ភ្នំពេញ ៖ បន្ទាប់ពី បញ្ជាឲ្យមន្ត្រីជំនាញមានវិធានការ ចំពោះសំណង់ហ្គាវើល(NagaWorld)ដែលបានសាងសង់ខុសច្បាប់ និងប៉ះពាល់ដល់លំហសាធារណៈសម្រាប់ប្រជាពលរដ្ឋ សម្ដេចតេជោ នាយករដ្ឋមន្ត្រី ហ៊ុន សែន បាន ចេញបញ្ជាថា រាល់សំណង់ដែលបានសាងសង់ ធ្វើឲ្យប៉ះពាល់ដល់ចិញ្ចើមផ្លូវ សាធារណៈរបស់រដ្ឋ មិនថាតែនៅទីក្រុងភ្នំពេញ ឬនៅតាមបណ្ដាលខេត្តនានានោះទេ គឺត្រូវតែរុះរើចេញជាបន្ទាន់ ហើយអាជ្ញាធ រនិងមន្ត្រីពាក់ព័ន្ធជាអ្នកទទួលខុសត្រូវ។ នេះបើតាមការថ្លែងនៅលើបណ្ដាញសង្គមហ្វ៊េសប៊ុករបស់លោកនាព្រឹកថ្ងៃអាទិត្យ ទី០៨ ខែ វិច្ឆិកា ឆ្នាំ២០១៥។
សម្ដេចបានបញ្ជាក់ថា កន្លងទៅថ្មីៗនេះ សម្ដេចតេជោ ហ៊ុន សែន បានអញ្ជើញទៅពិនិត្យមើលការដ្ឋានសាងសង់អាគារពាណិជ្ជកម្មណាហ្កាស៊ីណូ (Naga World & Casino) ដែលជាក្រុមហ៊ុនវិនិយោគខ្នាតធំមួយនៅកម្ពុជា ដែលមានទីតាំងនៅជិត វិទ្យាស្ថានពុទ្ឋសាសនបណ្ឌិត្យកម្ពុជា ក្នុងរាជធានីភ្នំពេញ។ តាមការពិនិត្យជាក់ស្ដែងលើសំណង់ដែលកំពុងសាងសង់គឺបានរំលោភលើដីចិញ្ចើម ផ្លូវរបស់រដ្ឋ និង ប៉ះពាល់ទៅដល់ទីតាំងវិទ្យាស្ថានពុទ្ឋសាសនបណ្ឌិត្យទៀតផង។
មិនថា តែក្រុមហ៊ុន Naga World & Casino មួយទេ គឺចំពោះក្រុមហ៊ុនទាំងអស់ ដែលបានទទួលច្បាប់វិនិយោគនៅក្នុងប្រទេសកម្ពុជា ទាំងនៅក្នុងក្រុងនីភ្នំពេញ និងនៅតាមបណ្ដាខេត្តនានា គឺត្រូវតែគោរពតាមច្បាប់និងគោលការណ៍ដែលរដ្ឋាភិបាលបានផ្តល់ជូន។ សំណង់ ដែលមានលក្ខណៈរំលោភកេងស៊ីចំណីផ្លូវសាធារណៈ និងសួនច្បារសាធារណៈ គឺត្រូវរុះរើរំលាយចេញជាបន្ទាន់។ ហើយបើធ្វើនៅទីតាំងកន្លែងណា គឺអាជ្ញាធរមានសមត្ថកិច្ច និងក្រសួងពាក់ព័ន្ឋត្រូវតែទទួលខុសត្រូវ។ ចំពោះក្រុមហ៊ុនឯកជនក៏ដូច្នោះដែរ គឺមិនមែនបានទទួលច្បាប់ធ្វើប៉ុណ្ណេះ ដល់ពេលសាងសង់ធ្វើហួសពីច្បាប់បានកំណត់ដោយអំពើឃុបឃិតជាមួយមន្ត្រីខិលខូច ក៏មានទោសដែរ។ រីឯចំពោះអស់លោកមន្ត្រីទាំងអស់នោះ គឺបានដឹងច្បាស់ណាស់ថា ទីណាជារបស់ឯកជន និងទីណាជារបស់រដ្ឋ។ ទោះបីនៅពេលនេះប្រមុខរាជរដ្ឋាភិបាល មិនទាន់បានដឹង តែរឿងទាំងអស់នោះប្រាកដជាលាក់មិនជិតពីភ្នែកសាធារណជនឡើយ។ សម្ដេចតេជោ ហ៊ុន សែន មិនបណ្ដោយឲ្យមន្ត្រីខិលខូចទាំងនោះ បំផ្លាញសង្គមជាតិអោយអាប់ឱនទៅទៀតជាដាច់ខាត។
សូមរំលឹកថា កាលពីថ្ងៃសុក្រកន្លងទៅសម្ដេចតេជោ ក្រោយពី អញ្ជើញជាអធិបតី នៅក្នុងពិធីសម្ពោធគម្រោងការពារទឹកជំនន់ និងកែរលម្អប្រព័ន្ឋប្រឡាយ លូ ក្នុងរាជធានីភ្នំពេញបានអញ្ជើញចុះពិនិត្យដោយផ្ទាល់នៅ ការដ្ឋាន សាងសង់ អាគារណាហ្គាវើល(NagaWorld)ដែលបានសាងសង់ខុសច្បាប់ និងប៉ះពាល់ដល់លំហសាធារណៈសម្រាប់ប្រជាពលរដ្ឋលំហែកំសាន្ត នៅក្នុងឱកាសនោះ សម្ដេចតេជោ បាន បញ្ជាឲ្យមានការរុះរើជាបន្ទាន់ផងដែរ៕
សម្ដេចតេជោ ៖ រាល់សំណង់ដែល រំលោភកេងស៊ីចំណីផ្លូវសាធារណៈ និងសួនច្បារសាធារណៈ ត្រូវរុះរើរំលាយចេញជាបន្ទាន់
0 Comments