ខ្សែប្រយុទ្ធ​ជើងចាស់ ឃួន ឡា​បូ​រ៉ាវី ចេញពី​បឹងកេត ទៅ​បន្ត​អាជីព​នៅ​លី​គ​លំដាប់​ទី​៣ ​របស់​ប្រទេសថៃ​

​កីឡាករ ឃួន ឡា​បូ​រ៉ាវី សមាជិក​ក្នុង​ក្រុម​ជម្រើសជាតិ​កម្ពុជា របស់​ក្លិប​បឹងកេត​អែ​ហ្វ​ស៊ី នៅ​លី​​កំពូល​កម្ពុជា (Metfone Cambodian League 2018) បាន​ឈានដល់​កិច្ចព្រមព្រៀង​ទៅលេង​នៅក្នុង​ជើង​ទី​២ នៃ​ពានរង្វាន់​លី​គ​លំដាប់​ទី​៣ របស់​ប្រទេស​ថៃ ដោយ​ចូលរួម​ជាមួយ​ក្លិប Surat Thani FC​។​

​សូម​រំលឹកថា​កាលពីដើម​ខែមេសាកន្លងទៅ ឃួន ឡា​បូ​រ៉ាវី ធ្លាប់បាន​ធ្វើដំណើរ​ទៅ​ប្រទេស​ថៃ ដើម្បីចូលរួម​ហ្វឹកហាត់ ​និង​ធ្វើតេស្ត​សមត្ថភាព​ក្នុង​ក្លិប ​Ratchaburi Mitr Phol F.C​ ជា​សមាជិកពានរង្វាន់​លី​គ​កំពូល​ប្រទេស​ថៃ (2018 Thai League 1)​។ ប៉ុន្តែ​កីឡាករ​វ័យ ​២៩ ​ឆ្នាំ​រូបនេះ មិន​ទទួលបាន​ដំណឹង​វិជ្ជា​មាន​មកពី​ក្លិប​ដែលមាន​មូលដ្ឋាន​នៅ​រាជធានី​បាងកក នេះ​នោះទេ​។​

​ប្រភព​មកពី​ក្លិប​បឹងកេត​អែ​ហ្វ​ស៊ី ធ្លាប់បាន​បញ្ជាក់ថា​ មូលហេតុ​ដែល​ក្លិប​នៅ​ប្រទេស​ថៃ សម្លឹង​ឃើញកីឡាករ ឃួន ឡា​បូ​រ៉ាវី ក៏​ព្រោះតែ​រូបគេ​បានបង្ហាញ​ខ្លួន​យ៉ាង​ល្អ​ទាំង​ក្នុង​ក្លិបដែល​ប្រកួត​នៅ​លីគ និង​ពានរង្វាន់ ​AFC Cup ព្រមទាំង​បង្ហាញខ្លួន​ក្នុង​ក្រុម​ជម្រើសជាតិ ដែល​រកបាន​គ្រាប់​បាល់ពីរគ្រាប់​ជាប់​គ្នា​កាលពីពេល​ថ្មី ពោល គឺ​ពេល​កម្ពុជាឈ្នះ​ឡាវ ១​ទល់​០ និង​ពេល​កម្ពុជា ចាញ់អា​ហ្វ​ហ្គា​នី​ស្ថាន ២​ទល់​១​។​

​គណៈកម្មការ​ប្រកួត​បា​ល់​ទាត់​ជាតិ (CNCC) បាន​សរសេរ​នៅលើ​វិ​ប​សាយ​ផ្លូវការ​ថា ​ក្លិប​ថៃ​មួយ​នេះចង់បាន​ ឃួន ឡា​បូ​រ៉ាវី ខ្លាំង ​និង​ធានា​កៅអី​ជម្រើស ​១១​ នាក់​ដំបូង​ជាប់លាប់​ដល់​រូបគេ​។ បូរ៉ា​វី ធ្លាប់បាន​បញ្ជាក់ថា​ «​ខ្ញុំ​ចង់​សាកល្បង​លេង​នៅក្រៅ​ប្រទេស តែ​ក៏​មិន​ចង់បាន​ត្រឹម​អង្គុយ​មើលការប្រកួត​ដែរ គឺ​ខ្ញុំ​ចង់​លេង​ក្នុង​ជម្រើស​ ១១ ​នាក់​ដំបូង​។ គ្រូបង្វឹក​ចង់បាន​ខ្ញុំ​នឹង​ធានា​កៅអីជម្រើស​ដំបូង​ដល់​ខ្ញុំ​»​។ នៅ​លី​គ​របស់​ប្រទេស​ថៃ បាន​តម្រូវឱ្យ​ក្លិប​ជា​សមាជិក​របស់ខ្លួន​ចុះបញ្ជីកីឡាករ​បរទេស​បាន​ចំនួន​៥​នាក់​ ដោយ​ក្នុងនោះ​មាន​កីឡាករ​បរទេស​មិន​គិត​ជាតិ​សាសន៍ចំនួន​ ៣ ​នាក់ កីឡាករ​ជា​ជនជាតិ​ក្នុង​ទ្វីបអាស៊ី​ម្នាក់ និង​កីឡាករ​ក្នុង​តំបន់​អាស៊ានម្នាក់​។

​គេ​ចាំបាន​ថា​ កីឡាករ ឃួន ឡា​បូ​រ៉ាវី ជា​អ្នក​រកបាន​គ្រាប់​បាល់​ច្រើនជាងគេ​ប្រចាំ​ព្រឹត្តិការណ៍ពានរង្វាន់​សម្តេច​តេ​ជោ ហ៊ុន សែន ពោល គឺ​ឈ្នះ​៤​លើក​ ច្រើនជាង​កីឡាករ​ដទៃ គិតតាំង​បង្កើតឡើង​ដំបូង​នៅ​ឆ្នាំ ​២០០៧ មក ​ពោលគឺ​នៅ​ឆ្នាំ​ ២០១១ និង ​២០១២ ជាមួយ​ក្រុមខេត្តស្វាយរៀង (​ព្រះខ័ន​រាជ​ស្វាយរៀង បច្ចុប្បន្ន​) នៅ​ឆ្នាំ​ ២០១៤ និង​ ២០១៧ ជាមួយ​បឹងកេត​។ កីឡាករ​វ័យ ​២៩ ​ឆ្នាំ​រូបនេះ​ បាន​ចាប់​អាជីប​បាល់ទាត់​ដំបូង​ពី​ឆ្នាំ ​២០០៨ មកម្ល៉េះ ​ដោយ​កាលនោះចូលរួម​ជាមួយ​ក្លិប​ព្រះខ័ន​រាជ​ស្វាយរៀង ហើយ​ដល់​ឆ្នាំ​ ២០១៤ រូបគេ​បាន​ចេញទៅ​ចូលរួមជាមួយ​ក្រុម​បឹងកេត រហូតដល់​បច្ចុប្បន្ន​។ ចំពោះ​ក្នុង​ក្រុម​ជម្រើសជាតិ​វិញ រូបគេ​បានបង្ហាញខ្លួន​ជាមួយ​ក្រុម U23 កម្ពុជា ចាប់ពី​ឆ្នាំ ​២០០៩ ដល់​ ២០១១ ខណៈ​ចាប់ពី​ឆ្នាំ ​២០០៨ ដល់​បច្ចុប្បន្ន​រូបគេ​ក៏មាន​ឈ្មោះ​លេង​ជាមួយ​ក្រុម​ជម្រើសជាតិ​កម្ពុជា ផងដែរ​។​

​កីឡាករ​កម្ពុជា ១,៨១ ​ម៉ែត្រ​រូបនេះ ​ធ្លាប់​ឈ្នះ​ពានរង្វាន់​លី​គ​កំពូល​កម្ពុជា ៣​លើក​ គឺ​នៅ​ឆ្នាំ​ ២០១៣ ជាមួយ​ក្លិប​ព្រះខ័ន​រាជ​ស្វាយរៀង ហើយ​នៅ​ឆ្នាំ​ ២០១៦ និង​ ២០១៧ ឈ្នះ​ជាមួយ​ក្រុម​បឹងកេត ខណៈ​ធ្លាប់​ឈ្នះ​ពានរង្វាន់​សម្តេច​តេ​ជោ ហ៊ុន សែន នៅ​ឆ្នាំ​ ២០១១,២០១២ ផងដែរ​។ អ្វីដែល​គួរឱ្យចាប់អារម្មណ៍​ កីឡាករ ឃួន ឡា​បូរ៉ា​រី ធ្លាប់​ឈ្នះ​ពានរង្វាន់​កីឡាករ​ដែល​ទា​ត់ប​ញ្ជូ​ល​ទី​បានច្រើនជាងគេ​ដល់​ទៅ​៥​លើក​ គឺ​ក្នុង​លី​គ​កំពូល​កម្ពុជា ឆ្នាំ​ ២០១៣ និង​ឈ្នះ​ក្នុង​ពានរង្វាន់​សម្តេច​តេ​ជោ ហ៊ុន សែន ក្នុង​ឆ្នាំ ​២០១១,២០១២,២០១៤​និង​២០១៧៕

Source: Kampuchea Thmey Daily