ភ្នំពេញ ៖ ដោយមានការអន្តរាគមន៍ពីមន្ត្រីជំនាញធនធានទឹកនៅតាមបណ្តាខេត្តនានាបូមទឹកបញ្ចូលអាង បឹង-ព្រែកធម្មជាតិ សម្រាប់បម្រើដល់ការងារបង្កបង្កើនផលស្រូវ គិតមកត្រឹមថ្ងៃទី ០៤ ខែវិច្ឆិកា ឆ្នាំ ២០១៥ ប្រជាកសិករ នៅ១៤ខេត្តក្រុង រួមមាន ខេត្តកំពង់ធំ កំពង់ឆ្នាំង កណ្តាល តាកែវ ព្រៃវែង បាត់ដំបង ក្រចេះ ត្បូងឃ្មុំ ឧត្តរមានជ័យ កំពត កំពង់ស្ពឺ បន្ទាយមានជ័យ កំពង់ចាម និងខេត្តស្ទឹងត្រែងបានកំពុងបង្កបង្កើនផលស្រូវប្រាំងនឹងវស្សា ជាបណ្តើរៗហើយ បើទោះបីជាឆ្នាំនេះ ទឹកទន្លេតូចមិនសូវមានភ្លៀងធ្លាក់ដូចបណ្តាឆ្នាំមុនៗក៏ដោយ។
លោក ចាន់ យុត្ថា នាយកខុទ្ទកាល័យ និងជាអ្នកនាំពាក្យក្រសួងធនធានទឹក និងឧតុនិយម បានប្រាប់ឲ្យដឹងថា មកដល់ពេលនេះ អាងទឹកចំនួន ៥៨, បឹង ចំនួន ១១ និងព្រែក ចំនួន ០២ ត្រូវបាននឹងកំពុងបូមទឹកបំពេញជាបន្តបន្ទាប់ ដោយប្រើប្រាស់ទី១. ស្ថានីយបូមទឹកខ្នាតធំចំនួន ០២ កន្លែង គឺស្ថានីយបូមទឹកហ៊ុនសែនទី ៤៥ ស្ថិតក្នុងឃុំទូកមាសខាងលិច ស្រុកបន្ទាយមាស ខេត្តកំពត និងស្ថានីយបូមទឹក សាយ ឈុំ ស្ថិតក្នុងសង្កាត់កណ្តោលដុំ ក្រុងច្បារមន ខេត្តកំពង់ស្ពឺ ។ ទី២. ម៉ាស៊ីនបូមទឹកខ្នាតមធ្យម (៦៥ សេះ) សរុប ចំនួន ៧៩ គ្រឿង ក្នុងនោះមាន ខេត្តកំពង់ធំ ចំនួន ១២ គ្រឿង, ខេត្តកំពង់ឆ្នាំង ចំនួន ១៩ គ្រឿង, ខេត្តកណ្តាល ចំនួន ១៩ គ្រឿង, ខេត្តតាកែវ ចំនួន ០៦ គ្រឿង, ខេត្តព្រៃវែង ចំនួន ០៦ គ្រឿង, ខេត្តបាត់ដំបង ចំនួន ០៦ គ្រឿង, ខេត្តក្រចេះ ចំនួន ០២ គ្រឿង, ខេត្តឧត្តរមានជ័យ ចំនួន ០២ គ្រឿង, ខេត្តកំពត ចំនួន ០១ គ្រឿង, ខេត្តបន្ទាយមានជ័យ ចំនួន ០៣ គ្រឿង, ខេត្តត្បូងឃ្មុំ ចំនួន ០៣ គ្រឿង និងម៉ាស៊ីនខ្នាតតូច (២៥សេះ) ចំនួន ១៥គ្រឿងទៀត នៅខេត្តស្ទឹងត្រែង។
ដោយឡែកចំពោះសហគមន៍ទំនប់មួយចំនួន ដែលមានម៉ាស៊ីនបូមទឹកខ្នាតមធ្យម និងតូចរួចជាស្រេចទៅហើយនោះ ក្រុមការងារបានសម្រេចប្រើប្រាស់ម៉ាស៊ីនបូមទឹកដែលមាននៅនឹងកន្លែងស្រាប់ ដោយក្រសួងធនធានទឹក និងឧតុនិយម ជាអ្នកឧបត្ថម្ភប្រេង។ លោក ចាន់ យុត្ថា បានបន្តថា នៅក្នុងពេលចុះពិនិត្យការងារនេះនាពេលកន្លងទៅ លោករដ្ឋមន្ត្រី លឹម គានហោ ក៏បានឧបត្ថម្ភនូវម៉ាស៊ីនបូមទឹកខ្នាតតូច (២៥សេះ) ចំនួន ១០ គ្រឿង ទៅដល់សហគមន៍ទំនប់ដែលមានការខ្វះខាតម៉ាស៊ីនបូមទឹកខ្នាតតូចសម្រាប់បូមទឹកបញ្ចូលស្រែ ។
អ្នកនាំពាក្យក្រសួងធនធានទឹក និងឧតុនិយម បានបន្ថែមថា ក្រុមការងាររបស់ក្រសួង បាន និងកំពុងបន្តចុះពិនិត្យនៅតាមបណ្តាទីតាំងផ្សេងៗទៀត ក្នុងក្របខ័ណ្ឌទូទាំងប្រទេស៕
ប្រជាកសិករនៅ ១៤ខេត្តក្រុងបានបង្កបង្កើនផលស្រូវប្រាំងនឹងវស្សា
0 Comments