ការ​សម្លាប់​បាន​បង្កើន​ភាព​ភ័យខ្លាច​នៃ​អំពើ​ហិង្សា ​ក្នុង​ការ​បោះឆ្នោត​នៅ​ប្រទេស​វេណេហ្ស៊ុយអេឡា

ប្រធានាធិបតី​ប្រទេស​វេណេហ្ស៊ុយអេឡា​ លោក ​Nicolas Maduro បាន​និយាយ​ថា ការ​បាញ់សម្លាប់​មេដឹកនាំ​ប្រឆាំង​មួយ​រូប ហាក់បីដូចជា​ការ​សង​សឹក​របស់​ក្រុម​ជើងកាង ដោយ​លោក​បាន​ច្រានចោល​ការ​អះអាង​ដែល​ថា វា​គឺជា​ការ​ជំរុញ​ផ្នែក​នយោបាយ​មុន​ពេល​ការបោះឆ្នោត។

មន្ត្រី​គណបក្ស​បាន​និយាយថា អ្នក​វាយប្រហារ​ម្នាក់​បាន​បាញ់សម្លាប់​លោក Luis Manuel Diaz កាលពី​ល្ងាច​ថ្ងៃ​ពុធ នៅ​កណ្ដាល​តំបន់ Guarico នៅឯ​យុទ្ធនាការ​ឃោសនាបោះឆ្នោត​សភា​សម្រាប់​ថ្ងៃទី ៦ ខែធ្នូ ដែល​បាន​ជំរុញ​ឲ្យ​មានការ​ភ័យខ្លាច​ថា អំពើហិង្សា​អាច​នឹង​ផ្ទុះឡើង​នៅ ពេល​បោះឆ្នោត។

ព្រឹត្តិការណ៍​នេះ​ក៏ត្រូវ​បាន​ចូលរួម​ដោយ​លោកស្រី Lilian Tintori ផងដែរ ដែលជា​ភរិយា​របស់​មេដឹកនាំ​គណបក្សប្រឆាំង​ជាប់ពន្ធនាគារ ហើយ​ជា​បុគ្គល​ដ៏​ល្បីឈ្មោះ​ម្នាក់ ដែល​បាន​រិះគន់​លោក Maduro។

ជាមួយគ្នា​នោះ សហភាព​អឺរ៉ុប​បាន​សម្តែង​នូវ​ក្តី​ព្រួយបារម្ភ​អំពី​ការកើនឡើង​នៃ​អំពើហិង្សា ផ្សារភ្ជាប់​ទៅនឹង​ការបោះឆ្នោត។

សហភាព​អឺរ៉ុប​បាន​និយាយ​នៅក្នុង​សេចក្តីថ្លែងការណ៍​មួយ​ថា​៖ “​ការធ្វើឃាត​លោក Luis Manuel Diaz ដែលជា​លេខាធិការ​ថ្នាក់​តំបន់​នៃ​គណបក្ស​សកម្មភាព​ប្រជាធិបតេយ្យ​បានបង្ហាញ​ពី​ភាព​យ៉ាប់យ៉ឺន​បន្ថែមទៀត នៃ​ស្ថានភាព​តានតឹង ដែលមាន​រួចទៅហើយ​មុនពេល​ការបោះឆ្នោត​សភា នៅ​ថ្ងៃទី ៦ ខែធ្នូ​ឆ្នាំ ២០១៥ ”​។​

​

ខ្លួន​បាន​អំពាវនាវ​ឲ្យ​មានការ​ស៊ើបអង្កេត​មួយ​យ៉ាង​លឿន ហើយ​បាន​និយាយថា អ្នក​ដែល​ទទួលខុសត្រូវ​ ត្រូវ​នាំ​យក​ទៅ​កាត់ទោស។

ការស្ទង់មតិ​បានបង្ហាញ​ថា រដ្ឋាភិបាល​សង្គមនិយម​របស់​លោក Maduro អាច​នឹង​បាត់បង់​សំឡេង​ភាគច្រើន​របស់​ខ្លួន នៅ​ក្នុង​រដ្ឋសភា​ជាតិ​នៃ​ការបោះឆ្នោត នៅ​ខែ​ក្រោយនេះ​ ដោយសារ​ការ​ធ្លាក់ចុះ​នៃ​អំណាច​របស់​គាត់។

ជាមួយគ្នា​នោះដែរ សហរដ្ឋអាមេរិក​បាន​ថ្កោលទោស​ចំពោះ​ការសម្លាប់​នេះ ដោយ​ហៅ​វា​ថា ជា “​ការ​សម្លាប់​មនុស្ស​ដ៏​អាក្រក់​បំផុត​មួយ នា​ពេល​ចុង​ក្រោយ​នេះ និង​ជា​អំពើ​នៃ​ការ​បំភិតបំភ័យ​ប្រឆាំង​នឹង​គណបក្សប្រឆាំង​”​។​

ក្រុម​អ្នកសង្កេតការណ៍​បាន​ព្រមាន​ថា ការបោះឆ្នោត​អាច​បង្ក​ឲ្យ​មាន​ភាព​ចលាចល នៅក្នុង​ប្រទេស​អាមេរិក​ឡាទីន ដែល​មាន​ប្រជាជន​ចំនួន​៣០ លាន​នាក់​មួយ​នេះ​ ដែល​ត្រូវបាន​រង​ទុក្ខ​រួចទៅហើយ ដោយសារ​អំពើហិង្សា និង​វិបត្តិ​សេដ្ឋកិច្ច។

លោក Maduro បាន​និយាយ​ថា អាជ្ញាធរ​កំពុង​ធ្វើការ​ស៊ើបអង្កេត​ចំពោះ​ការ​សម្លាប់ ដែល​គួរ​ឲ្យ​សោកស្តាយ​នេះ​ ហើយ​ក្រសួងមហាផ្ទៃ​មាន​ភស្តុតាង​បង្ហាញ​ថា វា​គឺ​ជា​ការ​សងសឹក​ពី​សំណាក់​ពួក​ជន​អន្ធពាល។

នៅក្នុង​សុន្ទរកថា​មួយ ទៅកាន់​ក្រុម​អ្នកគាំទ្រ លោក​បាន​ច្រានចោល​ការ​អះអាង​របស់​ប្រធាន​នៃ​គណបក្ស​សកម្មភាព​ប្រជាធិបតេយ្យ​លោក Henry Ramos Allup ដែលថា អ្នកបាញ់​ប្រហារ​គឺជា​សមាជិក​នៃ​ក្រុម​ក្មេង​ទំនើង​ប្រដាប់​អាវុធ ដែល​មាន​ទំនាក់ទំនង​ទៅ​នឹង​គណបក្ស​កាន់អំណាច​គឺ​គណបក្ស​សង្គមនិយម​វេណេហ្ស៊ុយអេឡា (PSUV)៕

AFP

​

ការ​សម្លាប់​បាន​បង្កើន​ភាព​ភ័យខ្លាច​នៃ​អំពើ​ហិង្សា ​ក្នុង​ការ​បោះឆ្នោត​នៅ​ប្រទេស​វេណេហ្ស៊ុយអេឡា