វិញ្ញាសា​បាល់ទាត់​ក្នុង​ព្រឹត្តិការណ៍​កីឡា​ជាតិ​ឆ្នាំ​២០១៨ ធ្វើដំណើរ​ដល់​ប្រកួត​ទី​៣​ហើយ​នៅ​ថ្ងៃអាទិត្យ​នេះ

វិញ្ញាសា​បាល់ទាត់​បុរស​-​នារី ស្ថិតក្នុង​ប្រភេទ​កីឡា​មួយ​ក្នុងចំណោម​ប្រភេទ​កីឡា​ទាំង​២៧​ប្រភេទ ក្នុង​ព្រឹត្តិការណ៍​កីឡា​ជាតិ​លើក​ទី​២ ឆ្នាំ​២០១៨ (National Games) ដោយ​ក្នុងនោះ​ក្រុមបាល់ទាត់​បុរស មាន​ចំនួន​២៥​ក្រុម ចែកចេញជា​៨​ពូ​ល ហើយ​បាល់ទាត់​នារី មាន​៨​ក្រុម​ចែកជា​២​ពូ​ល ខណៈ​នៅ​ថ្ងៃអាទិត្យ ទី​២៧ ខែឧសភា នេះ​។

សរុប​លទ្ធផល​នៅ​ថ្ងៃ​សៅរ៍ ទី​២៦ ខែឧសភា ឆ្នាំ​២០១៨ កន្លងទៅនេះ​ឃើញថា​ពូ​ល A ក្រុម​បាត់ដំបង ចាញ់​សៀមរាប ៥​ទល់​២ ហើយ​ឧ​ត្ត​រ​មានជ័យ ចាញ់​ពោធិ៍សាត់ ៣​ទល់​៤ ខណៈ​ពូ​ល B ក្រុម​ខេត្តព្រះវិហារ ចាញ់​កែប ៤​ទល់​១ ហើយ C បន្ទាយមានជ័យ ឈ្នះ​ស្ទឹងត្រែង ២​ទល់​០ ពូ​ល D កោះកុង ឈ្នះ​ក្រចេះ​៦​ទល់​១ ពូ​ល E ក្រុម​ខេត្តកណ្ដាល ស្មើ​ជាមួយ​ខេត្ត​ត្បូងឃ្មុំ ១​ទល់​១ ពូ​ល​F រាជធានី​ភ្នំពេញ ចាញ់​ខេត្តស្វាយរៀង ៥​ទល់​០ ពូ​ល​G ក្រុម​កំពង់ចាម ឈ្នះ​រតនគីរី ៥​ទល់​១ និង​ពូ​ល H ក្រុម​កំពង់ស្ពឺ ឈ្នះ​តាកែវ ៦​ទល់​១​។

​តាម​ការកំណត់​របស់​សហព័ន្ធ​កីឡាបាល់ទាត់​កម្ពុជា វិញ្ញាសា​របាល់​ទា​ត់បុរ​ស​គឺ​កំណត់​យក​ក្រោម​អាយុ​១៧​ឆ្នាំ (U17) ហើយ​ក្រុមបាល់ទាត់​នារី​វិញ យកអាយុ​១៦​ឆ្នាំ​ឡើង​ទៅ​។ ជា​លទ្ធផល​នៃ​ការ​ចាប់​ឆ្នោត​បែងចែក​ពូ​ល ឃើញថា​ក្រុមបាល់ទាត់​បុរស ពូ​ល A មាន ពោធិ៍សាត់ បាត់ដំបង ឧត្ដរមានជ័យ សៀមរាប ពូ​ល B មាន ព្រៃវែង ព្រះវិហារ កែប ពូ​ល C មាន បន្ទាយមានជ័យ ព្រះសីហនុ ស្ទឹងត្រែង ពូ​ល D មាន កំពង់ឆ្នាំង កោះកុង ក្រចេះ ពូ​ល E កណ្ដាល ត្បូងឃ្មុំ ក្រសួងការពារជាតិ ពូ​ល F ភ្នំពេញ កំពត ស្វាយរៀង ពូ​ល G មណ្ឌល​គី​រី រតនគីរី កំពង់ចាម និង ពូ​ល H ប៉ៃលិន កំពង់ស្ពឺ តាកែវ​។​ចំណែក​ក្រុមបាល់ទាត់​នារី ពូ​ល A មាន កំពង់ស្ពឺ កំពង់ឆ្នាំង ពោធិ៍សាត់ ស្វាយរៀង ឯ​ពូ​ល B មាន បាត់ដំបង បន្ទាយមានជ័យ សៀមរាប កណ្ដាល​។

​កាលពី​ប្រកួត​ព្រឹត្តិការណ៍​កីឡា​ជាតិ​លើក​ទី​១ ឆ្នាំ​២០១៦ ក្រុម​មកពី​ខេត្តសៀមរាប ដណ្ដើម​បាន​មេដាយមាស​ផ្នែក​បុរស ហើយ​ក្រុម​មក​ខេត្ត​ប៉ៃលិន ដណ្ដើម​បាន​មេដាយមាស​ផ្នែក​នារី​។ តាម​គម្រោង​ព្រឹត្តិការណ៍​កីឡា​ជាតិ​លើក​ទី​២ នឹង​ធ្វើឡើង​ចាប់ពី​ថ្ងៃទី​២៥ ឧសភា ដល់​ថ្ងៃទី​០៥ មិថុនា ឆ្នាំ​២០១៨ ដោយមាន​អត្ត​ពលិកម​ក​ពី​២៨​ក្រសួង និង រាជធានី​-​ខេត្ត ចូលរួម​ប្រជែង​លើ​២៧​ប្រភេទ​កីឡា។

សម្រាប់​ប្រកួត​បន្ទាប់​ក្នុង​ពានរង្វាន់​នេះ​ថ្ងៃអាទិត្យ​វិញ​មាន​ពូ​ល A ខេត្តពោធិ៍សាត់ ប៉ះ​ក្រុម​ខេត្តសៀមរាប វេលា​ម៉ោង​៧:៣០​នាទី​លើ​ទីលាន​បាទី​ទី​២ ក្រុម​ឧ​ត្ត​រ​មានជ័យ ប៉ះ​បាត់ដំបង នៅ​ម៉ៅ​ង​៧:៣០​នាទី​ព្រឹក​លើ​ទីលាន​បាទី​៤​។ ខណៈ​ពូ​ល B ក្រុម​ខេត្តព្រៃវែង ជួប​ខេត្តព្រះវិហារ នៅ​ម៉ោង​២:៣០​នាទី​រសៀល​លើ​ទីលាន​ជាមួយ​។ ពូ​ល C ក្រុមព្រះ​សីហនុ ប៉ះ​ក្រុម​ខេត្តបន្ទាយមានជ័យ ម៉ោង​៩:៣០​នាទី លើ​ទីលាន​បាទី​៤ ស្របពេល​ពូ​ល D ក្រុម​ខេត្តកំពង់ឆ្នាំង ប៉ះ​ខេត្តកោះកុង នៅ​ម៉ោង​៩:៣០​នាទី​ព្រឹក​។ ពូ​ល E ក្រសួងការពារជាតិ ប៉ះ​ខេត្តកណ្ដាល នៅ​ម៉ោង​៩:៣០​នាទី​ព្រឹក ខណៈ​ពូ​ល F ក្រុម​ខេត្ត​ប៉ះ​រាជធានី​ភ្នំពេញ នៅ​ម៉ោង​៧:៣០​នាទី​ព្រឹក​នៅ​ទីលាន​បាទី​៣ ពូ​ល G ក្រុម​មណ្ឌល​គី​រី ប៉ះ​កំពង់ចាម នៅ​ម៉ោង​៧:៣០​នាទី​ព្រឹក​លើ​ទីលាន​បាទី​៤ និង​ពូ​ល H ក្រុម​ប៉ៃលិន ប៉ះ​កំពង់ស្ពឺ នៅ​ម៉ោង​៩:៣០​នាទី​ព្រឹក​នៅ​ទីលាន​បាទី​៣​។

ព្រឹត្តិការណ៍​កីឡា​ជាតិ ឬ​ហៅថា National Games រៀបចំឡើង​២​ឆ្នាំ​ម្ដង ក្រោម​ការរៀបចំ​ឡើង​ដោយ​ក្រសួង​អប់រំ​យុវជន​និង​កីឡា សហការ​ជាមួយ​ភាគី​ពាក់ព័ន្ធ​ដើម្បី​ឲ្យ​សហព័ន្ធ​ទាំងអស់​បាន​ត្រៀមខ្លួន​ស​ម្រា​ប់​ព្រឹត្តិការណ៍​ស៊ី​ហ្គេម​ឆ្នាំ​២០២៣ ដែល​កម្ពុជា​ធ្វើជា​ម្ចាស់ផ្ទះ​។ National Games ធ្វើឡើង​ដូច​ទៅនឹង​ស៊ី​ហ្គេម ដោយមាន​ការបើក​កម្ម​វិធី និង​បិទ​កម្មវិធី ហើយ​វា​ជាការ​ត្រៀមខ្លួន​ល្អ​មួយ​សម្រាប់​កម្ពុជា​ក្នុង​ការ​ទទួល​រៀបចំព្រឹត្តិការណ៍ធំៗនៅពេល​ខាង​មុខ៕


Source: Kampuchea Thmey Daily