ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានពន្យល់ជាថ្មី ពីការផ្អាកព្រះរាជពិធីបុណ្យអុំទូក អកអំបុក និងសំពះព្រះខែ នៅឆ្នាំ២០១៥ នេះ គឺមិនមែនខ្លាចបាតុកម្មរបស់គណបក្សសង្គ្រោះជាតិទេ តែដោយសារទឹករាក់ពេក ហើយអ្នកបច្ចេកទេសអះអាងថា មិនអាចអុំទូកកើត។
ការបញ្ជាក់ពីការផ្អាកព្រះរាជពិធីបុណ្យអុំទូកខាងលើនេះ បានធ្វើឡើងកាលពីព្រឹកថ្ងៃទី០៥ ខែវិច្ឆិកា គឺក្នុងពិធីសម្ពោធគម្រោងការពារទឹកជំនន់ជំហាន៣ របស់ JICA នៅមុខវត្តបទុបវតី។
សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍ថា ទឹកនៅពេលនេះនៅក្រោម៥ ម៉ែត្រទៅហើយ បើ២០ ថ្ងៃទៀតដល់ថ្ងៃបុណ្យអុំទូក តើអាចអុំបានដែរឬទេ ហើយអ្នកព្យាករណ៍ថា នៅពេលបុណ្យអុំទូក ទឹកនៅសល់៤, ២០ ម៉ែត្រ ដូច្នេះបើអ្នកវិភាគ ឬបក្សប្រឆាំងដែលអាចអុំបាន សម្តេចនឹងចេញលុយឲ្យ។
សម្តេចតេជោបានអះអាងយ៉ាងនេះថា “មានអ្នកវិភាគខ្លះថា រាជរដ្ឋាភិបាលមិនហានចាត់តាំងបុណ្យទេ ខ្លាចគណបក្សសង្គ្រោះជាតិធ្វើបាតុកម្ម អញ្ជើញចេញមកធ្វើបាតុកម្ម ចេញមក វាទៅជាអីចេះឆ្កុយទៅ ! ឥឡូវសុំយកទូកមកអុំ ខ្ញុំចេញលុយឲ្យ ជាបច្ចេកទេសទៅមិនរួចទេ អុំមិនកើតទេ អ្នកបច្ចេកទេសថា អុំវាមិនកើត តែទោះជាមិនបានអុំទូក តែការលក់ដូរ ការសម្តែងខន់សឺត នៅតែមាន ដែលប្រជាពលរដ្ឋអាចដើរកំសាន្តបានដូចគ្នា”។
សូមបញ្ជាក់ថា កាលពីថ្ងៃទី៣១ ខែតុលា ឆ្នាំ២០១៥ សម្ដេចអគ្គមហាសេនាបតីតេជោ ហ៊ុន សែន បានចេញសារាចរមួយស្ដីពីការផ្អាកព្រះរាជពិធីបុណ្យអុំទូក ដោយសារទឹកទន្លេមានកម្រិតទាបពេក ហើយម្យ៉ាងទៀតកម្ពុជា បាននឹងកំពុងជួបប្រទះគ្រោះរាំងស្ងួត។
នៅក្នុងសារាចរស្ដីពីការផ្អាកការប្រារព្ធព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំ២០១៥ ដែលចុះហត្ថលេខាដោយសម្ដេចអគ្គមហាសេនាបតីតេជោ ហ៊ុន សែនលើកឡើងថា ដោយឆ្នាំនេះ ទឹកទន្លេមានកម្រិតទាបពេក ហើយចំពោះមុខ ព្រះរាជាណាចក្រកម្ពុជាបាននឹងកំពុងជួបប្រទះគ្រោះរាំងស្ងួត ដែលទាមទារឱ្យយើងប្រមូលកម្លាំងសរុប មធ្យោបាយសរុប ក្នុងការដោះស្រាយបញ្ហាកង្វះខាតទឹកសម្រាប់ស្រូវប្រាំងជូនដល់ប្រជាកសិករនៅតាមបណ្ដាខេត្តនោះ រាជរដ្ឋាភិបាលសូមធ្វើការណែនាំ ផ្អាកការរៀបចំព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅតាមដងទន្លេសាបមុខព្រះបរមរាជវាំងដែលគ្រោងប្រព្រឹត្តទៅនៅថ្ងៃទី២៤-២៥ និងទី២៦ ខែវិច្ឆិកាឆ្នាំ២០១៥ ការរៀបចំពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅតាមបណ្ដាខេត្តនានាអាចប្រព្រឹត្តទៅជាធម្មតាតាមទំនៀមទម្លាប់ប្រពៃណី និងតាមលទ្ធភាពរបស់អាជ្ញាធរដែលជាអ្នករៀបចំ។
ការឈប់សម្រាករបស់មន្ត្រីរាជការនិយោជិត កម្មករ ចំនួន០៣ថ្ងៃក្នុងព្រះរាជពិធីនេះ នៅរក្សាដដែល ដូចខ្លឹមសារដែលមានចែងក្នុងអនុក្រឹត្យលេខ ២៦៨ អនក្រ.បក ចុះថ្ងៃទី ០៦ខែតុលា ឆ្នាំ២០១៤ ស្ដីពីប្រតិទិនឈប់សម្រាកការងាររបស់មន្ត្រីរាជការ និយោជិត កម្មករ ប្រជាំឆ្នាំ២០១៥។
គ្រប់ក្រសួងស្ថាប័នពាក់ព័ន្ធ រាជធានីនិងខេត្ត ត្រូវបន្តយកចិត្តទុកដាក់ប្រុងប្រយ័ត្នខ្ពស់ ក្នុងការជួយដោះស្រាយបញ្ហាកង្វះខាតទឹក ដើម្បីជៀសវាងការខូចខាតផលដំណាំរបស់ប្រជាកសិករនៅតាមបណ្ដាខេត្តជាពិសេសនៅរដូវប្រាំងឆ្នាំនេះ។
ព្រះរាជពិធីបុណ្យទ្វាទសមាស បុណ្យប្រពៃណីជាតិ ប្រពៃណីសាសនា បុណ្យជាតិ បុណ្យអន្តរជាតិជារៀងរាល់ឆ្នាំ រាជរដ្ឋាភិបាលតែងប្រារព្ធព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ចំនួន ០៣ថ្ងៃ ដើម្បីអបអរសាទរព្រះរាជពិធីបុណ្យប្រពៃណីជាតិ និងបន្តរក្សាទំនៀមទម្លាប់ ដ៏ប្រពៃរបស់ប្រជាពលរដ្ឋកម្ពុជា ដែលមានតាំងពីយូរលង់មកហើយ៕
សម្តេចតេជោ ហ៊ុន សែន ពន្យល់ពីការផ្អាកព្រះរាជពិធីបុណ្យអុំទូកនៅឆ្នាំនេះ
0 Comments