជាករណីចម្លងថ្មីបានលេចចេញមកនៅក្នុងខែមិថុនា។
អង្គការសុខភាពពិភពលោក WHO បានប្រកាសថា ប្រទេសនេះបានឆ្លងផុតជាថ្មីម្ដងទៀតកាលពីថ្ងៃ០៣ ខែកញ្ញា។
លីបេរីយ៉ា ជាប្រទេសមួយក្នុងចំណោមប្រទេសទាំង៣ដែលរងការចម្លងយ៉ាងធ្ងន់បំផុតដោយការកើតមានជំងឺមរណៈបង្កឡើងដោយវីរុស Ebola ដែលបានចាប់ផ្ដើមនៅក្នុងខែធ្នូ ឆ្នាំ២០១៣ ដោយមានអ្នកកើត Ebola ដល់ទៅជាង១០,០០០នាក់ ក្នុងនោះមានស្លាប់ជាង ៤,៨០០នាក់។
សរុបមក ជំងឺរាតត្បាតនេះបានសម្លាប់មនុស្សប្រមាណ ១១,៣០០នាក់ នៅក្នុងប្រទេសលីបេរីយ៉ា ហ្គីណេ និងសៀរ៉ាឡេអូន៕
VOA
ករណី Ebola ថ្មី ត្រូវបានរកឃើញមាននៅក្នុងប្រទេសលីបេរីយ៉ា
0 Comments