មន្ដ្រីសេដ្ឋកិច្ចថ្នាក់កំពូលបាននិយាយថា រដ្ឋាភិបាលចិន រំពឹងថា នឹងសម្រេចបានកំណើនសេដ្ឋកិច្ចប្រចាំឆ្នាំ យ៉ាងហោចណាស់ក៏ចំនួន ៦.៥ ភាគរយដែរ រហូតដល់ឆ្នាំ២០២០។ នេះគឺជាការបង្ហាញលើកដំបូងនៃគោលដៅកំណើនមួយ បន្ទាប់ពីកិច្ចប្រជុំធ្វើផែនការរបស់មន្ដ្រីថ្នាក់ខ្ពស់ កាលពីសប្ដាហ៍មុន។
គណបក្សកុម្មុយនីស្ដកំពុងកាន់អំណាច កំពុងតែព្យាយាមដើម្បីកាច់ចង្កូតសេដ្ឋកិច្ចទៅរកកំណើនប្រកបដោយចីរភាពថែមទៀត ដោយផ្អែកទៅលើការប្រើប្រាស់ក្នុងស្រុក ជាជាងវិស័យពាណិជ្ជកម្ម និងការវិនិយោគ ប៉ុន្ដែត្រូវការថែរក្សាសេដ្ឋកិច្ចនេះកុំឲ្យចុះខ្សោយខ្លាំងពេក។ កំណើនកាលពីឆ្នាំកន្លងមកបានធ្លាក់ទៅដល់កម្រិតទាប ទសវត្សរ៍ចំនួន ៧.៤ ភាគរយ។
លោក លី កឺឈាង នាយករដ្ឋមន្ដ្រីចិន បានថ្លែងនៅក្នុងសុន្ទរកថាមួយ កាលពីថ្ងៃអាទិត្យ នៅទីក្រុងសេអ៊ូលថា យើងស្នើធ្វើឲ្យបានសម្រេចនូវគោលដៅបង្កើតសង្គមដ៏រុងរឿង សមហេតុសមផលមួយ នៅឆ្នាំ២០២០ ដែលត្រូវការកំណើនសេដ្ឋកិច្ចប្រចាំឆ្នាំយ៉ាងហោចណាស់ក៏ ៦.៥ ភាគរយដែរ នៅក្នុងរយៈពេល ៥ ឆ្នាំខាងមុខនេះ។ នេះបើយោងទៅតាមឯកសារជាលាយលក្ខណ៍អក្សរចេញផ្សាយដោយគណៈរដ្ឋមន្ដ្រីបានឲ្យដឹង។
បន្ទាប់ពីកិច្ចប្រជុំមួយដើម្បីយល់ព្រមលើផែនការអភិវឌ្ឍន៍ ៥ ឆ្នាំនោះមក ពួកមេដឹកនាំគណបក្សបានសន្យាកាលពីសប្ដាហ៍កន្លងមក ដើម្បីបង្កើនទ្វេដងនូវទំហំសេដ្ឋកិច្ចពីកម្រិតឆ្នាំ២០១០ នៅឆ្នាំ២០២០ ។ ផែនការនោះ នឹងតម្រូវឲ្យមានកំណើនប្រចាំឆ្នាំយ៉ាងហោចចំនួន ៦.៥ ភាគរយដែរ ដែលអាចជាន់គ្នាជាមួយការខិតខំកែទម្រង់។ គោលដៅកំណើនឆ្នាំនេះ គឺប្រហែល ៧ ភាគរយ បើទោះបី លោកលី និងមន្ដ្រីផ្សេងៗទៀតបានព្យាយាមធ្វើមិនឲ្យលេចធ្លោនូវសារៈសំខាន់របស់កំណើននេះក៏ដោយ។ លោកលី បាននិយាយពីពេលមុនថា លោកនឹងយល់ព្រមទទួលយកកំណើន ដែលយឺត ឲ្យតែសេដ្ឋកិច្ចបង្កើតបានការងារថ្មីគ្រប់គ្រាន់។
កំណើនសេដ្ឋកិច្ចនៅក្នុងត្រីមាសចុងក្រោយ នៅក្នុងខែកញ្ញា មានសភាពយឺតចំនួន ៦.៩ ភាគរយ ប៉ុន្ដែអ្នកវិភាគមួយចំនួនបាននិយាយថា សកម្មភាពឧស្សាហកម្មអាចលោតហក់មកវិញ។ សកម្មភាពផលិតរបស់ប្រទេសចិន បានរួញចុះ នៅខែទី ៣ នៅក្នុងខែតុលា។ នេះបើយោងទៅតាមការស្ទង់មតិមួយ ដែលចេញផ្សាយឲ្យដឹងកាលពីថ្ងៃអាទិត្យ។
ការិយាល័យជាតិស្ថិតិបាននិយាយថា តារាងរបស់អ្នកគ្រប់គ្រងការទិញប្រចាំខែរបស់ខ្លួនបានស្ថិតនៅមិនប្រែប្រួល នៅកម្រិតខែកញ្ញាចំនួន ៤៩.៨ ចំណុច នៅលើកម្រិត ១០០ ចំណុច ដែលនៅក្នុងនោះចំនួននៅក្រោម ៥០ ចំណុចបង្ហាញនូវការរួញចុះ។ សន្ទស្សន៍ PMI របស់ភ្នាក់ងារសម្រាប់ឧស្សាហកម្មសេវាបានចុះខ្សោយដល់ ៥៣.១ ចំណុចពី ៥៣.៤ ចំណុចរបស់ខែកញ្ញា។
ភាគច្រើននៃការបង្អង់ល្បឿនសេដ្ឋកិច្ចរបស់ចិន នៅក្នុងរយៈពេល ៥ ខែកន្លងមកត្រូវបានដាក់បង្ខំដោយខ្លួនឯង ប៉ុន្ដែការធ្លាក់ចុះដ៏ខ្លាំង នៅក្នុងឆ្នាំកន្លងមក ដែលបានបណ្ដាលឲ្យមានការព្រួយបារម្ភអំពីការបាត់បង់ការងារ និងមានការរំជើបរំជួល។ ក្រុងប៉េកាំង បានកាត់បន្ថយអត្រាការប្រាក់ ៦ ដងចាប់តាំងពីខែវិច្ឆិកាកន្លងមក៕
VOA
នាយករដ្ឋមន្ដ្រីចិន ៖ កំណើនសេដ្ឋកិច្ច ៦.៥ភាគរយ រំពឹងថា នឹងស្ថិតនៅរហូតដល់ឆ្នាំ ២០២០
0 Comments