សៀមរាប ៖ ពលរដ្ឋក្នុងភូមិតានី ឃុំរុនតាឯក និងភូមិស្នាសង្គ្រាមឃុំបាល័ង្គបាននាំគ្នាយកលូចំនួន៤កំណាត់មកដាក់បិទផ្លូវក្រាលគ្រួសក្រហមមួយខ្សែបង្ខំឲ្យក្រុមហ៊ុនឡានដឹកខ្សាច់និងអាជ្ញាធរអប្សរាដោះស្រាយបញ្ហាមួយចំនួនឲ្យពួកគាត់។
ហេតុការណ៍បិទផ្លូវនេះបានធ្វើឡើងនៅព្រឹកថ្ងៃទី៤ ខែវិច្ឆិកា ឆ្នាំ២០១៥ក្នុងភូមិតានីឃុំរុនតាឯកស្រុកបន្ទាយស្រីដោយមានក្រុមអ្នកភូមិអាជ្ញាធរមូលដ្ឋាននិងម្ចាស់ក្រុមហ៊ុនបូមខ្សាច់បានកំណត់ជួបជុំគ្នាដើម្បីដោះស្រាយដែលផ្លូវនេះតភ្ជាប់ពី៦៧ក្នុងឃុំរុនតាឯក ឆ្ពោះទៅកាន់ផ្លូវម៉ាឡេត្រង់ចំណុចភ្នំតាពុត ហើយផ្លូវសេដ្ឋកិច្ចមួយសម្រាប់ពលរដ្ឋទាំង២ឃុំខាងលើនេះ។
ទោះបីជាយ៉ាងនេះក្តីការជួបគ្នាអស់រយៈពេលជាច្រើនម៉ោងដោយលោកស្រីអេងសុខហ្កិចម្ចាស់ក្រុមហ៊ុនបូមខ្សាច់បានយល់ព្រមទទួលយកលក្ខខ័ណ្ឌ៨ចំណុចដែលក្រុមអ្នកភូមិទាមទារក៏ផ្លូវមួយខ្សែនេះនៅតែមិនទាន់បើកឲ្យចរាចរណ៍ចំពោះឡានធុនធំនៅឡើយទេ។ មូលហេតុដោយក្រុមអ្នកភូមិតម្រូវឲ្យខាងអាជ្ញាធរអប្សរាដោះស្រាយករណីយកគ្រឿងចក្រទៅកាយផ្តាច់ផ្លូវចូលទៅស្រែនិងកាយផ្តាច់ទំនប់ទឹកសម្រាប់ធ្វើស្រែរបស់ពួកគាត់។ ពលរដ្ឋម្នាក់ឈ្មោះហ៊ាន ហូនបានឲ្យដឹងថា ពួកគាត់មកបិទផ្លូវនេះគឺដោយសារមានការលំបាកក្នុងការធ្វើដំណើរ និងមានការព្រួយពីសុវត្ថិភាពកូនៗរបស់គាត់ ដែលធ្វើដំណើរទៅរៀននិងជាពិសេសព្រួយបារម្ភពីសុខភាព បន្ទាប់ពីទទួលរងនូវធូលីហុយដីជាប្រចាំ។
ពលរដ្ឋដដែលបន្តថា ពួកគាត់ស្នើឲ្យអាជ្ញាធរ ជួយរកដំណោះស្រាយទាំង៨ចំណុចនោះផង។ លោកគុយវ៉ៃមេឃុំរុនតាឯកបានឲ្យដឹងនៅព្រឹកថ្ងៃទី០៤នេះថា នៅថ្ងៃដដែលពុំមានខាងអាជ្ញាធរអប្សរា ចូលរួមក្នុងការដោះស្រាយនោះទេតែលោកមេឃុំអះអាងថា លោកព្យាយាមទំនាក់ទំនងទៅខាងអប្សរា ទោះជាគ្មានលទ្ធផល។
លោកឡុង កុសល ប្រធាននាយកដ្ឋានផ្សព្វផ្សាយនៃអាជ្ញាធរអប្សរាបានមានប្រសាសន៍ប្រាប់តាមទូរស័ព្ទនៅរសៀលថ្ងៃទី០៤នេះថា ការងាររបស់ភូមិតានី គឺមិនមានអ្វីប៉ះពាល់ដល់ភូមិធម្មជាតិដែលគ្រប់គ្រងដោយអាជ្ញាធរអប្សរា នោះទេ។
លោកបន្តថា ការដឹកដីរបស់ក្រុមហ៊ុនឯកជនគឺជារឿងរបស់អាជ្ញាធរមូលដ្ឋានវាមិនមែនជាតួនាទីរបស់អាជ្ញាធរអប្សរានោះទេ។ លោកបញ្ជាក់ថា ការងាររបស់ អាជ្ញាធរអប្សរាគឺមានតែជួយជួសជុលនិងអភិរក្សនៅតាមផ្លូវនៅតំបន់នោះថែមទៀត។
យ៉ាងនេះក្តីរហូតមកទល់ពេលនេះនៅមិនមានចំណាត់ការណាមួយជូនពលរដ្ឋនៅឡើយ ហើយពលរដ្ឋក៏នៅតែបន្តបិទផ្លូវលំនេះដដែល៕
ពលរដ្ឋ២ភូមិបានយកលូបិទផ្លូវតវ៉ាមិនឲ្យក្រុមហ៊ុនដឹកដីខ្សាច់បើកឆ្លងកាត់
0 Comments