មន្ដ្រីជាន់ខ្ពស់កូរ៉េខាងជើងម្នាក់កាលពីថ្ងៃពុធ កំពុងធ្វើដំណើរទៅទីក្រុងញូវយ៉កសម្រាប់កិច្ចចរចាថ្នាក់ខ្ពស់ជាមួយមន្ត្រីអាមេរិកដើម្បីត្រៀមរៀបចំសម្រាប់កិច្ចប្រជុំកំពូលនុយក្លេអ៊ែរជាប្រវត្តិសាស្ត្ររវាងលោក ដូណាល់ ត្រាំ និងលោក គីម ជុងអ៊ុន។
ក្រុមមន្ត្រីបាននិយាយថា លោកឧត្តមសេនីយ៍ Kim Yong Chol ដែលជាអនុប្រធាននៃគណៈកម្មាធិការកណ្តាលបក្សពលករនិងជាដៃស្តាំរបស់លោកគីមនឹងជួបជាមួយរដ្ឋមន្ត្រីការបរទេសអាមេរិកលោក Mike Pompeo នៅទីក្រុងញូវយ៉ក។
នៅក្នុងការបង្ហោះ Twitter លោក ត្រាំ បានបញ្ជាក់ថា ឧត្តមសេនីយ៍រូបនេះកំពុងធ្វើដំណើរហើយបានអួតអាងថា ក្រុងវ៉ាស៊ីនតោននឹងមាន “ក្រុមការងារដ៏អស្ចារ្យ” មួយសម្រាប់កិច្ចចរចាស្តីពីការដោះស្រាយភាពតានតឹងនុយក្លេអ៊ែររវាងគូសត្រូវចាស់ទាំងពីរ។ ប្រធានាធិបតីរូបនេះនៅតែមានក្តីសង្ឃឹមថា កិច្ចប្រជុំនេះនឹងប្រព្រឹត្តទៅនៅថ្ងៃទី១២ខែមិថុនាក្នុងប្រទេសសិង្ហបុរី។
អ្នកនាំពាក្យសេតវិមានលោកស្រី Sarah Sanders បាននិយាយថា លោក ត្រាំ ក៏នឹងជួបជាមួយនាយករដ្ឋមន្ត្រីជប៉ុនលោក ស៊ីនហ្សូ អាបេ ផងដែរក្នុងទីក្រុងវ៉ាស៊ីនតោននៅថ្ងៃទី៧ខែមិថុនា។
យោងតាមអ្នកកាសែត AFP បានឲ្យដឹងថា បេសកជនកូរ៉េខាងជើងបានស្ថិតនៅអាកាសយានដ្ឋានក្រុងប៉េកាំងកាលពីថ្ងៃពុធសម្រាប់ជើងហោះហើររបស់គាត់ទៅកាន់ទីក្រុងញូវយ៉ក។
អ្នកនាំពាក្យរបស់លោក Pompeo បាននិយាយថា វានឹងក្លាយជាកិច្ចប្រជុំលើកទី៣រវាងលោក Pompeo ជាមួយនឹងឧត្តមសេនីយ៍ Kim។ លោក Pompeo បានបើកទំនាក់ទំនងជាមួយរបបក្រុងព្យុងយ៉ាងនៅពេលគាត់កាន់តំណែងជានាយក CIA។
ដំណើរនេះគឺជាផ្នែកមួយនៃការរីកចម្រើនផ្នែកការទូតមុនពេលកិច្ចប្រជុំកំពូលមកដល់។
កាលពីថ្ងៃអាទិត្យ ក្រុមអ្នកចរចាអាមេរិកដែលដឹកនាំដោយឯកអគ្គរដ្ឋទូតរបស់ទីក្រុងវ៉ាស៊ីនតោនប្រចាំប្រទេសហ្វីលីពីនលោក Sung Kim បានចាប់ផ្តើមប្រជុំជាមួយសមភាគីកូរ៉េខាងជើងនៅក្នុងភូមិបទឈប់បាញ់ Panmunjom ដែលបែងចែកកូរ៉េទាំងពីរ។
លោកស្រី Sanders បាននិយាយថា “ពួកគេគ្រោងនឹងប្រជុំគ្នាបន្ថែមទៀតនៅសប្តាហ៍នេះ”។
លោក Chung Sung-yoon អ្នកវិភាគនៅវិទ្យាស្ថានបង្រួបបង្រួមជាតិកូរ៉េបាននិយាយថា លោក Kim Yong Chol នឹងក្លាយជាមន្ត្រីជាន់ខ្ពស់បំផុតរបស់កូរ៉េខាងជើងដែលបានបោះជំហានចូលទៅក្នុងទឹកដីសហរដ្ឋអាមេរិកចាប់តាំងពីអនុប្រធានទីមួយនៃគណៈកម្មាធិការការពារជាតិកូរ៉េខាងជើងលោក Jo Myong Rok បានជួបលោកប្រធានាធិបតី ប៊ីល គ្លីនតុន ក្នុងឆ្នាំ២០០០៕ AFP
Source: Kampuchea Thmey Daily
0 Comments