កំពង់ស្ពឺ ៖ កាលពីវេលាម៉ោង១៨និង៥០នាទីព្រលប់ថ្ងៃទី២៨ ខែវិច្ឆិកា មានហេតុការណ៍ភ្ញាក់ផ្អើលមួយបានកើតឡើង ក្រោយពីទទួលព័ត៌មានបឋមថាក្រុមសមត្ថកិច្ច កំពុងបាញ់តបតជាមួយក្រុមចោរ ដែលកំពុងធ្វើសកម្មភាពប្លន់នៅផ្ទះជាងកាត់សក់សម្ដេចនាយករដ្ឋមន្ត្រីនៅចំណុចផ្សារវត្តអង្គ ស្ថិតក្នុងស្រុកគងពិសី ខេត្តកំពង់ស្ពឺ។ ប៉ុន្តែក្រោយពីសមត្ថកិច្ចចុះមកព្រោងព្រាត ហើយចូលឆែកឆេរផ្ទះនោះរួចមក ពុំមានបានឃើញក្រុមចោរសូម្បីតែម្នាក់ ពោលគឺឃើញថាកូនម្ចាស់ផ្ទះម្នាក់ប៉ុណ្ណោះ ដោយគេបានអះអាងថាក្រុមចោរបានរត់គេចបាត់អស់ហើយ ហើយក្រោយសាកសួរមកទើបដឹងថាជាករណីលួច មិនមែនជាករណីប្លន់ឡើយ។
ចំពោះហេតុការណ៍ខាងលើនេះ ក្រោយពីទទួលបានព័ត៌មានភ្លាម អ្នកសារព័ត៌មានយើងបានចុះទៅទីតាំងនោះ នៅម៉ោងប្រមាណ៧ព្រលប់ថ្ងៃដដែលនេះ ប៉ុន្តែសមត្ថកិច្ចមិនទាន់អនុញ្ញាតឲ្យចូលផ្ដិតយករូបភាព និងព័ត៌មានទេ ដោយសារខ្លាចគ្រោះថ្នាក់ដល់ជីវិត។
លុះនៅវេលាម៉ោង១៩ និង២០នាទីថ្ងៃដដែលនោះ សមត្ថកិច្ច ក៏ដូចកម្លាំងការពារសន្តិសុខទាំងអស់ ដោយមានបទបញ្ជាពីថ្នាក់ដឹកនាំជាន់ខ្ពស់ធំៗផង បានឡោមព័ទ្ធផ្ទះកើតហេតុនោះ ហើយករណីនេះត្រូវបានគេអះអាងថាមានការផ្ទុះអាវុធតែ៣គ្រាប់ទេ ប៉ុន្តែមានការរាយការណ៍មកថាបាញ់ច្រើនគ្រាប់។
ក្រោយមកអ្នកយកព័ត៌មានយើងបានជួបជាមួយម្ចាស់ផ្ទះឈ្មោះបានបញ្ជាក់ហេតុការណ៍ច្បាស់លាស់ថា ចំពោះហេតុការណ៍នេះ គាត់អត់នៅក្នុងផ្ទះទេ ប៉ុន្តែនៅពេលដែលផ្ទុះអាវុធនោះ គឺមានកូនគាត់ម្នាក់ ពូននៅក្រោមគ្រែ ហើយកូនគាត់បានMessage ទៅប្រាប់ថា មានមនុស្សចូលផ្ទះ ពេលគាត់ទៅដល់ផ្ទះ ក៏មានការបាញ់ចេញពីក្នុងផ្ទះគាត់ ប៉ុន្តែមិនដឹងជាបាញ់ស្អី។ ចំណែក ក្មេងវិញកំពុងពូននៅក្រោមគ្រែនៅឡើយ ហើយមុខសញ្ញាក៏មិនទាន់ដឹងនៅឡើយទេ។
ក្រោយមកនៅវេលាម៉ោង១៩និង៤៥នាទីយប់ថ្ងៃដដែលនេះ លោកមាន សំណាង អធិការនគរបាលស្រុកអង្គស្នួលបានដឹកនាំកម្លាំងត្រៀមចូលឆែកឆេរ ប៉ុន្តែពេលនោះកម្លាំងនគរបាលទាំងអស់មិនទាន់សម្រេចចូលឆែកឆេរទេ ដោយសារនៅផ្ទះកើតហេតុកំពុងមានភាពងងឹត។ ដូច្នេះកម្លាំងកំពុងត្រៀមធ្វើការឆែកឆេរ ដោយប្រើកម្លាំងពិសេស។ ហេតុការណ៍នេះបានកើតឡើងនៅស្រុកគងពិសី ប៉ុន្តែខាងអធិការនគរបាលស្រុកអង្គស្នួលបានចុះមកសហការជាមួយស្នងការ មេបញ្ជាការកងរាជអាវុធហត្ថខេត្ត ក៏ដូចជា មេបញ្ជាការគ្រប់ជាន់ថ្នាក់ទាំងអស់ ដើម្បីបង្ក្រាបករណីនេះ។
ក្រោយមកទៀតនៅម៉ោងប្រមាណ២០និង១០នាទីយប់ថ្ងៃដដែលនេះ សមត្ថកិច្ចកងកម្លាំងប្រដាប់អាវុធទាំងអស់បានចូលឆែកឆេរផ្ទះកើតហេតុនោះគ្រប់បន្ទប់ទាំងអស់ ដោយបានរំដោះកូនម្ចាស់ផ្ទះ តែពុំបានឃើញអ្វីទាំងអស់ គឺឃើញតែការរុះរើឥវ៉ាន់នៅក្នុងផ្ទះនោះប៉ុណ្ណោះ។ លុះនៅវេលាម៉ោង២០និង១៦នាទីយប់ថ្ងៃដដែលនោះ លោកឧត្ដមសេនីយ៍ទោ សុខ ខេមរិន្ទ ប្រធាននាយកដ្ឋានក្រសួងមហាផ្ទៃបានចុះមកដល់កន្លែងកើតហេតុ។
ពាក់ព័ន្ធនឹងករណីខាងលើនេះដែរ ក្រុមសមត្ថកិច្ចបានបញ្ជាក់ថា ការផ្ទុះអាវុធនោះ គឺខាងសមត្ថកិច្ចជាអ្នកផ្ទុះ មិនមែនផ្ទុះបាញ់តបតជាមួយជនល្មើសឡើយ គឺផ្ទុះដើម្បីគំរាមដល់ជនល្មើស។ លុះពេលចូលដល់ផ្ទះកើតហេតុ សមត្ថកិច្ចបានរំដោះកូនម្ចាស់ផ្ទះ ដោយគេបានអះអាងថា ក្រុមចោរបានរត់រួចមុនហ្នឹងយូរហើយ ប៉ុន្តែសមត្ថកិច្ចអត់ហ៊ានចូល ដោយសារផ្ទះនោះងងឹត ហើយកូនម្ចាស់ផ្ទះមានភាពភ័យខ្លាចថាចោរនៅក្នុងផ្ទះរបស់គេ ដល់ពេលសមត្ថកិច្ចចុះមកដល់ទើបដឹងថាក្រុមចោរបានរត់គេចបាត់អស់យូរហើយ។
ក្រោយពីចុះឆែកឆេរ និងសាកសួរកូនម្ចាស់ផ្ទះរួចមក សមត្ថកិច្ចបានបញ្ជាក់ថា ករណីនេះជាករណីលួច មិនមែនជាករណីប្លន់ទេ តែកូនម្ចាស់ផ្ទះទាន់ពេលក្រុមចោរកំពុងធ្វើសកម្មភាពនោះ ក៏បានរត់ទៅបិទទ្វារចាក់សោខ្ទាស់ពីក្នុង ហើយខលប្រាប់ទៅដល់ក្រុមសមត្ថកិច្ច ក៏ដូចប្រជាពលរដ្ឋនៅផ្សារវត្តអង្គ ឆ្លៀតក្នុងឱកាសនោះក្រុមចោរបានកាត់របងខាងក្រោយរត់ចេញទៅបាត់។ ដំបូងឡើយករណីនេះត្រូវបានប្រជាពលរដ្ឋនៅជុំវិញនោះពិព័រណ៍ថា ជាករណីប្លន់ ហើយមានការផ្ទុះអាវុធ ប៉ុន្តែតាមពិតជាការផ្ទុះអាវុធខាងសមត្ថកិច្ចដើម្បីការពារ ការធ្វើបាបដល់ជនរងគ្រោះពីសំណាក់ក្រុមចោរប៉ុណ្ណោះ។
ចំពោះករណីនេះដែរ ម្ចាស់ផ្ទះបានអះអាងថា ពុំមានបាត់បង់អ្វីនោះទេ គ្រាន់តែបាត់កាំភ្លើង១ដើមម៉ាកប៉េអាតា ប៉ុន្តែសមត្ថកិច្ចកំពុងតាមដានហើយរឿងនេះ ដោយសារតែក្រោយកើតហេតុប្រហែល១៥នាទី សមត្ថកិច្ចបានព័ទ្ធជុំវិញលំនៅដ្ឋាននោះ ដោយមានអធិការនគរបាលស្រុកអង្គស្នួល លោកមានសំណាង ដឹកនាំកម្លាំងឆ្មក់ចូល តាមបទបញ្ជារបស់លោកឧត្ដមសេនីយ៍ទោ អ៊ីវ ចំរើន និងមានការដឹកនាំកម្លាំងដោយក្រសួងមហាផ្ទៃ ក្នុងនោះមានលោកឧត្ដមសេនីយ៍ទោ សុខ ខេមរិន្ទ ព្រមទាំងលោកឧត្ដមសេនីយ៍ត្រី ជូ សារុន មេបញ្ជាការកងរាជអាវុធហត្ថខេត្តកំពង់ស្ពឺ លោកឧត្ដមសេនីយ៍ត្រី កែវ ពិសី ស្នងការនគរបាលខេត្តកំពង់ស្ពឺ សុទ្ធតែដឹកនាំកម្លាំងចុះមកផ្ទាល់។
ហេតុការណ៍ខាងលើនេះបានធ្វើឲ្យភ្ញាក់ផ្អើលដល់ប្រជាពលរដ្ឋ ក៏ដូចសមត្ថកិច្ចចម្រុះចុះមកព្រោងព្រាត ដើម្បីបង្ក្រាបក្រុមចោរ ប៉ុន្តែវាមិនមានសភាពខ្លាំងក្លា ដូចការភ្ញាក់ផ្អើលឡើយ ហើយជាករណីលួច ដែលក្រុមចោរបានរត់បាត់អស់ទៀត។ ចំណែកទ្រព្យសម្បត្តិក៏គ្មានបាត់បង់ដែរ គ្រាន់តែឃើញមានការរើកកាយឥវ៉ាន់ និងបាត់កាំភ្លើងរបស់ម្ចាស់ផ្ទះ១ដើមប៉ុណ្ណោះ។ ប៉ុន្តែបើយើងក្រឡេកមើលពេលចូលប្រតិបត្តិការឆែកឆេរផ្ទះកើតហេតុនោះដំបូងវិញ គឺដូចទៅនឹងការសម្ដែងក្នុងខ្សែភាពយន្តអីចឹង តែនេះជារឿងប្រតិបត្តិការជាក់ស្ដែង និងមានការប្រុងប្រយ័ត្នខ្ពស់ក្នុងពេលចុះឆែកឆេរ មិនមែនជាការថតកុនឡើយ។ ដើម្បីឲ្យកាន់តែជាក់ច្បាស់សូមទស្សនាវីដេអូខាងក្រោមទាំងអស់គ្នា!៕
ទស្សនាវីដេអូប្រតិបត្តិការបង្ក្រាបក្រុមចោរនៅផ្ទះជាងកាត់សក់សម្ដេចនាយករដ្ឋមន្ត្រី
0 Comments