បរិវត្តន៍​ដីធ្លី គំរាមកំហែង​ដល់​ព្រៃកោងកាង​នៃ​តំបន់​អាស៊ីអាគ្នេយ៍

ការធ្វើ​បរិ​វត្ដ​ន៍​ផ្លាស់ប្ដូរ​នៃ​ព្រៃ​កោងកាង​សម្រាប់​ការប្រើប្រាស់​ផ្សេងៗ​ទៀត​នោះ ​បាន​បង្ក​ឲ្យ​មានការ​គំរាមកំហែង​យ៉ាង​ធំ​មួយ ចំពោះ​ការ​មានព្រៃ​ប្រភេទ​នេះ នៅ​អាស៊ីអាគ្នេយ៍​។ នេះ​បើ​យោងតាម​ការសិក្សា​ស្រាវជ្រាវ​មួយ​ធ្វើឡើង​ដោយ​សាកលវិទ្យាល័យ​ជាតិ​សិង្ហ​បុរី (NUS)​។​

​ ​

នៅក្នុង​សេចក្ដីប្រកាស​ព័ត៌មាន​មួយ កាលពី​ថ្ងៃ​អង្គារ ទី ៥ ខែមករា NUS បាន​និយាយថា នៅពេលដែល​អត្រា​នៃ​ការរានដី​ព្រៃ​ទាប​ជាង​ការ​គិតពី​ពេលមុន ដែលមាន​ត្រឹមតែ ២ ភាគរយ ផ្ទៃដី​ព្រៃ​ជាង​១០០.០០០ ហិកតា​នៃ​ព្រៃកោងកាង​ក្នុង​តំបន់​ត្រូវ​រង​ការកាប់​ឆ្ការ​ចោល ពី​ឆ្នាំ ២០០០ ដល់ ២០១២។

​ ​

ការសិក្សា​ស្រាវជ្រាវ​នេះ​ត្រូវ​បានទទួល​ការអនុញ្ញាត ដោយ​សាស្ត្រាចារ្យ​ជំនួយ លោក Daniel Friess មកពី​ទីស្ដីការ​ទទួលបន្ទុក​ផ្នែក​ភូមិសាស្ដ្រ និង លោក​បណ្ឌិត Dr. Daniel Richards ដែល​មកពី​ទីស្ដីការ​នៃ​ស្ថាប័ន​តែមួយ​នេះ​ផងដែរ​។ លោក Dr. Richard នៅពេលនេះ កំពុង​ស្ថិតនៅ​ជាមួយ​ទីស្ដីការ Department of Animal and Plant Seiences នៅ​សាកលវិទ្យាល័យ University of Sheffield​។​

​ ​

យោងតាម​ការសិក្សា​ស្រាវជ្រាវ​នេះ​បានឲ្យដឹងថា តំបន់​អាស៊ីអាគ្នេយ៍​មាន​ប្រភេទ​ព្រៃកោងកាង​ចម្រុះ​នៅក្នុង​ពិភពលោក ដែល​ប្រភេទ​ដើមឈើ​មាន​កំហាប់​កាបូន​ដ៏​ខ្ពស់បំផុត​។​

​ ​

បើតាម​ការលើកឡើង នៅក្នុង​សេចក្ដីប្រកាស​ព័ត៌មាន​នោះបាន​ឲ្យ​ដឹងថា ព្រៃកោងកាង​ដើរតួ​យ៉ាងសំខាន់ ក្នុងការ​បន្ធូរ​ការ​សាយ​ភាយ​កាបូនឌីអុកស៊ីត និង​បម្រែបម្រួល​អាកាសធាតុ​។​

​ ​

បើទោះជា​ការរាន​ព្រៃ​នោះ​ទាប​ជាង​ការរំពឹងទុក​មក​ក្ដី ក៏​ក្រុម​អ្នកស្រាវជ្រាវ​បាន​រកឃើញថា ការ​ពន្លាត​ផ្ទៃដី​កសិកម្ម​សម្រាប់​ដំណាំ​ស្រូវ នៅ​ប្រទេស​មី​យ៉ាន់​ម៉ា និង​ការធ្វើ​បរិ​វត្ដ​ន៍​ព្រៃកោងកាង​មក​ធ្វើជា​ការដាំដុះ​ដូងប្រេង នៅ​ម៉ាឡេស៊ី និង​ឥណ្ឌូនេស៊ី កំពុងតែ​ស្ថិតនៅក្នុង​ភាព​គំរាមកំហែង ជាមួយនឹង​ការ​គំរាម​ដល់​វត្ដ​មាននៃ​ប្រព័ន្ធ​អេកូឡូស៊ី​របស់​ដើម​កោងកាង នៅ​ក្នុង​តំបន់​ទៀត​ផង៕

CNA

​

បរិវត្តន៍​ដីធ្លី គំរាមកំហែង​ដល់​ព្រៃកោងកាង​នៃ​តំបន់​អាស៊ីអាគ្នេយ៍