ភ្នំពេញ ៖ សពបុរសជនជាតិកូរ៉េ ត្រូវបានគេប្រទះឃើញស្លាប់ ដោយចងក សម្លាប់ខ្លួនឯង បង្កឲ្យមានការភ្ញាក់ផ្អើលកាលពីវេលាម៉ោង ២០យប់នាថ្ងៃទី១៧ ខែធ្នូ ឆ្នាំ២០១៥ នៅចំណុចអគារផ្ទះល្វែងលេខE12 នៃបុរីគុម៉ល ដែលមានទីតាំងនៅភូមិដីថ្មី សង្កាត់ភ្នំពេញថ្មី ខណ្ឌសែនសុខ។
សពត្រូវបានគេស្គាល់ឈ្មោះ ណាម ភេទប្រុសអាយុ៥០ឆ្នាំ ជនជាតិកូរ៉េ មុខរបរថៅកែទំនិញ ស្នាក់នៅផ្ទះកើតហេតុខាងលើ។
តាមសំដីរបស់សាក្សី ម្នាក់ឈ្មោះធឿន សារ៉ាក់ ភេទប្រុសអាយុ៤០ឆ្នាំ ជាអ្នកស្នាក់នៅក្នុងផ្ទះជាមួយសពរងគ្រោះបាននិយាយបំភ្លឺប្រាប់សមត្ថកិច្ចមូលដ្ឋានថា នៅថ្ងៃកើតហេតុ គាត់បានឃើញជនរងគ្រោះ(សព)ស្នាក់នៅក្នុងបន្ទប់ រហូតតាំងពីព្រឹកមិនឃើញចេញមកក្រៅសោះ លុះពេលឲ្យប្អូនស្រីគាត់ទៅគោះទ្វារដាស់ហៅអោយហូបបាយ តែមិនឮសំឡេងឆ្លើយតប សោះក៏បើកទ្វារចូលទៅមើលស្រាប់តែប្រទះឃើញ គាត់(សព) ស្លាប់ដោយចងកសម្លាប់ខ្លួនឯងបាត់ទៅហើយ ដោយពុំដឹងមូលហេតុច្បាស់លាស់។
ក្រោយកើតហេតុ សមត្ថកិច្ចមូលដ្ឋាន មានប៉ូលិស ប៉េអឹម មកត្រួតពិនិត្យសាកសព ខ្លាចក្រែងវាជារឿងឃាតកម្មសម្លាប់រួចយកមកចងកព្យួរបន្លំភ្នែក ប៉ុន្តែក្រោយធ្វើកោសល្យវិច័យ រួចរកឃើញថា សាកសពពិតជាចងកធ្វើអត្តឃាត ដោយខ្លួនឯងមែន។
សាកសពត្រូវបានប្រគល់ឲ្យក្រុមគ្រួសារ និងតាមរយៈស្ថានទូតកូរ៉េយកទៅធ្វើបុណ្យតាមប្រពៃណីជាតិរបស់ខ្លួន៕
បុរសជនជាតិកូរ៉េម្នាក់ ធ្វើអត្តឃាត ដោយចងកសម្លាប់ខ្លួនឯង គ្មានអ្នកដឹងមូលហេតុ
0 Comments