ភ្នំពេញ ៖ បន្ទប់ជួលចំនួន ៥ ស្ថិតនៅក្នុងភូមិត្នោតជ្រុំ៦ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ ត្រូវបានឆេះបំផ្លាញដោយអគ្គីភ័យ កាលពីវេលាម៉ោង ៨ និង ១៥ នាទីយប់ ថ្ងៃទី២៦ ខែឧសភា ដែលសមត្ថកិច្ចអះអាងថាទុះស្សេខ្សែភ្លើង។
ប្រភពពីសាក្សីបានឲ្យសមត្ថកិច្ចដឹងថា អណ្តាតភ្លើងបានចាប់ផ្តើមឡើងពីបន្ទប់ជួលទី២ ក្នុងចំណោមបន្ទប់ជួលទាំង៥ ខណៈពេលដែលម្ចាស់បន្ទប់បានចាក់សោររួចចេញទៅក្រៅ ដោយពុំបានបិទបារ៉ែតភ្លើងបង្កឲ្យមានអគ្គិភ័យឆាបឆេះឡើងតែម្តង។
ទាក់ទិនទៅនឹងអគ្គិភ័យខាងលើនេះ លោក ពេជ្រ កែវមុនី អភិបាលនៃគណៈអភិបាលខណ្ឌមានជ័យ ដែលបានដឹកនាំកម្លាំងចម្រុះចុះទៅអន្តរាគមន៍ផ្ទាល់ដល់ទីតាំងកើតហេតុបានមានប្រសាសន៍ថា បន្ទាប់ពីមានហេតុការណ៍នេះកើតឡើង លោកបានដឹកនាំកម្លាំងចុះទៅទីតាំងឆេះ ដោយសុំការអន្តរាគមន៍ពីរថយន្តពន្លត់អគ្គិភ័យរបស់សមត្ថកិច្ចមកជួយបាញ់ពន្លត់ ហើយក្នុងនោះកម្លាំងមួយចំនួនចុះរៀបចំសម្រួលចរាចរណ៍ ដើម្បីឲ្យរថយន្តពន្លត់អគ្គិភ័យចូលមកដល់ទីតាំងឆេះបានទាន់ពេល។
ចំពោះហេតុការណ៍អគ្គិភ័យឆាបឆេះនេះ ពុំបានរាលដាលដល់លំនៅឋានរបស់ប្រជាពលរដ្ឋនៅក្បែរខាងឡើយ ហើយទំហំនៃការខូចខាតគឺមានសម្ភារៈនៅក្នុងបន្ទប់ជួលទាំង ៥ ប៉ុន្តែពុំបង្កឲ្យមានប៉ះពាល់ដល់អាយុជីវិតបងប្អូនប្រជាពលរដ្ឋណាម្នាក់ឡើយ។
ក្នុងឱកាសនោះ លោក ពេជ្រ កែវមុនី បានសំដែងការអរគុណដល់កម្លាំងមានសមត្ថកិច្ច និងមានការចូលរួមពីបងប្អូនប្រជាពលរដ្ឋ ដែលបានសហការគ្នាជួយទាញទុយយោទឹកពីរថយន្តពន្លត់អគ្គិភ័យជាមួយសមត្ថកិច្ច ទើបធ្វើឲ្យអគ្គីភ័យបានរលត់ទៅវិញអស់ ដោយចំណាយទឹកអស់ប្រមាណ ៩ រថយន្ត។ ចំពោះហេតុការណ៍នេះ សមត្ថកិច្ចជំនាញបានអះអាងថា ដោយសារទុស្សេខ្សែភ្លើងនៅពេលម្ចាស់បន្ទប់ជួលចេញទៅក្រៅ ដោយមិនបានបិទបារ៉ែតភ្លើង៕Source: Kampuchea Thmey Daily
0 Comments