កញ្ញា Mine Asami ជនជាតិជប៉ុន ដែលជាទូតសុច្ឆន្ទៈរបស់ក្លិបបាល់ទាត់ខេមបូឌានថាយហ្គឺរ (Cambodian Tiger) សមាជិកក្នុងលីកកំពូលកម្ពុជា បានជួបឧបទ្ទវហេតុចោរឆក់កាបូប នៅម្ដុំទួលគោក ក្នុងរាជធានីភ្នំពេញ ព្រមទាំងបាត់បង់សម្ភារៈមានតម្លៃមួយចំនួនទៀតផង កាលពីពេលថ្មីៗនេះ។
កញ្ញា Mine Asami បានសរសេរនៅលើទំព័រហ្វេសប៊ុករបស់ខ្លួនថា៖ «នៅថ្ងៃទី ១៤ ខែ វិច្ឆិកា នាងខ្ញុំត្រូវបានចោរឆក់កាបូបយួរនៅស្មាត្រង់ចំណុចទួលគោក។ ក្នុងហេតុការណ៍នោះនាងខ្ញុំកំពុងតែធ្វើដំណើរជាមួយបុគ្គលិករបស់ក្រុមបាល់ទាត់ខេមបូឌានថាយហ្គឺរ ស្រាប់តែមានមនុស្សពីរនាក់ជិះម៉ូតូមួយគ្រឿង បានឆក់យកកាបូបនាងខ្ញុំពីក្រោយដោយក្នុងកាបូបនោះមានដូច លិខិតឆ្លងដែន, កាបូបលុយ, កុងធានាគារ, Iphone6 និងរបស់មានតំលៃផ្សេងៗទៀត»។
សំណេរបានបន្ថែមទៀតថា «នៅពេលនោះខ្ញុំធ្លាក់ពីលើម៉ូតូហើយបណ្ដារឲ្យរបួសស្មានិងក្បាលផងដែល។ ប៉ុន្ដែជាសំណាងល្អពីព្រោះមានបុគ្គលិកថាយហ្គឺរ ជូននាងខ្ញុំទៅពេទ្យនិងប្ដឹងប៉ូលិស។ គ្រោះថ្នាក់នេះមិនធ្ងន់ណាស់ណាទេ ប៉ុន្ដែធ្វើឲ្យខ្ញុំមានអារម្មណ៍មិនសប្បាយចិត្តនិងខ្លាចយ៉ាងខ្លាំង។ ប៉ុន្ដែខ្ញុំដឹងថា មានបងប្អូនកម្ពុជា ជាច្រើនដែលស្រលាញ់និងរាប់អាននាងខ្ញុំ»។
ទោះជាជួបបញ្ហាគ្រោះថ្នាក់មែន តែនាងបានចូលរួមកម្មវិធីជាមួយកីឡាករជម្រើសជាតិកម្ពុជានៅផ្សារទំនើប អ៊ីអន និង កម្មវិធីពាក់កណ្ដាលតង់នៃការប្រកួតជម្រុះ 2018 FIFA World Cup រវាងក្រុមជម្រើសជាតិកម្ពុជា ជាមួយក្រុមជប៉ុន ផងដែរ។ «នាងខ្ញុំមានអារម្មណ៍ថាសប្បាយចិត្តនៅពេលឃើញបងប្អូនកម្ពុជា ញញឹមនិងបានថតរូបជាមួយខ្ញុំជាច្រើនផងដែរ។ ខ្ញុំស្រលាញ់ប្រទេសកម្ពុជានិងស្រលាញ់ប្រជាជនកម្ពុជា ដូច្នេះខ្ញុំមានអារម្មណ៍មិនល្អទេនៅពេលប្រាប់រឿងនេះដល់អ្នកទាំងអស់គ្នា។ នៅពេលខ្ញុំបានមកប្រទេសកម្ពុជាលើកក្រោយនាងខ្ញុំសង្ឃឹមថានឹងមានតែការចងចាំដែលល្អៗ»។ កញ្ញា Mine Asami បញ្ជាក់។
ស្រីស្អាតជនជាតិជប៉ុនជាអ្នកគាំទ្របាល់ទាត់យ៉ាងសកម្មទាំងក្នុងក្រុមជម្រើសជាតិកម្ពុជា និងក្លិបខេមបូឌានថាហ្គឺរ ក្នុងរដូវកាលនេះ។ បច្ចុប្បន្ននាងបានធ្វើដំណើរទៅប្រទេសកំណើតរបស់ខ្លួនវិញបណ្ដោះអាសន្នសិន៕
ស្រីស្រស់ទូតសុច្ឆន្ទៈរបស់ក្លិបបាល់ទាត់ខេមបូឌានថាយហ្គឺរ ត្រូវចោរឆក់កាបូបនៅម្ដុំទួលគោក
0 Comments