ភ្នំពេញ ៖ ឃាត់ខ្លួនជនសង្ស័យប្រុស/ស្រីចំនួន៧នាក់ ត្រូវបានកម្លាំងព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងព្រហ្មទណ្ឌខណ្ឌទួលគោក ស្រាវជ្រាវធ្វើការឃាត់ខ្លួនបានជាបន្តបន្ទាប់ ដែលការឃាត់ខ្លួនត្រូវបានប៉ូលិសបញ្ជាក់ថា ពាក់ព័ន្ធនឹងអំពើប្លន់យកម៉ូតូនៅខណ្ឌចំការមនកន្លងមក។
ប្រតិបត្តិការនេះធ្វើឡើងកាលពីវេលាម៉ោង០៩ព្រឹក ថ្ងៃទី២០ ខែធ្នូ ឆ្នាំ២០១៥ នៅចំណុចមជ្ឈមណ្ឌលម៉ុងឌីយ៉ាល់ ក្នុងសង្កាត់ផ្សារដើមគរ ខណ្ឌទួលគោក រាជធានីភ្នំពេញ ក្រោយពេលដែលពួកគេធ្វើសកម្មភាពវាយប្លន់យកម៉ូតូបានសម្រេចនៅចំណុចផ្លូវ១៧៣ កែងផ្លូវ២៧១ ក្នុងសង្កាត់ទំនប់ទឹក ខណ្ឌចំការមន។
ក្នុងការឃាត់ខ្លួនជនសង្ស័យទាំង៧នាក់ មានស្រីម្នាក់ នគរបាលដកហូតម៉ូតូបាន៣គ្រឿង ទី១-ម៉ាកនិច ពណ៌ត្រួយចេក ពាក់ស្លាកលេខភ្នំពេញ១cv-៧០៩៥។ ទី២-ម៉ាកសងសេ១២៥ ស៊េរីឆ្នាំ២០១០ ឡើងតែមស៊េរីឆ្នាំ២០១៥ ពណ៌ខ្មៅ ពាក់ស្លាកលេខភ្នំពេញ១ak-៩៤៣២ និង១គ្រឿងទៀត ជាមួយរបស់ជនរងគ្រោះម៉ាកសងសេ១២៥ ស៊េរីឆ្នាំ២០១៥ ពណ៌ខ្មៅ គ្មានស្លាកលេខ។
មន្ត្រីប៉ូលិសខណ្ឌទួលគោកបានឲ្យដឹងថា នៅវេលាម៉ោង១២និង២០នាទីយប់ ឈានចូលថ្ងៃទី២០ ខែធ្នូ ឆ្នាំ២០១៥នេះ មានជនសង្ស័យមួយក្រុមមានគ្នាប្រមាណ៦ ទៅ៧នាក់ បានធ្វើសកម្មភាព វាយប្លន់យកម៉ូតូ១គ្រឿងម៉ាកសងសេ១២៥ ស៊េរីឆ្នាំ២០១៥ ពណ៌ខ្មៅ គ្មានស្លាកលេខ ពីបុរសម្នាក់ដែលធ្វើដំណើរតាមបណ្ដោយផ្លូវ២៧១ ខណៈដល់ចំណុចកែងផ្លូវ២៧១ ក្នុងសង្កាត់ទំនប់ទឹក ខណ្ឌចំការមន ជនសង្ស័យធ្វើសកម្មភាពវាយ និងគប់ដុំថ្ម យកម៉ូតូពីជនរងគ្រោះបានសម្រេច។ លុះមកដល់ព្រឹកថ្ងៃកើតហេតុនេះ ក្រុមជនសង្ស័យទាំងនេះក៏ត្រូវបានកម្លាំងព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងព្រហ្មទណ្ឌខណ្ឌទួលគោក ស្រាវជ្រាវធ្វើការឃាត់ខ្លួនបានជាបន្តបន្ទាប់តែម្ដង។
បច្ចុប្បន្ន ជនសង្ស័យទាំង០៧នាក់ រួមទាំងវត្ថុតាង ត្រូវបាននគរបាលបញ្ជូនទៅឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌចំការមនដើម្បីចាត់ការតាមនីតិវិធី៕
ជនសង្ស័យ៧នាក់ ពាក់ព័ន្ធអំពើប្លន់យកម៉ូតូនៅខណ្ឌចំការមនត្រូវឃាត់ខ្លួន
0 Comments