ភ្នំពេញ ៖ លោកសម រង្ស៊ី និងលោកកឹម សុខាបានដឹកនាំគ្នាត្រឡប់ពីបរទេសវិញហើយកាលពីវេលាម៉ោង៧និង៤៥នាទីយប់ថ្ងៃទី៣ ខែវិច្ឆិកា ឆ្នាំ២០១៥ ហើយដំណើរត្រឡប់វិញនេះក៏មានសមាជិកសមាជិកា ក៏ដូចជាសកម្មជនគាំទ្របានរង់ចាំទទួលយ៉ាងច្រើនផងដែរនៅមុខព្រលានយន្តហោះអន្តរជាតិភ្នំពេញ។ ក្នុងដំណើរត្រឡប់មកវិញនាពេលនេះដែរ ថ្នាក់ដឹកនាំគណបក្សសង្គ្រោះជាតិទាំង២នាក់ នឹងមានបញ្ហាជាច្រើនត្រូវដោះស្រាយ ជាពិសេសទាក់ទងទៅនឹងការប្រើអំពើហិង្សាទៅលើអ្នកតំណាងរាស្ត្រ២រូបកាលពីពេលថ្មីៗនេះ ព្រមទាំងការដកតំណែងរបស់លោកកឹម សុខា ពីអនុប្រធានទី១រដ្ឋសភា។
លោកសម រង្ស៊ី បានថ្លែងទៅកាន់អ្នកសារព័ត៌មាននៅឯព្រលានយន្តហោះភ្នំពេញថា តំណាងរាស្ត្ររបស់លោកទាំង២រូប ដែលទទួលរងអំពើហិង្សាកាលពីថ្ងៃទី២៦ ខែតុលា កន្លងទៅមានសភាពធ្ងន់ធ្ងរ បន្ទាប់ពីលោកបានចូលសួរសុខទុក្ខកាលពីរសៀលថ្ងៃទី៣ ខែវិច្ឆិកានេះ។ លោកបញ្ជាក់ថា អំពើហិង្សានេះទាមទារឲ្យមានការស៊ើបអង្កេតដោយឯករាជ្យដើម្បីរកយុត្តិធម៌ឲ្យជនរងគ្រោះ។ ដោយឡែកទាក់ទងនឹងវប្បធម៌សន្ទនា លោកអះអាងថា បើទោះបីជាមានបញ្ហាបន្តិចបន្តួចក៏ដោយគឺត្រូវតែរួមគ្នាដោះស្រាយដោយសន្តិវិធី មិនអាចធ្វើឲ្យប៉ះពាល់ដល់វប្បធម៌សន្ទនាឡើយ។
គួររំលឹកថា អ្នកតំណាងរាស្ត្ររបស់គណបក្សសង្គ្រោះជាតិចំនួន២រូបគឺលោកញ៉យ ចំរើន និងលោកគង់ សភា ត្រូវបានមនុស្សមិនស្គាល់មុខមួយក្រុមប្រើអំពើហិង្សាយ៉ាងធ្ងន់ធ្ងរ បន្ទាប់ពីលោកចេញពីប្រជុំនៅរដ្ឋសភាកាលពីវេលាម៉ោង១២និង១៥នាទីថ្ងៃទី២៦ ខែតុលា ឆ្នាំ២០១៥ កន្លងទៅថ្មីៗនេះ ហើយត្រូវបានបញ្ជូនទៅព្យាបាលជាបន្ទាន់នៅប្រទេសថៃ។ បញ្ហាដែលកើតឡើងថ្មីមួយទៀត បន្ទាប់ពីការប្រើអំពើហិង្សាទៅលើតំណាងរាស្ត្រទាំង២រូបនោះ គឺរដ្ឋសភា នៃព្រះរាជាណាចក្រកម្ពុជា ដោយយោងទៅលើសំណើរបស់ប្រជាពលរដ្ឋជាច្រើន និងអ្នកតំណាងរាស្ត្រផងនោះបានបើកកិច្ចប្រជុំបោះឆ្នោតទម្លាក់លោកកឹម សុខាពីអនុប្រធានរដ្ឋសភា៕
លោកសម រង្ស៊ី និងលោកកឹម សុខាបានមកដល់ភ្នំពេញវិញ បន្ទាប់ពីតំណាងរាស្ត្ររបស់ខ្លួនជួបបញ្ហា
0 Comments