ខ្សែប្រយុទ្ធ James Wilson របស់ក្លិបបិសាចក្រហម Man Utd បានចូលលេងឲ្យក្លិប Brighton លេងនៅក្របខណ្ឌ Championship ជាកីឡាករខ្ចីជើង សម្រាប់រយៈពេលនៅសល់ក្នុងរដូវកាលនេះ។
កីឡាករវ័យ ១៩ ឆ្នាំម្នាក់នេះ លេងបានតែ ២ ប្រកួតប៉ុណ្ណោះឲ្យក្រុម Man Utd នៅក្នុងរដូវកាលនេះ ហើយបានចូលលេងជាកីឡាករបម្រុងប៉ុណ្ណោះ អំឡុងបរាជ័យជាមួយក្រុមកាំភ្លើងធំ Arsenal ដោយលទ្ធផលពិន្ទុ ០-៣ កាលពីថ្ងៃទី ៤ ខែតុលាកន្លងទៅ និងបានចូលលេងពេញមួយប្រកួតគត់ អំឡុងការប្រកួត Capital One ចាញ់ក្រុម Boro កាលពីថ្ងៃទី ២៨ តុលា។
កីឡាករ Wilson នឹងចូលលេងឲ្យក្រុម Brighton ដែលមិនទាន់មានប្រវត្តិចាញ់គេម្តង នៅការប្រកួត Championship ក្នុងរដូវកាលនេះ ហើយបច្ចុប្បន្ន ក្រុមមួយនេះឈរនៅលេខរៀងទី ២ នៅលើតារាង ពីក្រោយក្រុម Hull City ដោយខុសគ្នាតែពីរឿងចំនួនគ្រាប់បាល់ប៉ុណ្ណោះ។
លោក Chris Hughton ជាអ្នកចាត់ការរបស់ក្លិប Brighton បាននិយាយប្រាប់វេបសាយរបស់ក្លិបថា យើងចង់បន្ថែមខ្សែប្រយុទ្ធដ៏មុតស្រួចម្នាក់នេះ ចូលក្នុងក្រុមរបស់យើង ហើយម្យ៉ាងវិញទៀត កីឡាករ James គឺជាគោលដៅចង់បានរបស់យើងជាយូរមកហើយ ដូច្នេះហើយយើងពិតជាសប្បាយចិត្តខ្លាំងណាស់ ក្នុងការប្រមាញ់បានរូបគាត់។
លោក Hughton បានបន្តទៀតថា គាត់គឺជាខ្សែប្រយុទ្ធវ័យក្មេងម្នាក់ ហើយយើងសង្ឃឹមជឿជាក់ថា ការផ្ទេររបស់គាត់នឹងក្លាយបុព្វហេតុដ៏ល្អមួយសម្រាប់ភាគីពាក់ព័ន្ធទាំងអស់។
សូមបញ្ជាក់ថា កីឡាករ James ជាប់កុងត្រាជាមួយក្លិប Man Utd រហូតដល់រដូវក្តៅឆ្នាំ ២០១៩៕
ខ្សែប្រយុទ្ធ James Wilson ផ្ទេរជាកីឡាករខ្ចីជើងទៅកាន់ក្លិប Brighton
0 Comments