លោក ZinedineZidane អាចប្រឈមនឹងការងារប្រកួតប្រជែងដ៏សំខាន់បំផុតមួយ ក្រោយពេល ដែលលោកទទួលយកការងារគ្រូបង្វឹករបស់ក្រុម Real Madrid កាលពីថ្ងៃចន្ទមុននេះ។
សូមបញ្ជាក់ថា គ្រូបង្វឹក ដែលពោពេញដោយការរិះគន់ពីសំណាក់អ្នកគាំទ្រ និងកីឡាករមួយចំនួនក្នុងក្រុម គឺ លោក Rafael Benitez ត្រូវបានបណ្ដេញចេញពីតំណែងគ្រូបង្វឹក Real Madrid ហើយ ក្រោយពីបានដឹកនាំក្រុមទើបតែបាន ៧ ខែ។ សេចក្តីប្រកាសនេះត្រូវបានធ្វើឡើង ជាផ្លូវការពីសំណាក់ប្រធានក្លិបគឺ លោក Florentino Perez កាលពីថ្ងៃចន្ទ បន្ទាប់ពីទាត់ស្មើ ២-២ ជាមួយក្រុមម្ចាស់ផ្ទះ Valencia កាលពីចុងសប្ដាហ៍កន្លងទៅ ពោលគឺគេសរុបទាំងបរាជ័យ ០-៤ ក្នុងជំនួប El Clasico កាលពីខែវិច្ឆិកាកន្លងទៅ ជាមួយក្រុម Barcelona។
អតីតវីរបុរសបាល់ទាត់បារាំង លោក Zindine Zidane ដែលធ្លាប់ជាអតីតជំនួយការលោកគ្រូបង្វឹក Carlo Ancelotti កាលពីឆ្នាំ ២០១៤ ស្រាប់នោះ បានបង្ហាញពីអារម្មណ៍ក្តុកក្តួលរំភើបចំពោះតំណែងនេះ ពីព្រោះវាជាបទពិសោធន៍ដឹកនាំក្លិបអាជីពធំបំផុត និងដំបូងបំផុត បន្ទាប់ពីធ្លាប់ជាកីឡាករជោគជ័យម្នាក់ដែរ នៅក្លិប Real Madrid ដែលបានបញ្ចប់ទៅ នៅឆ្នាំ ២០០៦។
គួរឲ្យដឹងថា ក្រោមការដឹកនាំរបស់ Rafael Benitez រដូវកាលនេះ ក្រោយលេងបាន ១៨ ប្រកួត ក្រុម Real Madrid ឈរនៅលេខ ៣ មាន ៣៧ ពិន្ទុតាមពីក្រោយក្រុមលេខ ២ Barcelona ២ ពិន្ទុ និងតាមពីក្រោយក្រុមលេ ខ១ Atletico Madrid ៤ពិន្ទុ។
ទោះបីជាយ៉ាងណាក៏ដោយ ក្រុម Real Madrid រកបានជ័យជម្នះ ៧ លើកក្នុងចំណោម ៩ ប្រកួតចុងក្រោយរបស់ខ្លួន តែក្រុមអ្នកគាំទ្រហាក់មិនពេញចិត្តនឹងរបៀបដឹកនាំរបស់គ្រូបង្វឹកសញ្ជាតិអេស្ប៉ាញរូបនេះឡើយ ហើយតែងតែបង្ហាញពាក្យរិះគន់អំឡុងការប្រកួតនីមួយៗរបស់ Real Madrid។ ការប្រកួតបន្ទាប់របស់ក្រុម Real Madrid នៅ La Liga នឹងត្រូវស្វាគមន៍ ក្រុមភ្ញៀវ Deportivo La Coruna នាចុងសប្ដាហ៍នេះ។
អាជីពរបស់ លោក Zidane ទទួលបានចំណាប់អារម្មណ៍ច្រើននឹងជំនាញលេងបាល់នៅលើទីលានប្រកួតរបស់គាត់ ពោលគឺការគ្រប់គ្រងបាល់ដ៏ស្ទាត់ជំនាញរបស់លោកនេះតែម្តង ប៉ុន្តែលោកក៏ធ្លាប់អាប់ឱនកេរ្តិ៍ឈ្មោះម្តងដែរ សម្រាប់ការយកក្បាលទៅអុកខ្សែការពាររបស់ក្រុមជម្រើសជាតិអ៊ីតាលី គឺកីឡាករ Marco Materazzi នៅវគ្គផ្តាច់ព្រ័ត្រ World Cup ឆ្នាំ២០០៦ ដែលជាការប្រកួតចុងក្រោយ នៅក្រុមជម្រើសជាតិបាល់ទាត់របស់គាត់ និងជាហេតុការណ៍មួយធ្វើឲ្យពិភពលោកភ្ញាក់ផ្អើលផងដែរ។ លោកបានយកក្បាលអុកចំដើមទ្រូងរបស់កីឡាករ Materazzi នៅម៉ោងបន្ថែម ហើយធ្វើឲ្យលោកទទួលបានកាតក្រហមផងដែរ តែលោកបានអះអាងថា មូលហេតុ ដែលលោកធ្វើបែបនេះ គឺដោយសារតែ Materazzi និយាយដៀលត្មះថា ប្អូនស្រីរបស់លោកគឺជាស្រីពេស្យាចារ ហើយអ្វីដែលប៉ះពាល់បំផុតដល់ការប្រកួតរបស់ក្រុមជម្រើសជាតិបារាំងនោះ គឺធ្វើឲ្យពួកគេទទួលរងបរាជ័យ នៅការប្រកួតមួយនេះ ដោយការស៊ុតបាល់ប៉េណាល់ទីកាត់សេចក្តី។
លោក Zidane ធ្លាប់លេងបាន ៥ រដូវកាលផងដែរជាមួយក្លិប Real Madrid ដោយបានជួយឲ្យក្លិបមួយនេះ ឈ្នះជើងឯក Champions League នៅឆ្នាំ ២០០២ និងជើងឯកបាល់ទាត់អេស្ប៉ាញឆ្នាំ ២០០៣ ស្ថិតនៅក្នុងចំណោមជើងឯកជាច្រើនទៀត៕
លោក ZinedineZidane ទទួលបានការតែងតាំងជាគ្រូបង្វឹកថ្មីរបស់ក្រុម Real Madrid
0 Comments