ក្រុម​ចំណូល​ថ្មី​វិសាខា ប្រកាស​ចុះ​កុងត្រា​ជាមួយ​កីឡាករ​ជើងចាស់ កែវ សុខ​ផេង និង ​សុខ សុវណ្ណ

​ក្លិប​បាល់ទាត់​ចំណូល​ថ្មី​វិសាខា សមាជិក​លី​គ​កំពូល​កម្ពុជា (Metfone Cambodian League 2018) បានប្រកាស​ចុះកិច្ចសន្យា​ជាមួយ​កីឡាករ​ដែលមាន​បទពិសោធន៍ ​គឺ​ខ្សែប្រយុទ្ធ កែវ សុខ​ផេង ទើបផុត​កិច្ចសន្យា​នៅ​ម៉ាឡេស៊ី និង​ខ្សែការពារ សុខ សុវណ្ណ ពី​ក្លិប​បឹងកេត​។​

​ទាំង កែវ សុខ​ផេង ម្ចាស់​អាវ​លេខ​៦៨ និង សុខ សុវណ្ណ ម្ចាស់​អាវ​លេខ​៧៩ នៅ​ទ្រនំ​ថ្មី​សុទ្ធតែតាំងចិត្ត​ជួយ​ក្រុម​វិសាខា​ឱ្យបាន​ល្អ ឱ្យ​ដូច​ក្លិប​ចាស់ ខណៈ​កីឡា​ករទាំង​ពីរនឹង​អាចជួយវិសាខា បាន​ប្រកួត​ក្នុង​ពានរង្វាន់​សម្តេច​តេ​ជោ ហ៊ុន សែន ឆ្នាំ​ ២០១៨ នេះ​ និង​ជើង​ទី​២ នៃពានរង្វាន់​លី​គ​កំពូល​កម្ពុជា ឆ្នាំ ​២០១៨ ខណៈ​រដូវ​កាល​ដោះដូរ​កីឡាករ​នឹង​បើក​ពីថ្ងៃ​ទី​១៥ ដល់២៩ ខែមិថុនា ខាងមុខ​។

​ចំពោះ​កីឡាករ កែវ សុខ​ផេង ដែល​ទើប​បញ្ចប់​កិច្ចសន្យា​ពាក់កណ្ដាល​ទី​ជាមួយ​ក្លិប PKNP របស់​លីគ​កំពូល​ម៉ាឡេស៊ី កាលពីពេល​ថ្មីៗ​។ ខ្សែប្រយុទ្ធ​រូបនេះ​បាន​ចាប់​អាជីព​បាល់ទាត់​របស់ខ្លួន​នៅ​ឆ្នាំ ២០១២ ជាមួយ​ក្លិប​បឹងកេត តែ​មិនសូវ​បានបង្ហាញ​ខ្លួន​នោះទេ រហូតដល់​ឆ្នាំ ​២០១៥ ទើប​រូបគេជាមួយ​បងប្រុស​ កែវ សុខ​ង៉​ន បានសម្រេច​ចិត្ត​ផ្ទេរ​ទៅ​ចូលរួម​ជាមួយ​ក្រុម​ភ្នំពេញ​ក្រោ​ន រហូតមកដល់​បច្ចុប្បន្ន​។ រូបគេ​ក៏​ជា​ផ្នែក​មួយ​ជួយ​ឱ្យ​បឹងកេត ឈ្នះ​ជើងឯក​លី​គ​កំពូល​កម្ពុជា នៅ​ឆ្នាំ ២០១២ និង​ភ្នំពេញ​ក្រោ​ន នៅ​ឆ្នាំ​ ២០១៥ រហូតដល់​ឆ្នាំ ​២០១៧​។ ចាប់ពី​ឆ្នាំ​ ២០១៥ មក​រូបគេត្រូវបាន​គ្រូបង្វឹក​កោះហៅ​ឱ្យចូល​រួមជាមួយ​ក្រុម U22 កម្ពុជា និង​ក្រុម​ជម្រើសជាតិ​ផងដែរ​។​

​ចំណែក​កីឡាករ សុខ សុវណ្ណ វិញខ្សែ​ការពារ​សមាជិក​ក្រុម​បឹងកេត​។ មួយរយៈ​ចុងក្រោយ​នេះបឹងកេត មិនសូវ​ដាក់ សុវណ្ណ ឱ្យ​លេង​ប៉ុន្មាន​នោះទេ ខណៈ​សាមីខ្លួន​អះអាងថា ​ការប្តូរ​ក្លិប​នេះជាការ​ស្វែងរក​បទពិសោធ​ន៍​ថ្មីៗ​បន្ថែម​ ព្រមទាំង​ប្រជែង​ឱកាស​ជាប់​ជម្រើសជាតិ​ឡើងវិញផងដែរ​។ សុខ សុវណ្ណ ធ្លាប់ជា​សមាជិក​ក្លិប​ភ្នំពេញ​ក្រោ​ន ពី​ឆ្នាំ ​២០០៧ ដល់ ​២០១៣ ខណៈ​ពី​ឆ្នាំ​ ២០១៣ ដល់​ ២០១៨ រូបគេ​ផ្លាស់​ចូលរួម​ជាមួយ​បឹងកេត​។ រូបគេ​ធ្លាប់​ឈ្នះ​ជើង​លី​គកំពូល​កម្ពុជា ៤​ លើក​ គឺ​នៅ​ឆ្នាំ ​២០១០,២០១១,២០១៦,២០១៧ ឈ្នះ​ពានរង្វាន់​សម្តេច​តេ​ជោ ហ៊ុន សែន នៅ​ឆ្នាំ​ ២០០៨,២០០៩​។ ធ្លាប់​ឈ្នះ​ជើងឯក​រង​ពានរង្វាន់ AFC President's Cup 2011 និង​ជើងឯក​រង​ពានរង្វាន់ 2015 Toyota Mekong Club Championship ផងដែរ​។​

​លោក ហុក សុចិ​ត្រា អគ្គលេខាធិការ​របស់​ក្លិប​បាល់ទាត់​វិសាខា បាន​លើកឡើងថា​ក្រុម​លោក ត្រូវការ​កម្លាំង​ដែលមាន​បទពិសោធ​ន៍ប​ន្ថែ​ម ដើម្បី​ជំនួស​កីឡាករ​ជើងចាស់​មួយចំនួន ​និង​ជា​កីឡាករក្មេង​ថ្មីៗ ដែល​នៅ​ស្ទើ​របទពិសោធន៍​។ លោក​នៅតែ​បើកចំហ​រប​ន្ថែ​ម​ដល់​កីឡាករ​ដទៃ ដែលមាន​សមត្ថភាពចង់​ចូលរួម​ក្នុង​ក្រុម​លោក​ គឺ​នៅតែ​ទទួល​ជានិច្ច​។

​ក្រុម​វិសាខា បាន​បង្កើតឡើង​ពីថ្ងៃ​ទី​៥ ខែកុម្ភៈ ឆ្នាំ​២០១៧ ក្រោម​ការឧបត្ថម្ភ​គាំទ្រ​ពី​សំណាក់​ឯកឧត្ដម ស សុខា តំណាងរាស្ដ្រ​ខេត្តព្រៃវែង និង​ជា​អនុប្រធាន​សហព័ន្ធ​សហភាព​យុវជន​កម្ពុជា​។ បច្ចុប្បន្នក្លឹប​មាន​កីឡាករ​ជិត ​៣០​ នាក់ ដែលមាន​លោក ហុក សុចិ​ត្រា អតីត​គ្រូបង្វឹក​ក្រុមជម្រើសជាតិ​កម្ពុជា ដើរតួរ​ធ្វើជា​អ្នកចាត់ការ​ទូទៅ​របស់​ក្រុម ខណៈ​លោក ហុក សុ​ជីវ័ន ជាប្អូនប្រុស​បង្កើត​ធ្វើជា​គ្រូបង្វឹក​។​

​ឆ្លងកាត់ ​៧​ ប្រកួត​មកនេះ​ក្នុង​ពានរង្វាន់​លី​គ​កំពូល​កម្ពុជា វិសាខា ឈរ​លេខ​៤ ​ក្នុង​តារាង​រួមដែលមាន​ ១២ ​ក្រុម ​ក្រោយ​ប្រកួត​ឈ្នះ​៣លើក​ ស្មើគ្នា​១​លើក និង​ចាញ់​២​លើក មាន​១០​ពិន្ទុ​ក្នុងដៃ​។ កន្លងមក​វិសាខា មាន​កីឡាករ​ពីរ​នាក់​កោះ​ហៅចូល​ក្រុម​ជម្រើសជាតិ គឺ កែវ សុខ​សិលា ជាអ្នកចាំទី និង រស់ សំអឿន ជា​ខ្សែបម្រើ​ស្លាប​។ សម្រាប់​ប្រកួត​បន្ទាប់​ក្រុម​វិសាខា ត្រូវ​ប៉ះ​ក្រុមណាហ្គា​វើ​ល នៅ​ម៉ោង​៦​ល្ងាច​លើ​ទីលាន​កីឡដ្ឋាន​ស្តា​ត​ចាស់ នៅ​ថ្ងៃ​សៅរ៍ ទី​២ ខែមិថុនា ឆ្នាំ ២០១៨៕

Source: Kampuchea Thmey Daily