ប្រទេសចិន បាននិយាយថា ខ្លួនបានបង្ក្រាបបណ្ដាញធនាគាររកស៊ីលួចលាក់ខុសច្បាប់ដ៏ធំបំផុតមិនធ្លាប់មានរបស់ខ្លួន ដែលបានកាន់កាប់ប្រាក់ចំនួន ៤១០ពាន់លានយ័ន (៦៤ ពាន់លានដុល្លារ) នៅក្នុងការជួញដូររូបិយប័ណ្ណបរទេសខុសច្បាប់។ ការបំបែកការរកស៊ីខុសច្បាប់នេះ ដែលត្រូវបានរាយការណ៍ កាលពីថ្ងៃសុក្រ ដោយបណ្ដាញផ្សព្វផ្សាយរបស់រដ្ឋនោះបានកើតឡើង ខណៈដែលក្រុងប៉េកាំង បានខិតខំទប់ការហូរចេញមូលធនខុសច្បាប់ និងការប្រយុទ្ធនឹងអំពើពុករលួយ។
យោងទៅតាមរដ្ឋាភិបាលបានឲ្យដឹងថា ធនាគារបានផ្ទេរប្រាក់ទៅក្រៅប្រទេស ដោយប្រើប្រាស់គណនីរបស់មនុស្សដែលមិនរស់នៅជាអចិន្ដ្រៃយ៍ (non-resident) ដោយធ្វើសកម្មភាពក្នុងពេលមានការចន្លោះប្រហោងក្នុងការត្រួតពិនិត្យតាមផ្លូវច្បាប់ និងពង្វាងដានក្នុងពេលដែលអាជ្ញាធរមានការធ្វេសប្រហែស។ កាសែត People’s Daily បាននិយាយថា មនុស្សជាង ៣៧០នាក់ត្រូវបានចាប់ឃុំខ្លួន និងដាក់ទោសនៅក្នុងករណីនេះ។ កាសែតនេះបានបន្ដថា មនុស្សមួយចំនួនត្រូវប្រឈមនឹងការប្ដឹងចោទប្រកាន់ពីបទឧក្រិដ្ឋ។
កាសែត People’s Daily បានរាយការណ៍ទៀតថា ប្រទេសចិន បានចាប់ផ្ដើមឆ្មក់ឆែកឆេរធនាគារធ្វើអាជីវកម្មលួចលាក់ខុសច្បាប់ នៅក្នុងខែមេសា។ ចាប់តាំងពីពេលនោះមក ពួកគេបានបញ្ចេញឲ្យដឹងថា ពួកគេបានរកឃើញជាង១៧០ ករណីនៃសកម្មភាពលាងលុយកខ្វក់ និងការផ្ទេរមូលនិធិខុសច្បាប់ ដែលមានទឹកប្រាក់សរុបជាង ៨០០ពាន់លានយ័នស្មើនឹង ១២៥.៣៤ ពាន់លានដុល្លារ។ ប៉ូលិសបានបិទធនាគារចំនួន ៣៧ ។
ចិន មានការត្រួតពិនិត្យរូបិយប័ណ្ណយ៉ាងតឹងរ៉ឹង ដោយបានកម្រិតឲ្យបុគ្គលទាំងឡាយប្ដូរប្រាក់បានចំនួន ៥០,០០០ដុល្លារ ក្នុងមួយឆ្នាំ ប៉ុន្ដែប្រាក់ទាំងនេះត្រូវបានធនាគារផ្ទេរគេចវេះដោយខុសច្បាប់។ មន្ដ្រីចិន បាននិយាយថា បញ្ហាធនាគារជួញដូររូបិយប័ណ្ណលួចលាក់ខុសច្បាប់ កំពុងតែស្ថិតនៅក្រោមការត្រួតពិនិត្យយ៉ាងតឹងតែងកាន់តែខ្លាំងឡើង។ ពួកគេព្រួយបារម្ភថា បណ្ដាញធ្វើប្រតិបត្ដិការលួចលាក់បែបនេះត្រូវបានប្រើប្រាស់ដោយមន្ដ្រីពុករលួយក្រុមឧក្រិដ្ឋជន និងភេរវជន នៅក្នុងការលាងលុយកខ្វក់ ហើយមន្ដ្រីទាំងនោះបានបន្ថែមថា ការហូរចេញមិនផ្លូវការនូវរូបិយប័ណ្ណដ៏ច្រើនសម្បើមនេះបានធ្វើឲ្យអន្ដរាយដល់ការគ្រប់គ្រងហិរញ្ញវត្ថុរបស់ចិន។
ជនសង្ស័យប្រហែល ១០០នាក់ពីក្រុមឧក្រិដ្ឋជន ដែលគេសង្ស័យចំនួន ៨ ក្រុមត្រូវបានចាប់ឃុំខ្លួននៅក្នុងអំឡុងការស៊ើបអង្កេត ដែលបានចាប់ផ្ដើមកាលពីឆ្នាំកន្លងមក។ យោងទៅតាមប៉ូលិសបានឲ្យដឹងថា ក្រុមឧក្រិដ្ឋជនទាំងនេះ ត្រូវបានដឹកនាំដោយមេដឹកនាំឧក្រិដ្ឋកម្ម ដែលបានធ្វើប្រតិបត្ដិការក្រុមហ៊ុន Shell ជាង ១០ នៅហុងកុង។ ក្រុមហ៊ុនទាំងនេះត្រូវបានគេរាយការណ៍ថា មានជាប់ពាក់ព័ន្ធនៅក្នុងការជួញដូររូបិយប័ណ្ណបរទេស និងការលាងលុយកខ្វក់។
មេដឹកនាំឧក្រិដ្ឋជនម្នាក់ បាននិយាយប្រាប់ទីភ្នាក់ងារព័ត៌មានស៊ីនហួថា អតិថិជនជាច្រើនចង់ចៀសវាងការត្រួតពិនិត្យដ៏តឹងរ៉ឹងរបស់ចិន ទៅលើការជួញដូររូបិយប័ណ្ណបរទេស ម៉្លោះហើយក្រុមឧក្រិដ្ឋជនអាចរកបាន ៥០,០០០ យ័ន (៧,៨៣៤ដុល្លារ) នៅក្នុងមួយថ្ងៃដោយសារបញ្ហានេះ៕
VOA, RT
ចិន បង្ក្រាបបណ្ដាញធនាគាររកស៊ីលួចលាក់ខុសច្បាប់ ដែលកាន់កាប់ប្រាក់ ៦៤ពាន់លានដុល្លារ
0 Comments