ភ្នំពេញ៖ បុរសញៀនថ្នាំម្នាក់ បានចាប់ក្មេងស្រីអាយុ ៤ ឆ្នាំម្នាក់ រំលោភតាមរន្ធគូថ រួចខ្ទប់មាត់ និងច្រមុះសម្លាប់យកសពទៅញាត់ចូលក្នុងពាងទឹក ហើយគេចខ្លួនបានតែប្រមាណជា ២ ម៉ោងប៉ុណ្ណោះ ក៏ ត្រូវសមត្ថកិច្ចខណ្ឌឫស្សីកែវ ចាប់បានតែម្តង។
ហេតុការណ៍នេះបានកើតឡើងកាលពីយប់ថ្ងៃអង្គារ ១៥ កើត ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៩ ខែឧសភា ឆ្នាំ២០១៨ វេលាម៉ោង ៨ និង ៣០ នាទី នៅចំណុចផ្ទះគ្មានលេខ ក្រុម៥ ភូមិក សង្កាត់ច្រាំងចំរេះ២ ខណ្ឌឫស្សីកែវ។
សមត្ថកិច្ចបានឱ្យដឹងថា ជនរងគ្រោះឈ្មោះ ខា ស្រីចាន់ ភេទស្រី អាយុ៤ឆ្នាំ មានទីលំនៅ ផ្ទះគ្មានលេខ ក្រុម៥ ភូមិក សង្កាត់ច្រាំងចំរេះ២ ខណ្ឌឫស្សីកែវ រីឯជនសង្ស័យឈ្មោះ ង្វៀងយ៉ាំងយី ភេទប្រុស អាយុ៣៣ឆ្នាំ ជនជាតិវៀតណាម មានទីលំនៅ ផ្ទះគ្មានលេខ ក្រុម៥ ភូមិក សង្កាត់ច្រាំងចំរេះ២ ខណ្ឌឫស្សីកែវ មុខរបរលក់ដូរ។
បើតាមឪពុកក្មេងស្រីរងគ្រោះឈ្មោះ ខាហ៊ូ អាយុ៣២ឆ្នាំ បានឱ្យដឹងថា កាលពីថ្ងៃទី២៩ ខែឧសភា ឆ្នាំ២០១៨ វេលាម៉ោង ១៩ និង ២៥ នាទី ខណៈពេលមេឃកំពុងតែភ្លៀងក្មេងរងគ្រោះក៏សុំឪពុកមុជទឹកភ្លៀងលេង ហើយរត់លេងបាត់ទៅ ពេលរាំងភ្លៀងស្រាប់តែបាត់កូនឈឹងមិនឃើញមកផ្ទះវិញ ក៏ដើរកគ្រប់ទីកន្លែងតែរកមិនឃើញ រួចបាននាំគ្នាឡើងលើផ្ទះទុកចោលមួយនៅក្បែរផ្ទះជនសង្ស័យ ក៏ស្រាប់តែឃើញកូនស្រីនៅក្នុងពាងគ្មានទឹក ដែលគេទុកចោលលើផ្ទះនោះមានតែអាវ ដោយស្រាតល្វែងក្រោម។ ប្រភពបន្តថា ពេលឃើញបែបនេះនឹកស្មានថានៅរស់ក៏យកកូនទៅមន្ទីរពេទ្យ សម្តេចឪ គីឡូម៉ែត្រលេខ៦ តែត្រូវគ្រូពេទ្យបញ្ជាក់ថាស្លាប់បាត់ទៅហើយ។
សមត្ថកិច្ចឱ្យដឹងថា បន្ទាប់ពីមានករណីរំលោភសម្លាប់កើតឡើង កម្លាំងជំនាញខណ្ឌ និងប៉ុស្តិ៍បានបែងចែកជាពីរក្រុម ក្រុមទី១ សហការជាមួយកម្លាំងការិយាល័យបច្ចេកទេសវិទ្យាសាស្ត្រ និងវេជ្ជបណ្ឌិត តុលាការ ពិនិត្យសាកសព និងក្រុមទី២ ចុះស្រាវជ្រាវជុំវិញកន្លែងកើតហេតុ រហូតឈានទៅឃាត់ខ្លួនជនសង្ស័យបានម្នាក់នៅម្តុំផ្សារច្រាំងចំរេះ ផ្លូវជាតិលេខ៥ ក្នុងសង្កាត់ច្រាំចំរេះទី២ ដោយជនសង្ស័យព្យាយាមរត់គេចខ្លួនពីសមត្ថកិច្ច។
ប្រភពពីសមត្ថកិច្ចបានបន្តថា បន្ទាប់ពីកម្លាំងការិយាល័យបច្ចេកទេសវិទ្យាសាស្ត្រ វេជ្ជបណ្ឌិត និងតុលាការ ពិនិត្យសាកសពបានបញ្ជាក់ថា ជនសង្ស័យរំលោភក្មេងស្រីរងគ្រោះតាមរន្ធគូថមិនមែនរំលោភតាមទ្វារមាសទេ រួចខ្ទប់មាត់ និងច្រមុះសម្លាប់តែម្តង។
បើទោះបីយ៉ាងណា ជនសង្ស័យដំបូងមិនបានសារភាពទេ ប៉ុន្តែមុនពេលកើតហេតុមានអ្នកភូមិឃើញជនសង្ស័យនៅក្បែរក្មេងស្រីរងគ្រោះ ហើយជនសង្ស័យ គឺជាមនុស្សញៀនថ្នាំ ជាសមាសភាពមិនល្អនៅក្នុងភូមិ។ បន្ទាប់ពីសមត្ថកិច្ចជជីកសួរតាមជំនាញ ជនសង្ស័យបានសារភាពថា ខ្លួនពិតជាបានរំលោភសម្លាប់ក្មេងស្រីរងគ្រោះប្រាកដមែន ដោយខណៈមេឃកំពុងភ្លៀងខ្លួនបានលួងលោម និងចាប់ក្មេងស្រីរងគ្រោះឡើងលើផ្ទះដែលគ្មានមនុស្សរស់នៅ ហើយធ្វើសកម្មភាពលូកលេងប្រដាប់ភេទក្មេងស្រី។ ពេលនោះក្មេងស្រីស្រែកយ៉ាងខ្លាំងក៏យកដៃខ្ទប់មាត់ និងច្រមុះក្មេងស្រីរងគ្រោះ ហើយរំលោភតាមរន្ធគូថរហូតបានសម្រេច រួចហើយស្រាប់តែក្មេងនោះស្លាប់តែម្តង។
ជនសង្ស័យបានសារភាពទៀតថា បន្ទាប់ពីដឹងថាក្មេងស្រីស្លាប់ហើយនោះ រូបគេបានយកសពក្មេងស្រីយកទៅដាក់ចូលក្នុងកូនពាងគ្មានទឹក រួចយកសំបកបាវអង្ករ និងស័ង្កសីគ្រប់ពីលើ ហើយខ្ទាស់ទ្វារខាងក្នុងរួចលូនចុះតាមចន្លោះប្រហោងផ្ទះ ចូលផ្ទះខ្លួនឯងតែម្តង។ ក្រោយមកពេលគេផ្អើលឆោឡោរកក្មេងនោះ ខ្លួនក៏រត់ទៅពួនក្នុងទឹកទន្លេក្បែរនោះប្រហែល ៣ ម៉ោង ពេលឡើងមកវិញដើរដល់ជិតផ្សារច្រាំងចំរេះ ក៏ត្រូវប៉ូលិសចាប់តែម្តង។ បច្ចុប្បន្នជនសង្ស័យកំពុងតែធ្វើការសាកសួរនៅអធិការដ្ឋានខណ្ឌឫស្សីកែវ ដើម្បីកសាងសំណុំរឿងតាមនីតិវិធី៕
Source: Kampuchea Thmey Daily
0 Comments