បាត់ដំបង ៖ សត្វគោចំនួន ៣ ក្បាល បានដួលងាប់ភ្លាមៗនៅក្បែរបង្គោលអគ្គិសនីដោយមិនដឹងមូលហេតុ ខណៈដែលមេឃកំពុងមានធ្លាក់ភ្លៀង ដែលនៅពេលនេះខាងជំនាញបច្ចេកទេសអគ្គិសនី កំពុងចុះសិក្សានៅត្រង់ចំណុចកើតហេតុ ដើម្បីចង់ដឹងថា តើសត្វគោទាំងនេះងាប់ដោយសារគ្រោះធម្មជាតិ ឬក៏ងាប់ដោយសារចរន្តឆក់។
ហេតុការណ៍ដែលធ្វើអោយមានការភ្ញាក់ផ្អើលនេះ បានកើតឡើងនៅវេលាម៉ោង ៤ និង ២៥ នាទីល្ងាច ថ្ងៃទី២៦ ខែឧសភា ឆ្នាំ២០១៨ នៅត្រង់ចំណុច ភូមិស្រះទឹកថ្មី ឃុំតាក្រី ស្រុកកំរៀង ខេត្តបាត់ដំបង លើកំណាត់ផ្លូវលំមួយខ្សែ ត្រង់បង្គោលភ្លើងដែលមានប្រអប់លេខសម្គាល់ ៥៩៤។
យោងតាមរបាយការណ៍របស់សមត្ថកិច្ចបានអោយដឹងថា នៅពេលកើតហេតុនោះគឺមេឃកំពុងធ្លាក់ភ្លៀង ក៏ស្រាប់តែមានសត្វគោ ៣ ក្បាល បានដួលងាប់នៅក្បែរបង្គោលភ្លើងនោះ ដោយមិនដឹងមូលហេតុ រហូតធ្វើអោយមានការព្រួយបារម្ភយ៉ាងខ្លាំងពីសំណាក់ប្រជាពលរដ្ឋដែលរស់នៅក្នុងតំបន់នោះ អំពីការឆ្លងចរន្តអគ្គីសនី។
ប្រភពមួយចំនួនបាននិយាយថា កន្លងមកគេមិនដែលឃើញមានបញ្ហាអ្វីទាល់តែសោះនៅក្នុងតំបន់នេះ ប៉ុន្តែស្រាប់តែម្សិលមិញក៏កើតមានរឿងបែបនេះទៅវិញ ដោយមិនដឹងថាមូលហេតុអ្វីបានជាធ្វើអោយសត្វគោទាំង ៣ ក្បាល ដួលងាប់ស្រស់ៗយ៉ាងនេះ តែបើរន្ទះបាញ់ក៏គួរតែឮសំឡេងបាញ់ដែរ តែនេះគ្មានឮអ្វីទាំងអស់។
ជុំវិញបញ្ហានេះដែរ នៅព្រឹកថ្ងៃទី២៧ លោក សុខ ហួត ប្រធានអង្គភាពអគ្គិសនីខេត្តបាត់ដំបង បានមានប្រសាសន៍លើកឡើងថា ការងាប់របស់សត្វគោគឺនៅចំពីក្រោម «ត្រង់ស្វូ» ដែលមានថាមពល ២២០ គីឡូវ៉ុល ដែលជាគន្លងបញ្ជូនរងតង់ស្យុងមធ្យម ហើយបើមេឃមានភ្លៀងធ្លាក់ គឺវាមានគន្លងដែនឆក់ចាប់ពី ១,៥០ ម៉ែត្រ ទៅ ២ ម៉ែត្រជុំវិញ ប៉ុន្តែបើទោះបីជាសត្វគោទាំង ៣ ក្បាលនេះ ដើរពីក្រោមត្រង់ស្វូក៏ដោយក៏គន្លងដែនឆក់មិនអាចស្រូបមកដល់ដីដែរ។
បច្ចុប្បន្នលោកបានដាក់កម្លាំងជំនាញបច្ចេកទេស អោយចុះទៅសិក្សា និងវាល់មើលថា តើការងាប់របស់សត្វគោបណ្តាលមកពីអ្វី មកពីបញ្ហាបច្ចេកទេសអគ្គីសនី ឬក៏មកពីគ្រោះធម្មជាតិ ឬក៏មកពីកត្តាផ្សេងៗ?។
ជាចុងក្រោយ លោក សុខ ហួត បានសំណូមពរដល់ប្រជាពលរដ្ឋទាំងអស់មេត្តាប្រុងប្រយ័ត្ន ដោយសុំអោយនៅឆ្ងាយពីឧបករណ៍បរិក្ខារអគ្គិសនី ដែលកំពុងដំណើរការពេលមេឃមានភ្លៀងធ្លាក់ ព្រោះឧបករណ៍ទាំងនេះសុទ្ធតែមានសម្ភារៈការពាររន្ទះទាំងអស់ ដូច្នេះវាអាចស្រូបយកចរន្តឆ្លងពីធម្មជាតិចូលទៅក្នុងដី គឺវាអាចប៉ះពាល់ដល់អ្នកដែលធ្វើដំណើរក្បែរឧបករណ៍ និងបរិក្ខារទាំងនេះ៕
Source: Kampuchea Thmey Daily
0 Comments