ភ្នំពេញ ៖ លោកឧត្ដមសេនីយ៍ ហ៊ុន ម៉ាណែត នាយរងសេនាធិការចម្រុះ និងជាមេបញ្ជាការរងកងទ័ពជើងគោក កាលពីព្រឹកថ្ងៃទី២០ ខែធ្នូ ឆ្នាំ២០១៥ បានអញ្ជើញជាអធិបតីនៅក្នុងពិធីបើកវិញ្ញាសាប្រឡងជ្រើសរើសនាយទាហាន វគ្គនាយទាហានសកម្មជំនាន់ទី២០ នាយទាហានទ័ពជើងគោកជំនាន់ទី៨ និងនាយទាហានបន្តវេនជំនាន់ទី៩ នៅវិទ្យាល័យបាក់ទូក។
លោកឧត្ដមសេនីយ៍ ហ៊ុន ម៉ាណែត បានមានប្រសាសន៍ថា ការប្រឡងនេះបានប្រព្រឹត្តិទៅនៅ៥ មណ្ឌល គឺទី១-នៅរាជធានីភ្នំពេញ (វិទ្យាល័យបាក់ទូក) ទី២-ខេត្តស្ទឹងត្រែង ទី៣- ខេត្តសៀមរាប ទី៤-ខេត្តបាត់ដំបង និងទី៥-នៅខេត្តកំពត ហើយគោលបំណង នៃការប្រឡងនេះ គឺជ្រើសរើសបេក្ខជន ដែលមានលក្ខណៈសម្បត្តិ និងសមត្ថភាពគ្រប់គ្រាន់ ដើម្បីយកទៅបណ្ដុះបណ្ដាលបន្ថែមនៅក្នុងកម្មវិធីវគ្គបណ្ដុះបណ្ដាលនាយទាហានទាំង៣ខាងលើនេះ ដើម្បីក្លាយជានាយទាហានសម្រាប់ដឹកនាំកងទ័ពនាថ្ងៃអនាគត។
លោកបន្តថា សម្រាប់ឆ្នាំនេះ ឃើញមានបេក្ខជនកើនឡើងជាង៤៣ភាគរយ ប្រៀបនឹងឆ្នាំមុន ហើយនេះគឺជាមោទនភាពសម្រាប់កងយោធពលខេមរភូមិន្ទ ដែលទទួលបាននូវការចាប់អារម្មណ៍យ៉ាងច្រើនរបស់យុវជនយើងនៅក្នុងការចូលបម្រើនៅក្នុងជួរកងយោធពលខេមរភូមិន្ទ ក៏ដូចជាបម្រើជាតិ។
ឆ្លើយតបសំណួរអ្នកសារព័ត៌មាន ថាតើមានអ្វីដើម្បីបញ្ជាក់ថា ការប្រឡងនោះមានតម្លាភាពនិងយុត្តិធម៌ លោកឧត្ដមសេនីយ៍ ហ៊ុន ម៉ាណែត បានបញ្ជាក់ថា “សុក្រឹតភាព យុត្តិធម៌ និងប្រសិទ្ធភាពនៅក្នុងការប្រឡងនេះ គឺជាអ្វីដែលគណៈកម្មការចង់បាន ហើយការចាត់វិធានការនៅក្នុងការឆែកឆេរ និងត្រួតពិនិត្យ ទោះជានៅច្រកធំយើងមិនមានក៏ដោយ ប៉ុន្តែនៅតាមបន្ទប់នីមួយៗយើងបានចាត់វិធានការយ៉ាងតឹងរ៉ឹងក្នុងការត្រួតពិនិត្យ ហើយនៅក្នុងនោះ ក៏បានចាត់អនុរក្ស និងមេប្រយោគ ដើម្បីត្រួតពិនិត្យជាប្រចាំនៅតាមមណ្ឌលប្រឡងផងដែរ។ ដូច្នេះសុក្រឹតភាព និងភាពច្បាស់លាស់នៅក្នុងការប្រឡងនេះ គឺជាអ្វីដែលគណៈកម្មការរបស់យើងបានយកចិត្តទុកដាក់ពីមួយឆ្នាំទៅមួយឆ្នាំ ដើម្បីឲ្យប្អូនៗបានទទួលនូវយុត្តិធម៌ និងភាពត្រឹមត្រូវ គឺឲ្យអ្នកជាប់ គឺជាប់ដោយមោទនភាព ហើយអ្នកធ្លាក់ គឺធ្លាក់ដោយអស់ចិត្ត ហើយវិធានការនេះ មិនមែនធ្វើតែក្នុងពេលប្រឡើងទេ គឺបានតាំងពីមុនប្រឡង ដូចជានៅពេលដាក់ពាក្យ និងពេលកំណែជាដើម ហើយក្រៅពីនោះ បានសំណូមពរឲ្យមហាជន អាណាព្យាបាល ឲ្យចូលរួមនៅក្នុងការផ្តល់ព័ត៌មាន បើសិនជាមានបាតុភាពមិនប្រក្រតីណាមួយកើតឡើងផ្សេងៗ តាមរយៈទូរស័ព្ទ និងហ្វេសប៊ុកជាដើម”។
លោក ហ៊ុន ម៉ាណែត បានបញ្ជាក់ដែរថា កម្មវិធីបណ្ដុះបណ្ដាលទាំង៣នេះ មានសារៈសំខាន់ណាស់សម្រាប់យុវជនជានាយទាហាន ពីព្រោះអាជីពជាទាហាន ជាពិសេសជានាយទាហាន គឺមានសារៈសំខាន់ណាស់ ទី១-ការដឹកនាំដល់កងកម្លាំងផ្សេងៗទៀត ជាពិសេសពេលខ្លះយើងត្រូវប្រឈមនឹងភាពគ្រោះថ្នាក់ ហើយការដឹកនាំ ឬការសម្រេចមួយរបស់នាយទាហានអាចធ្វើឲ្យប៉ះពាល់ដល់អាយុជីវិតអ្នកដែលនៅក្រោមបង្គាប់ ដូច្នេះការធានានូវសមត្ថភាព ការធានានូវភាពច្បាស់លាស់ និងការទទួលខុសត្រូវជាអ្នកដឹកនាំ គឺជាការងារសំខាន់។ ហេតុនេះនៅក្នុងកម្មវិធីនាយទាហានមាន៣ប្រភេទនេះ គឺផ្តោតលើការបណ្តុះបណ្តាលចំនួន៣ ទី១-ផ្នែកជំនាញ ដែលមានជំនាញចំណេះដឹងទូទៅ ចំណេះដឹងសង្គម និងវិទ្យាសាស្ត្រយោធា។ ទី២-កាយសម្បទារ និងស្មារតីក្នុងការបំពេញភារកិច្ចផ្សេងៗ និងទី៣-ភាពជាអ្នកដឹកនាំ ហើយនិស្សិតនាយទាហានទាំងអស់ដែលបានចូលនៅក្នុងវគ្គហ្វឹកហ្វឺននេះ គឺត្រូវទទួលបានឧកាសក្នុងការបណ្ដុះបណ្ដាលផ្នែកវិន័យ សណ្ដាប់ធ្នាប់ ការលត់ដំខ្លួន និងការគ្រប់គ្រងខ្លួន ព្រមទាំងឱកាសនៅក្នុងការដឹកនាំអ្នកដទៃ បន្ទាប់ពីប្អូនចូលរៀនបានរយៈពេល៤ឆ្នាំ នឹងមានឧកាសក្លាយទៅជាអ្នកដឹកនាំខ្លួនឯង និងត្រៀមលក្ខណៈ ដើម្បីដឹកនាំកងទ័ព។ ទាំងអស់នេះ គឺជាលក្ខណៈពិសេសនៅក្នុងការបណ្តុះបណ្តាល ហើយគណៈកម្មការ នឹងព្យាយាមធ្វើយ៉ាងណាឲ្យមហាជន ជាពិសេសយុវជន បានជ្រាបពីព័ត៌មាន ដើម្បីធ្វើការសម្រេចចិត្ត។
សូមបញ្ជាក់ថា បេក្ខជនដាក់ពាក្យប្រឡងទូទាំងប្រទេសមានចំនួន៣.៣០៤នាក់ ស្ត្រី១.១៦៥ នាក់ ក្នុងនោះនាយទាហានសកម្មជំនាន់ទី២០ មានចំនួន១២០នាក់ នាយទាហានទ័ពជើងគោកជំនាន់ទី៨ មានចំនួន២៥០នាក់ និងនាយទាហានបន្តវេនជំនាន់ទី៩ មានចំនួន២៥០នាក់៕
លោក ហ៊ុន ម៉ាណែត អញ្ជើញបើកវិញ្ញាសាប្រឡងជ្រើសរើសនាយទាហានសកម្មជំនាន់ទី២០
0 Comments