ក្រុមណាហ្គាវើល បន្តកៅអីកំពូលតារាងនៃពានរង្វាន់លីគកំពូលកម្ពុជា Metfone Cambodian League 2018 ចំនួន ៤ សប្ដាហ៍ជាប់ៗគ្នា ក្រោយឆ្លងកាត់ ៧ ប្រកួតមកនេះរកបាន ១៩ ពិន្ទុច្រើនជាងគេ ពោល គឺច្រើនជាងក្រុមលេខ២ បឹងកេត មានត្រឹម១៧ពិន្ទុ។ ប្រកួតចុងក្រោយថ្មីៗនេះណាហ្គាវើល បានយកឈ្នះក្រុមក្រសួងការពារជាតិ ២ទល់០។
លទ្ធផល ២ទល់០ លើក្រុមម្ចាស់ផ្ទះក្រសួងការពារជាតិ បានរុញឱ្យណាហ្គាវើល ឡើងដាច់កំពូលតារាង ខណៈកីឡាករនីហ្សេរីយ៉ា Bisan George បានរកគ្រាប់ពីរគ្រាប់ម្នាក់ឯង ក្នុងប្រកួតដែលធ្វើឡើងនៅល្ងាចថ្ងៃសៅរ៍ ទី៦ ខែឧសភា ឆ្នាំ២០១៨ កន្លងទៅលើទីលានមជ្ឈមណ្ឌលហ្វឹកហាត់កងយោធពលខេមរភូមិន្ទ (ស្តាតចាស់)។
លោក មាស ចាន់ណា គ្រូបង្វឹករបស់ក្រុមណាហ្គាវើល បានលើកឡើងក្រោយរកបានជ័យជម្នះលើកទី៦ថា «យើងនៅមានបញ្ហាកីឡាកររបួសទើបធ្វើឱ្យថមថយនៅតំបន់ប្រយុទ្ធ។ មែនទែនទៅយើងសប្បាយចិត្តក៏សប្បាយចិត្ត បារម្ភក៏បានបារម្ភដែរ។ សប្បាយ គឺត្រង់យើងឈរកំពូលតារាងជាបន្តទៀត តែរឿងបារម្ភគឺខ្លាចគេមកតាមទាន់។ គិតត្រឹមពេលនេះយើងមិនទាន់គិតថាក្រុមណាមួយជាគូប្រជែងរបស់យើងទេ គឺជាក្រុមទាំងអស់ជាគូប្រជែងតែម្តង»។
៧ ប្រកួតមកនេះ ណាហ្គាវើល បានយកឈ្នះលើក្រុមអគ្គីសនីកម្ពុជា ៥ទល់១ ឈ្នះអង្គរថាយហ្គឺរ ៣ទល់០ ឈ្នះភ្នំពេញក្រោន ១ទល់០ ឈ្នះអាស៊ីអឺរ៉ុប ឈ្នះសូលទីឡូអង្គរ ៤ទល់១ ស្មើគ្នាជាមួយព្រះខ័នរាជស្វាយរៀង ១ទល់១ និងឈ្នះក្រសួងការពារជាតិ ២ទល់០។ សម្រាប់ប្រកួតបន្ទាប់ក្រុមណាហ្គាវើល ត្រូវប៉ះក្រុមវិសាខា នៅវេលា៦ល្ងាច ថ្ងៃសៅរ៍ ទី២ ខែមិថុនា ឆ្នាំ២០១៨ លើទីលានកីឡដ្ឋានកងយោធពលខេមរភូមិន្ទ (ស្តាតចាស់)។
គិតត្រឹមដឹកនាំក្រុមណាហ្គាវើល ពីឆ្នាំ ២០១៥ មកលោក មាស ចាន់ណា តែងតែបង្ហាញថា ក្រុមខ្លួនជាបេក្ខជនមួយដែលមិនអាចរំលងបានក្នុងការប្រជែងយកជើងឯក។ ជាក់ស្តែង គឺឆ្នាំ ២០១៥ ទទួលបានជើងឯករងលីគកំពូលកម្ពុជា ក្រោយចាញ់បឹងកេត នៅវគ្គផ្ដាច់ព្រ័ត្រដោយបាល់ប៉េណាំទីកាត់សេចក្តី ៣ទល់២ និងជើងឯករងពានរង្វាន់សម្តេចតេជោ ក្រោយចាញ់ព្រះខ័នរាជស្វាយរៀង។ ឆ្នាំ២០១៦ ណាហ្គាវើល ឈរចំណាត់ថ្នាក់លេខ៣ ព្រមទាំងមានឱកាសទៅលេងវគ្គជម្រុះបឋមនៃពានរង្វាន់ AFC Cup 2017 ផងដែរ។ ឆ្នាំ២០១៧ ណាហ្គាវើល បានត្រឹមលេខ៣ ក្រោយចាញ់ក្រសួងការពារជាតិ នៅវគ្គជម្រុះលីគកំពូលកម្ពុជា ខណៈពានរង្វាន់សម្តេចតេជោ ក្រុមនេះបានត្រឹមជើងឯករងក្រោយចាញ់ព្រះខ័នរាជស្វាយរៀង នៅវគ្គផ្ដាច់ព្រ័ត្រ។
បើក្រឡេកមើលលទ្ធផលកាលពីរដូវកាលចាស់របស់ក្រុមណាហ្គាវើល បានបញ្ចប់ទៅដោយក្នុងរដូវកាលលីគកំពូលកម្ពុជា ឈរចំណាត់ថ្នាក់លេខ៤ ក្នុងចំណោមសមាជិកទាំង១២ក្រុម ខណៈកីឡាករជនជាតិរ្វ៉ាន់ដា Kipson ឈ្នះស្បែកជើងមាសប្រចាំរដូវកាលក្នុងនាមជាអ្នករកគ្រាប់បាល់បញ្ជូលទីបានច្រើនជាងគេ។ ចំណែកក្នុងពានរង្វាន់សម្តេចតេជោ ហ៊ុន សែន វិញ ណាហ្គាវើល បានត្រឹមជើងឯករងក្រោយចាញ់ក្រុមព្រះខ័នរាជស្វាយរៀង នៅវគ្គផ្ដាច់ព្រ័ត្រ៕
Source: Kampuchea Thmey Daily
0 Comments