ភ្នំពេញ ៖ នៅក្នុងជំនួប ជាមួយ ក្រុមហ៊ុន Clik Payment (Cambodia) ដឹកនាំដោយលោក Matthew Tippetts អគ្គនាយកប្រតិបត្តិ និងជាស្ថាបនិករបស់ក្រុមហ៊ុន កាលពីថ្ងៃទី២៨ លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បាន កោតសសើរពីការ រីកលូតលាស់នូវវិស័យបច្ចេកវិទ្យានៅកម្ពុជា របស់ ក្រុមហ៊ុន Clik Payment (Cambodia)។
លោក Matthew Tippetts បានឲ្យដឹងថា ក្រុមហ៊ុន Clik ជាក្រុមហ៊ុនបច្ចេកវិទ្យាហិរញ្ញវត្ថុ (FinTech) មួយដែលបង្កើតឡើងនៅប្រទេសកម្ពុជា សម្រាប់បម្រើការលើសេវាកម្មទូទាត់ប្រាក់តាមអេឡិចត្រូនិក។ ជាមួយនឹងការងារនោះ ក្រុមហ៊ុន Clik នឹងដាក់ឲ្យប្រើប្រាស់នូវកម្មវិធី (Platform) មួយដើម្បីទូទាត់ និងផ្ទេរប្រាក់ទៅវិញទៅមកតាមអេឡិចត្រូនិក ឬក៏ទូទាត់ប្រាក់តាមកាតដូចជា Visa, Mastercard និងកាតមួយចំនួនទៀតផងដែរ។
លោកក៏បានឲ្យដឹងទៀតថា កម្មវិធីរបស់លោកក៏អាចតភ្ជាប់ទៅកម្មវិធីទូទាត់ធំៗជាច្រើនដូចជា Paypal, Alipay, WeChat ។ល។ ដើម្បីសម្រួលដល់ការទូទាត់ប្រតិបត្តិការនានា ជាពិសេសប្រតិបត្តិការហិរញ្ញវត្ថុអន្តរជាតិ។
នាឱកាសនោះ លោករដ្ឋមន្ត្រី បានឲ្យដឹងថា លោក មានសេចក្ដីរីករាយដោយបានឃើញមានការលូតលាស់នូវវិស័យបច្ចេកវិទ្យានៅកម្ពុជា។ លោកបន្តមានប្រសាសន៍ថា កម្មវិធីទូទាត់ប្រាក់តាមអេឡិចត្រូនិកនេះ មានសារៈសំខាន់បំផុត ដើម្បីរួមចំណែកក្នុងការធ្វើឌីជីថលភាវូបនីយកម្មសេដ្ឋកិច្ច។ ជាមួយនោះផងដែរ ក្រសួងពាណិជ្ជកម្មកំពុងតែជំរុញបញ្ចប់នូវសេចក្ដីព្រាងច្បាប់ស្ដីពីពាណិជ្ជកម្មតាមអេឡិចត្រូនិក ហើយកម្មវិធីនេះនឹងអាចសម្រួលដល់ការទូទាត់ប្រាក់ក្នុងការធ្វើពាណិជ្ជកម្មតាមអេឡិចត្រូនិក មិនត្រឹមតែរវាងអ្នកលក់ និងអ្នកទិញនៅក្នុងស្រុកប៉ុណ្ណោះទេ តែនឹងអាចជំរុញដល់ការធ្វើពាណិជ្ជកម្មអេឡិចត្រូនិកឆ្លងព្រំដែនផងដែរ៕
Source: Kampuchea Thmey Daily
0 Comments