បាត់ដំបង ៖ យោធិនពិការមួយរូប ដែលមានចរិតឆេវឆាវ និងចូលចិត្តយកគ្រឿងស្រវឹងធ្វើជាត្រីមុខ បានធ្វើអត្តឃាត ដោយចង.កសម្លាប់ខ្លួន នៅក្នុងផ្ទះរបស់ខ្លួនត្រង់ចំណុចផ្ទះលេខ១១០ក្នុងភូមិអណ្ដូងចេញ សង្កាត់អូរចារ ក្រុង-ខេត្តបាត់ដំបង ដែលសពជនរងគ្រោះរូបនេះត្រូវបានគេប្រទះឃើញកាលពីវេលាម៉ោង៦ព្រឹកថ្ងៃទី១ ខែវិច្ឆិកា ឆ្នាំ២០១៥ បន្ទាប់ពីបានរករឿង និងឈ្លោះទាស់ទែងគ្នាជាមួយនឹងប្រពន្ធរបស់ខ្លួនកាលពីល្ងាចរួចមក។
បើតាមការរៀបរាប់ពីស្ត្រីដែលត្រូវជាភរិយាឈ្មោះស៊ិន ម៉ាន់ អាយុ៥១ឆ្នាំ រស់នៅត្រង់ចំណុចកើតហេតុខាងលើបានឲ្យដឹងថា ប្តីរបស់អ្នកស្រីមានឈ្មោះអ៊ុំ សារឿន អាយុ៥០ឆ្នាំជាមន្ត្រីយោធិនពិការជើងស្ដាំម្ខាង តាំងពីសម័យសង្គ្រាមមកម្ល៉េះ។
ស្ត្រីរូបនេះបានបន្តថា កាលពីអំឡុងជាងមួយឆ្នាំមុនមានមិត្តភក្តិគាត់ម្នាក់ ដែលជាយោធិនពិការដូចគ្នា គឺឧស្សាហ៍មកផឹកស៊ីលេងជុំគ្នាជាមួយនឹងស្វាមីរបស់អ្នកស្រីណាស់។ ចាប់ពីពេលនោះមកប្តីរបស់អ្នកស្រីតែងតែរករឿងប្រចណ្ឌរូបអ្នកស្រីទៅលើបុរសនោះជារៀងរហូតមក បើទោះបីជាបុរសនោះបាត់មុខមិនដែលឃើញមកជាងមួយឆ្នាំហើយក៏ដោយ ក៏ប្តីរបស់អ្នកស្រីនៅតែចងចិត្តលើការប្រចណ្ឌនេះដដែល ពោលគឺឲ្យតែគាត់ផឹកស្រាស្រវឹង តែងតែរំលឹករឿងនេះមកនិយាយរហូត ដែលធ្វើឲ្យទំនាស់ចេះតែកើតមានឡើងជាប់ជាប្រចាំ ធ្វើឲ្យអ្នកស្រីត្រូវនាំកូនទាំង៥នាក់ទៅដេកនៅផ្ទះបងស្រីជានិច្ច នៅពេលណាដែលគាត់ពិសាស្រាចូលពោះម្តងៗ។
លុះនៅល្ងាចថ្ងៃទី៣១ ខែតុលា គឺរឿងចាស់បានផ្ទុះឡើងមកម្ដងទៀត ហើយរូបអ្នកស្រីក៏បានចាកចេញពីផ្ទះទៅដេកនៅផ្ទះបងស្រីដូចសព្វមួយដង។ ប៉ុន្តែដល់ពេលព្រឹកឡើងពេលដែលក្មួយរបស់គាត់បានចូលទៅក្នុងផ្ទះដើម្បីរកបាយកកហូប ក៏ស្រាប់តែប្រទះឃើញប្តីរបស់អ្នកស្រីបានយកកន្សែងចង.កសម្លាប់ខ្លួននៅនឹងមាត់ទ្វារខាងក្រោយបាត់ទៅហើយទើបមានការឆោឡោឡើង ហើយក៏បានរាយការណ៍ទៅសមត្ថកិច្ចឲ្យចុះទៅត្រួតពិនិត្យ។
តាមការធ្វើកោសល្យវិច័យបានឲ្យដឹងថា នេះគឺជាករណីធ្វើអត្តឃាតយ៉ាងពិតប្រាកដ ដោយមិនមានការពាក់ព័ន្ធទៅនឹងករណីឃាតកម្មណាមួយឡើយ។ បច្ចុប្បន្នក្រុមគ្រួសារបានទទួលយកសពពីសមត្ថកិច្ចដើម្បីរៀបចំធ្វើបុណ្យតាមប្រពៃណីហើយ៕
ភ្លើងប្រចណ្ឌឆេះងំជាងមួយឆ្នាំធ្វើឲ្យបុរសជាប្ដីដាច់ចិត្តសម្លាប់ខ្លួន(Update)
0 Comments