ភ្នំពេញ ៖ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ប្រកាសផ្អាក លែងអោយ ក្រុមហ៊ុនធ្វើអាជីវកម្មនាំចូលថ្នាំកសិកម្មទាំងអស់ និងថ្នាំកំចាត់ស្មៅគ្រប់ប្រភេទ ជាបណ្ដោះអាសន្ន និងអំពាវនាវឲ្យ កងកម្លាំង និងអាជ្ញាធរមានសមត្ថកិច្ច ប្រចាំនៅតាមច្រក ព្រំដែន អន្តរជាតិ ច្រកទ្វេភាគី ច្រក របៀង និងច្រកចេញចូលផ្សេងៗទៀត រួមគ្នាសហការ ទប់ស្កាត់ ការនាំចូលថ្នាំ កសិកម្មគ្រប់ប្រភេទ។ នេះបើយោងតាមសេចក្តីជូនដំណឹងរបស់ ក្រសួង កសិកម្ម។
ការចេញសេចក្ដីជូនដំណឹងរបស់ក្រសួងកសិកម្ម ធ្វើឡើង បន្ទាប់ពីកាលពីដើម ខែ ឧសភា កន្លងមកនេះ មានករណីពុលប្រជាពលរដ្ឋនៅភូមិស្រែនន ឃុំកន្ទួត ស្រុកចិត្របុរី ខេត្តក្រចេះ បណ្តាលឲ្យមនុស្ស ១៣នាក់បានស្លាប់និង ប្រមាណជា២០០នាក់ទៀត ជួយសង្គ្រោះបានទាន់ពេល ដែលសង្ស័យទៅលើករណីប្រើប្រាស់ថ្នាំកសិកម្មខុសច្បាប់។
យោងតាមសេចក្តីប្រកាសព័ត៌មានរបស់ ក្រសួងកសិកម្ម ចុះថ្ងៃទី២៥ ឧសភា ឆ្នាំ២០១៧ ចុះហត្ថលេខាដោយលោក លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ក្រោយពីមានករណីពុល ប្រជាពលរដ្ឋនៅ ភូមិស្រែនន ឃុំកន្ទួត ស្រុកចិត្របូរី ខេត្តក្រចេះ ដែលសង្ស័យលើការប្រើប្រាស់ថ្នាំ កសិកម្ម ខុសច្បាប់ ក្រសួងកសិកម្មបានសម្រេច និងណែនាំ ឲ្យ ១ ៖ ក្រុមហ៊ុន ធ្វើអាជីវកម្ម នាំចូលថ្នាំកសិកម្មគ្រប់ប្រភេទទាំងអស់ ត្រូវផ្អាកជាបណ្តោះអាសន្ន នូវការនាំចូលថ្នាំកំចាត់ស្មៅ គ្រប់ប្រភេទ។ ២៖ ដេប៉ូ ផ្គត់ផ្គង ចែកចាយថ្នាំ កសិកម្ម ទាំងអស់ត្រូវផ្អាក ផ្គត់ផ្គង់និងចែលចាយ ថ្នាំ កំចាត់ស្មៅជាបណ្តោះអាសន្ន រង់ចាំការត្រួតពិនិត្យ ពីមន្ទីរ កសិកម្ម រុក្ខាប្រមាញ់ រាជធានីខេត្ត ដែលមានសមត្ថកិច្ចជំនាញ។ ៣ ៖ អគ្គនាយកដ្ឋាន កសិកម្ម នាយកដ្ឋាន នីតិកម្ម កសិកម្ម និងមន្ទីរកសិកម្ម រាជធានី ខេត្ត ត្រូវចុះស្រាវជ្រាវ និងត្រួតពិនិត្យ ក្នុងករណី មានការប្រើប្រាស់ថ្នាំកសិកម្ម កម្ចាត់ស្មៅ ត្រូវ ធ្វើការណែនាំ ទៅតាម វិធានបច្ចេកទេស ដើម្បីជៀសវាង នូវគ្រោះថ្នាក់ ដោយយថាហេតុ។ ៤ ៖ កងកម្លាំងនិងអាជ្ញាធរមានសមត្ថកិច្ច ប្រចាំនៅតាមច្រក ព្រំដែន អន្តរជាតិ ច្រកទ្វេភាគី ច្រក របៀង និងច្រកចេញចូលផ្សេងៗទៀត រួមគ្នាសហការ ទប់ស្កាត់ កានាំចូលថ្នាំ កសិកម្មគ្រប់ប្រភេទ។
៥ ៖ ករណីមាន សង្ស័យពាក់ព័ន្ធ និងបទល្មើស ត្រូវរាយការណ៍ និងសហការជាមួយ មន្ទីរកសិកម្ម រាជធានី ខេត្តក្រុង ដើម្បីទប់ស្កាត់ជាបន្ទាន់។ ៦៖ ក្រុមហ៊ុន ដីសម្បទានសេដ្ឋកិច្ចនិងម្ចាស់កសិដ្ឋាន ទាំងអស់ ដែលបាន នាំចូល ថ្នាំកសិកម្ម ទៅប្រើប្រាស់ លើដីសម្បទាន សេដ្ឋកិច្ចនិង កសិដ្ឋាន របស់ខ្លួន ត្រូវរាយការណ៍ ជូនក្រសួងកសិកម្ម អំពីការប្រើប្រាស់ ដើម្បីចុះពិនិត្យ និងណែនាំបច្ចេកទេស ក្នុងការប្រើប្រាស់ ឲ្យមានប្រសិទ្ធភាព។
សូមរំលឹកថាក្រសួងឧស្សាកម្ម និងសិប្បកម្ម ក្រសួងរ៉ែ និងថាមពល និងក្រសួងសុខាភិបាលសូមជំរាបជូនដំណឹង ដល់សាធារណជនអោយបានជ្រាបថាៈ ការពុលនៅភូមិស្រែនន និងភូមិអាលច ឃុំកន្ទួត ស្រុកចិត្របុរី ខេត្តក្រចេះ បណ្តាលមកពីស្រាស ដែលមានលក់ ឬផលិតនៅក្នុងមូលដ្ឋាន ហើយដែលមានសារធាតុមេតាណុលកម្រិតខ្ពស់ និងទឹកព្រែកទេ និងអូរគគី មានសារធាតុគីមី មានកំហាប់ខ្ពស់ ដែលបណ្តាលមកពីថ្នាំសម្លាប់ស្មៅ និងថ្នាំសម្លាប់សត្វល្អិត។ ក្រសួងឧស្សាហកម្ម និងសិប្បកម្ម, ក្រសួងរ៉ែ និងថាមពល និងក្រសួងសុខាភិបាល បន្តសហការគ្នាដើម្បីបង្ការ ទប់ស្កាត់ និងជៀសវាងនូវបញ្ហាដែលកើតឡើងដោយយថាហេតុ៕
Source: Kampuchea Thmey Daily
0 Comments