សៀមរាប ៖ ប្រជាពលរដ្ឋនៅភូមិខ្នារថ្មី សង្កាត់ជ្រាវ ក្រុងសៀមរាប ខេត្តសៀមរាប ជាច្រើនគ្រួសារមានការខឹងសម្បាយ៉ាងខ្លាំងទៅលើរោងចក្រអគ្គិសនី ខេត្តសៀមរាបដែលបានធ្វើរបងរំលោភលើផ្លូវសាធារណៈមួយដែលពួកគាត់សុំឲ្យអាជ្ញាធរមូលដ្ឋាន និងក្រុងរកដំណោះស្រាយជូនពួកគាត់ ដើម្បីមានភាពងាយស្រួលក្នុងការធ្វើដំណើរទៅមក។
ផ្លូវនៅទីនោះប្រជាពលរដ្ឋបានរៀបរាបប្រាប់ថា មានទទឹង១០ម៉ែត្រ ប៉ុន្តែនៅពេលដែលរោងចក្រអគ្គិសនីខេត្តសៀមរាបបានធ្វើចូលមកក្នុងសាច់ផ្លូវ បណ្ដាលឲ្យមានភាពចង្អៀត និងលំបាកយ៉ាងខ្លាំងនៅរដូវវស្សាមានទឹកដក់ ភក់ និងក្រឡុកតាមបណ្តោយដងផ្លូវ ពួកគាត់បានសុំឲ្យអាជ្ញាធរភូមិឃុំចុះមកពិនិត្យមើលរួចម្តងហើយ តែក្រោយមកក៏បាត់សូន្យឈឹងទៅឥឡូវខាងរោងចក្រអគ្គិសនីបានធ្វើរបងថ្មីហើយ ដោយឡែករបងចាស់ដែលធ្វើរំលោភលើផ្លូវមិនទាន់រុះរើចេញទេ។
លោក ក្តោប រ៉ន ចៅសង្កាត់ជ្រាវបានឲ្យដឹងតាមទូរស័ព្ទកាលពីព្រឹកថ្ងៃទី២៤ ខែវិច្ឆិកា ឆ្នាំ២០១៥ថាគាត់មិនបានដឹងដីរបស់ប្រពលរដ្ឋទុកផ្លូវសម្រាប់ធ្វើដំណើររាល់ថ្ងៃប៉ុន្មានម៉ែត្រនោះទេ ហើយដីរបស់រោងចក្រអគ្គិសនីក៏មិនទាន់មានប្លង់រឹងមិនដឹងថា ទុកផ្លូវប៉ុណ្ណាដែរលោក និងឲ្យក្រុមការងាររបស់លោកចុះទៅពិនិត្យមើលម្តងទៀត។
ចំណែក លោក សូរ ប្លាតុង អភិបាលក្រុងសៀមរាបបានឲ្យដឹងតាមទូរស័ព្ទកាលពីព្រឹកថ្ងៃទី២៤ខែវិច្ឆិកា ឆ្នាំ២០១៥ផងដែរថា ចំពោះបញ្ហារោងចក្រអគ្គិសនីខេត្តសៀមរាបបានធ្វើរបងរំលោភលើផ្លូវប្រជាពលរដ្ឋនៅភូមិខ្នារថ្មីដែលបានសំណូមពរឲ្យរកដំណោះស្រាយនោះខាងមន្ត្រីអាជ្ញាធររបស់ខ្ញុំមិនទាន់បានចុះទៅមើលទេ ខ្ញុំនឹងរៀបចំដោះស្រាយជូននូវពេលបុណ្យអុំទូកចប់ខាងមុខនេះ រីឯប្រធានរោងចក្រវិញ ខ្ញុំមិនអាចធ្វើការទាក់ទងបានឡើយ។
ប្រជាពលរដ្ឋជាច្រើនគ្រួសារកំពុងតែទន្ទឹងរង់ចាំនូវដំណោះស្រាយមួយ ដែលអាចទទួលយកបានគឺពួកគាត់ចង់ឲ្យអាជ្ញាធរភូមិ សង្កាត់ ក្រុង ខេត្ត ធ្វើយ៉ាងណាសូមមេត្តាជួយឲ្យរោងចក្រអគ្គិសនីខេត្ត និងម្ចាស់ដីមួយកន្លែងទៀតដែលបានធ្វើរបងបិទផ្លូវដែរ ចុះរុះរើរបងចាស់ជាប់ និងរបងថ្មីចេញដែលប្រជាពលរដ្ឋចោទថា ធ្វើរំលោភលើផ្លូវសាធារណៈ ដើម្បីពួកគាត់បានចាក់ដីធ្វើផ្លូវឲ្យស្អាតផុតពីទឹកលិច និងបញ្ចៀសនូវការកកស្ទះធ្វើដំណើរទៅវិញទៅមកឲ្យកាន់តែប្រសើរថែមទៀត។
ជុំវិញនៃការចោទប្រកាន់ពីប្រជាពលរដ្ឋនៅភូមិខ្នារថ្មីសង្កាត់ជ្រាវនេះដែរកម្ពុជាថ្មីមិនអាចធ្វើការទំនាក់ទំនងបានទេ ជាមួយលោកប្រធានអគ្គិសនី៕
ប្រជាពលរដ្ឋលើកគ្នាតវ៉ា ដោយសារតែរោងចក្រអគ្គិសនីខេត្តសៀមរាប រំលោភលើផ្លូវរបស់ពួកគាត់
0 Comments