បាត់ដំបង ៖ ពលករខ្មែរចំនួន៩នាក់ ដែលបានធ្វើចំណាកស្រុក ឆ្លងដែនចូលទៅធ្វើការនៅក្នុងប្រទេសថៃបានជួបគ្រោះថ្នាក់ចរាចរណ៍ បន្ទាប់ពីរថយន្តទួរីស ដែលដឹកពួកគេ ចាកចេញពីចំណុចផ្សាររោងក្លឿ ស្ថិតនៅក្បែរព្រំដែនកម្ពុជា ថៃ បានផ្ទុះកង់ក្រឡាប់នៅតាមផ្លូវ ហើយភ្លាមៗពលករទាំងអស់ត្រូវបានបញ្ជូនទៅសង្គ្រោះនៅឯមន្ទីរពេទ្យ។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីថ្ងៃទី២៧ ខែវិច្ឆិកា ឆ្នាំ២០១៥ វេលាម៉ោង១០ព្រឹក ត្រង់ចំណុចក្នុងទឹកដីខេត្តស្រះកែវ ប្រទេសថៃ។
សាក្សីមួយចំនួនបាននិយាយថា នៅព្រឹកមុនពេលកើតហេតុ គឺមានរថយន្តទួរីសមួយគ្រឿង បានដឹកពលករខ្មែរជាច្រើននាក់ ដោយបានចាកចេញពីព្រំប្រទល់កម្ពុជាត្រង់ចំណុចក្នុងទីតាំងផ្សាររោងក្លឿជាប់នឹងច្រកទ្វារអន្តរជាតិប៉ោយប៉ែត ព្រមទាំងបានចេញដំណើរឆ្ពោះទៅកាន់ខេត្តឆាក់ឈើងសៅ ដើម្បីធ្វើជាកម្មករនៅទីនោះ។
ប្រភពដដែលបានបន្តថា លុះនៅពេលចេញដំណើរទៅដល់ក្នុងទឹកដីខេត្តស្រះកែវ ក៏ស្រាប់តែរថយន្តនេះបានផ្ទុះកង់ឡើងបណ្តាលឲ្យតួរថយន្តទាំងមូលក្រឡាប់ធ្លាក់ផ្លូវតែម្តង ដែលធ្វើឲ្យពលករ ដែលនៅលើរថយន្ត ត្រូវជះចេញពីរថយន្តទាំងអស់ និងបង្កឲ្យរងរបួសធ្ងន់ស្រាលចំនួន៩នាក់ ក្នុងនោះមានស្រីចំនួន៣នាក់ផង។
ក្រោយពេលកើតហេតុ សមត្ថកិច្ចថៃបានជួយបញ្ជូនជនរងគ្រោះទាំងអស់ទៅកាន់មន្ទីរពេទ្យសម្តេចព្រះយុផរាជ ប្រចាំខេត្តស្រះកែវ ដើម្បីជួយសង្គ្រោះដល់អាយុជីវិតរបស់ពួកគេ ក្រោយពេលហេតុការណ៍នេះត្រូវបានកើតឡើងនៅក្នុងប្រទេសថៃរួចមក៕
ពលករខ្មែររបួសធ្ងន់ស្រាល៩នាក់ ពេលចូលទៅធ្វើការនៅក្នុងប្រទេសថៃ
0 Comments