ស្វាយរៀង ៖ នាព្រឹកថ្ងៃទី២ ខែវិច្ឆិកា ឆ្នាំ២០១៥នេះបានបើកកិច្ចប្រជុំបូកសរុបសកម្មភាពការងារក្រុមការងារថ្នាក់ជាតិចុះមូលដ្ឋានខេត្តស្វាយរៀង ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣ ប្រចាំត្រីមាសទី៣ ឆ្នាំ២០១៥ និងលើកទិសដៅអនុវត្តបន្តទៀត។ កិច្ចប្រជុំនេះបានប្រព្រឹត្តទៅនៅសណ្ឋាគារវៃគោស្ថិតក្នុងភូមិមេភ្លើងសង្កាត់/ក្រុងស្វាយរៀងក្រោមអធិបតីភាពលោក ហ៊ឹម ឆែម ទេសរដ្ឋមន្ត្រីទទួលបន្ទុកបេសកកម្មពិសេសតំណាងដ៏ខ្ពង់ខ្ពស់លោកជំទាវឧបនាយករដ្ឋមន្ត្រី ម៉ែន សំអន រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា អធិការកិច្ច និងជាប្រធានក្រុមការងារថ្នាក់ជាតិចុះមូលដ្ឋានខេត្តស្វាយរៀង និងមានការអញ្ជើញចូលរួមពីលោក លោកស្រីដែលជាក្រុមការងារថ្នាក់ជាតិ ថ្នាក់ខេត្ត និងមូលដ្ឋានប្រមាណជាង២០០នាក់ប្រកបដោយការយកចិត្តទុកដាក់បំផុត។
លោកទេសរដ្ឋមន្ត្រី ហ៊ឹម ឆែម មានប្រសាសន៍ថា ជំរុញឲ្យក្រុមការងារទាំងអស់បន្តទិសដៅអនុវត្តត្រីមាសទី៤ ឆ្នាំ២០១៥ រួមមាន ១.ត្រូវបន្តខិតខំរៀបចំធ្វើវេទិកាសាធារណៈនៅតាមមូលដ្ឋានក្រុងស្រុកឃុំ សង្កាត់ ដើម្បីស្វែងយល់ពីបញ្ហាប្រឈមការលំបាក និងសំណូមពររបស់ប្រជាពលរដ្ឋ។ ២.ត្រូវខិតខំធ្វើការដោះស្រាយឆ្លើយតបចំពោះបញ្ហាប្រឈម សំណើ សំណូមពររបស់ប្រជាពលរដ្ឋដែលបានលើកឡើងក្នុងវេទិកាសាធារណៈកន្លងមកទៅតាមសមត្ថកិច្ច និងតួនាទីភារកិច្ចរបស់អាជ្ញាធរ មន្ទីរអង្គភាព និងក្រសួងស្ថាប័នពាក់ព័ន្ធ។ ៣.ក្រុមការងារថ្នាក់ជាតិចុះមូលដ្ឋាននៅក្រុងស្រុកនៃខេត្តស្វាយរៀងជាពិសេសអភិបាលក្រុងស្រុកដែលជាអនុប្រធានអចិន្ត្រៃយ៍ក្រុមការងារចុះមូលដ្ឋានក្រុងស្រុកត្រូវធ្វើរបាយការណ៍ប្រចាំខែត្រីមាសឆមាសនិងប្រចាំឆ្នាំឲ្យស្របតាមទម្រង់របាយការណ៍ថ្មីដែលក្រសួងមហាផ្ទៃបានណែនាំឲ្យបានទៀងទាត់ និងទាន់ពេលវេលាបានកំណត់។ ៤.ត្រូវបន្តធ្វើការផ្សព្វផ្សាយអំពីគោលនយោបាយ និងយុទ្ធសាស្ត្រចតុកោណដំណាក់កាលទី៣របស់រាជរដ្ឋាភិបាលកម្ពុជានៅតាមមូលដ្ឋានក្រុងស្រុក ឃុំ សង្កត់ និងប្រជាពលរដ្ឋឲ្យបានជាប់ជាប្រចាំបន្តទៀត៕
កិច្ចប្រជុំបូកសរុបសកម្មភាពការងារប្រចាំត្រីមាសទី៣ខេត្តស្វាយរៀង
0 Comments