សៀមរាប ៖ រមណីយដ្ឋានវប្បធម៌ ប្រវត្តិសាស្ត្រ ភ្នំគូលែនដែលមានធម្មជាតិសម្បូរបែបនោះកំពុងទទួលបាននូវការចាប់អារម្មណ៍ពីសំណាក់ភ្ញៀវទេសចរជាតិនិងអន្តរជាតិហើយបច្ចុប្បន្ននេះដើម្បីបញ្ចៀសនូវការប៉ះពាល់ជាអតិបរមាអាជ្ញាធរជាតិអប្សរាបានត្រៀមកសាងរោងឆ្មាំចំនួន២កន្លែងដើម្បីពង្រឹងការងារអភិរក្សប្រាសាទនិងបុរាណនានាដែលមាននៅលើរមណីយដ្ឋានភ្នំគូលែននេះ។
កាលពីថ្ងៃទី ០៣ ខែវិច្ឆិកា ឆ្នាំ២០១៥ លោក ឈាន រដ្ឋាប្រធាននាយកដ្ឋានស្តីទីរបស់នាយកដ្ឋានអភិរក្សប្រាសាទក្រៅឧទ្យានអង្គរ នៃអាជ្ញាធរជាតិអប្សរា រួមទាំងបុគ្គលិកក្រោមឱវាទបានទៅសិក្សារកទីតាំងចំនួន ០២កន្លែង ដើម្បីធ្វើការសាងសង់រោងឆ្មាំចំនួន ០២ខ្នង បន្ថែមទៀត នៅលើភ្នំគូលែន សម្រាប់ឲ្យបុគ្គលិកបច្ចេកទេស និងភ្នាក់ងារអភិរក្សប្រាសាទបំពេញការងារ។
ការសាងសង់រោងឆ្មាំចំនួនពីរនេះ គឺជាដើម្បីឆ្លើយតបទៅនឹងអនុសាសន៍របស់កិច្ចប្រជុំ ICC អង្គរ លើកទី ២៤ នាថ្ងៃទី៤ និងទី ៥ ខែមិថុនាឆ្នាំ ២០១៥កន្លងទៅដែលតម្រូវឲ្យអាជ្ញាធរជាតិអប្សរា ធើ្វការពង្រឹងផ្នែកធនធានមនុស្ស និងធនធានសម្ភារៈ ដើម្បីអភិរក្សនិងលើកតម្លៃរមណីយដ្ឋានប្រវត្តិសាស្ត្រនេះ ប្រកបដោយជោគជ័យ។ ជាលទ្ធផលក្រុមការងាររកបានទីតាំងចំនួន២កនែ្លងដែលមានលក្ខខណ្ឌសមស្របអាចសាងសង់រោងឆ្មាំទាំង២ខ្នងបានគឺនៅតំបន់ការពារប្រាសាទរោងចិននិងនៅតំបន់ការពារស្រះដំរី។
សូមបញ្ជាក់ថា កន្លងមកអាជ្ញាធរជាតិអប្សរាបានសាងសង់រោងឆ្មាំចំនួន០១ខ្នងនិងបង្គន់អនាម័យសម្រាប់ភ្ញៀវទេសចរចំនួន១ខ្នងរួចហើយនៅក្នុងតំបន់ព្រះអង្គធំត្រង់វាលស្តេចគម្លង់។
ទន្ទឹមនឹងនេះអាជ្ញាធរជាតិអប្សរាបានសហការជាមួយអង្គការ ADF កំណត់តំបន់និងបោះបង្គោលព្រំការពារប្រាសាទនិងបុរាណដ្ឋាន លើភ្នំគូលែនបានចំនួន៥តំបន់និងបានដាំកូនឈើចំនួន ៥០០០ដើម នៅតំបន់ការពារប្រាសាទអ្នកតា។ ជាមួយគ្នានេះអាជ្ញាធរជាតិអប្សរាក៏បានដាក់បុគ្គលិកបច្ចេកទេស ផ្នែកបុរាណវិទ្យាចំនួន៣នាក់និងភ្នាក់ងារអភិរក្សប្រាសាទចំនួន៣៨នាក់ឲ្យបំពេញការងារនៅទីនោះផងដែរ៕
អាជ្ញាធរជាតិអប្សរាបានត្រៀមកសាងរោងឆ្មាំចំនួន២កន្លែងបន្ថែមទៀតនៅភ្នំគូលែន
0 Comments