កំពង់ឆ្នាំង ៖ យ៉ាងហោចណាស់ មនុស្សប្រុស-ស្រី ចំនួន៣នាក់បានរងរបួសធ្ងន់ និងស្រាល ក្នុងឧបទ្ទវហេតុគ្រោះថ្នាក់ចរាចរណ៍មួយ រវាងរថយន្តកាមរីឆ្លាម និងរថយន្តតូយ៉ូតាហ៊ីលុចមួយបាំងកម្លាំង កាលពីពេលាម៉ោង៤និង៣៥នាទីល្ងាចថ្ងៃទី២៣ ខែវិច្ឆិកា នៅចំណុចលើកំណាត់ផ្លូវជាតិលេខ៥ ស្ថិតក្នុងភូមិព្រៃពួច ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។
ប្រភពពីកន្លែងកើតហេតុបានឲ្យដឹងថា មុនពេលកើតហេតុមានរថយន្តកាមរីឆ្លាម មួយគ្រឿង ពណ៌ស្ករ ពាក់ស្លាកលេខ កំពង់ធំ 2A-0727 មានអ្នករួមដំណើរទាំងអស់ចំនួន៦នាក់ ស្រី២នាក់ ក្នុងរថយន្ត ធ្វើដំណើរពីជើងទៅត្បូង ស្របពេលនោះមានរថយន្តតូយ៉ូតា ហ៊ីលុចមួយគ្រឿង ពណ៌ខ្មៅ ពាក់ស្លាកលេខ 2J-2357 បើកបរក្នុងទិសដៅច្រាស់គ្នា ហើយបានបើកវ៉ារថយន្តមួយគ្រឿងផ្សេងទៀត លុះដល់ចំណុចកើតហេតុមាន ក៏ជ្រុលចង្កូតទៅបុករថយន្តកាមរីឆ្លាមខាងលើពេញទំហឹង បណ្តាលឲ្យរថយន្តទាំងសងខាង រងការខូចខាតផ្នែកខាងមុខទាំងស្រុង។ ដោយឡែកអ្នកដំណើរក្នុងរថយន្តកាមរីឆ្លាម ស្ត្រីម្នាក់រងរបួសធ្ងន់ និងបុរសម្នាក់រងរបួសស្រាល។ ចំណែកឯអ្នកបើកបររថយន្ត តូយ៉ូតាហ៊ីលុចមួយបាំងកន្លះរងរបួសធ្ងន់ និងអ្នករួមដំណើរម្នាក់រងរបួសស្រាល។
ក្រោយកើតហេតុ អ្នករងរបួសត្រូវបានបញ្ជូនមកសង្គ្រោះ និងព្យាបាលនៅមន្ទីរពេទ្យបង្អែក ខេត្តកំពង់ឆ្នាំង ដោយឡែកមធ្យោបាយទាំងសងខាងត្រូវបានយកមករក្សាទុកនៅការិយាល័យសណ្តាប់ធ្នាប់នៃស្នងការដ្ឋាននគរបាលខេត្តកំពង់ឆ្នាំង៕
រថយន្តតូយ៉ូតាបុករថយន្តកាមរីឆ្លាម របួសធ្ងន់ស្រាលចំនួន៤នាក់
0 Comments