ត្បូងឃ្មុំ៖ នៅទូទាំង ៧ ស្រុក/ក្រុង ក្នុងខេត្តត្បូងឃ្មុំ នៅដើមរដូវវស្សានេះ កសិករបាននាំគ្នាបង្កបង្កើនផលស្រូវរដូវវស្សាបានជិត ៦០ ភាគរយនៃផែនការដាំដុះ ដោយសារមានអំណោយផលល្អពីធម្មជាតិ (ភ្លៀងធ្លាក់គ្រប់គ្រាន់) ។
លោក ហេង ពិសិដ្ឋ ប្រធានមន្ទីរកសិកម្មខេត្ត បានបញ្ជាក់ឱ្យដឹងថា នៅក្នុងខេត្តត្បូងឃ្មុំទាំងមូល គឺមានស្រុកចំនួន៦ និងក្រុង១ ឃើញថានៅដើមរដូវវស្សាឆ្នាំនេះ កសិករបាននាំគ្នាចុះបង្កបង្កើនផលស្រូវវស្សាបានល្អជាងឆ្នាំទៅ គឺគ្រប់ស្រុក/ក្រុងដាំដុះបានល្អប្រហាក់ប្រហែលគ្នា ដោយបានដាំដុះលើផ្ទៃដីស្រែប្រមាណជិត ៤៨ ពាន់ហិកតា គិតជាភាគរយបានជិត ៦០ ភាគរយ នៃផែនការដាំដុះ ហើយការបង្កបង្កើនផលនេះ ក៏មិនមានកត្តាសត្វល្អិតបំផ្លាញអ្វីគួរកត់សម្គាល់ទេ។
លោកប្រធានបានបញ្ជាក់ទៀតថា កសិករបង្កបង្កើនផលស្រូវវស្សា គឺកសិករនិយមដាំប្រភេទស្រូវផ្កាដួល សែនក្រអូប និងស្រូវក្នុងស្រុករបស់ពួកគាត់ ហើយបើប្រៀបធៀបឆ្នាំ ២០១៨ នេះ ទៅនឹងឆ្នាំទៅមិញឃើញថា ឆ្នាំនេះការបង្កបង្កើនផលស្រូវវស្សាបានលឿនជាង និងល្អជាងឆ្នាំ ២០១៧៕
Source: Kampuchea Thmey Daily
0 Comments