ភ្នំពេញ ៖ កីឡាករជើងខ្លាំង សួន ចាន់នី អ្នកប្រដាល់របស់ក្លិបបក្សីស្លាបដែក ឡើងតតាំងនឹងកីឡាករឡាវ ថៃម៉ៃសុត ប៉េឡេបុរីរាំ ខណៈកីឡាករ វៀត ប៊ុនឌឿន អ្នកប្រដាល់នៃសមាគមកីឡាប្រដាល់ក្រសួងការពារជាតិ ត្រូវជួបជាមួយកីឡាករ សេនាណយ ស៊ីត.ក ដើម្បីសាកស្នៀតគុនក្នុងលក្ខណៈមិត្តភាពអន្តរជាតិ លើសង្វៀនម៉ាយធីវី នារាត្រីថ្ងៃសុក្រ ទី០១ ខែមិថុនា ឆ្នាំ ២០១៨ នេះ។
កីឡាករ សួន ប៊ុនធី ត្រូវជួបជាមួយកីឡាករថៃឈ្មោះ ម៉ៃសុត ប៉េឡេបុរីរាំ ក្នុងប្រភេទទម្ងន់ ៦០ គីឡូក្រាម អ្នកទាំងពីរមិនធ្លាប់ជួបគ្នាទេកន្លងមក កីឡាករថៃម្នាក់នេះធ្លាប់មកប្រកួតនៅស្រុកខ្មែរជាច្រើនលើក ស្នៀតប្រយុទ្ធរបស់គេមិនធម្មតាឡើយ ដោយធ្លាប់យកឈ្នះលើជើងខ្លាំងកម្ពុជាជាច្រើននាក់ ហើយត្រូវជួបជាមួយកីឡាករកម្ពុជា សួន ចាន់នី ដែលបច្ចុប្បន្នគេជាកីឡាករជើងខ្លាំង ឡើងប្រកួតជាមួយកីឡាករថៃជាង ១០ លើកចុងក្រោយ មិនស្គាល់ពាក្យថាចាញ់ និងស្មើឡើយ ដូចនេះពួកគេទាំងពីរជួបគ្នាច្បាស់ជាគូជក់ចិត្តមិនខាន។
មួយរយៈចុងក្រោយនេះ ក្នុងពិភពប្រដាល់គ្មានអ្នកណាមិនស្គាល់ស្នាដៃ និងកេរ្តិ៍ឈ្មោះរបស់កីឡាករ សួន ចាន់នី នោះឡើយ សមត្ថភាពរបស់គេដូចកីឡាកររៀមច្បងដែលល្បីកន្លងមកហើយ។ ជាក់ស្ដែងនៅលើសង្វៀនស្ទើរគ្រប់ប៉ុស្តិ៍ សួន ចាន់នី បានឡើងប្រកួតឈានមកដល់គូឯក ហើយមិនដែលលក់តម្លៃខ្លួនក្នុងការប្រកួតទេកន្លងមកនោះទេ។ ស្របគ្នាដែលកីឡាករ សួន ចាន់នី ឡើងរេញពេលណាក៏បានបង្ហាញភាពខ្លាំង ហើយដណ្ដើមបានជ័យជម្នះលើគូប្រកួតជាច្រើនផងនោះ ទើបកាន់តែធ្វើឲ្យកីឡាកររូបនេះ ជាប់ឈ្មោះក្នុងបញ្ជីអ្នកខ្លាំងស្រករក្រោយជាច្រើនផងដែរ។
អ្នកប្រដាល់មានដៃវែងជើងវែង សួន ចាន់នី ជាអ្នកប្រដាល់ជើងខ្លាំងទម្ងន់មធ្យមប្រចាំកម្ពុជាម្នាក់នាពេលបច្ចុប្បន្ន ដែលធ្លាប់ប្រកួតជាមួយអ្នកប្រដាល់បរទេសជាច្រើននាក់មកហើយ គឺឈ្នះច្រើនជាងចាញ់ ព្រោះស្នៀតក្បាច់គុនខ្មែរបុរាណរបស់គេខ្លាំងទាំងព្រមតែម្តង ហើយវាយមិនមានអំនួត និងមិនខ្លាចគូរប្រកួតណាម្នាក់នោះទេ។ ចាំមើលកីឡាករ សួន ចាន់នី ជាអ្នកឈ្នះ ឬកីឡាករថៃឈ្មោះ ម៉ៃសុត ប៉េឡេបុរីរាំ?។
ដោយឡែកកីឡាករ វៀត ប៊ុនឌឿន ត្រូវជួបជាមួយកីឡាករថៃ សេនាណយ ស៊ីត.ក អ្នកទាំងពីរមិនធ្លាប់ជួបគ្នាទេកន្លង តាមអ្នកផ្គូផ្គងអះអាងថា កីឡាករថៃម្នាក់នេះជាអ្នកប្រដាល់ជើងខ្លាំងនៅប្រទេសថៃ ស្នៀតខ្លាំងរបស់គេគឺជើងទាត់ ជង្គង់ ចំណែកស្នៀតកណ្តាប់ដៃ និងកែងក៏គេអាចប្រើបានដែរតែមិនខ្លាំងប៉ុន្មាននោះទេ។
ចំណែកកីឡាករ វៀត ប៊ុនឌឿន គេល្អកណ្តាប់ដៃ និងជើងទាត់ មួយរយៈចុងក្រោយនេះគេហាក់ដូចជាឆាប់ស្រុតចុះកម្លាំងស៊ុហ្វក៏ពិតមែន តែស្នៀតប្រយុទ្ធ និងកលល្បិចរបស់គេល្អណាស់។ គេចូលចិត្តប្រើពេលខ្លីដើម្បីផ្តួលគូប្រកួត ហើយការសម្រុករបស់គេមួយប្រាវបើគូប្រកួតទប់បាន គឺច្បាស់ជាយ៉ាប់របស់គេវិញមិនខាន តែយ៉ាងណាបន្ទាប់ពីបាត់មុខមួយរយៈខ្លីមក វៀត ប៊ុនឌឿន នៅប្រើល្បិចកលដូចទៀតឬយ៉ាងណា?។ ចាំមើល វៀត ប៊ុនឌឿន ជាអ្នកឈ្នះ ឬកីឡាករថៃ សេនាណយ ស៊ីត.ក?៕
Source: Kampuchea Thmey Daily
0 Comments