យោងតាមការបញ្ជាក់របស់គណៈកម្មការប្រកួតបាល់ទាត់ជាតិកម្ពុជា (CNCC) មន្ត្រីជំនាញរបស់សហព័ន្ធកីឡាបាល់ទាត់ទ្វីបអាស៊ី (AFC) ឯកទេសផ្នែកប្រឹក្សាយោបល់ខាងអាជ្ញាប័ណ្ណក្លិប បានធ្វើដំណើរមកកាន់ប្រទេសកម្ពុជា ដើម្បីចែករំលែកបទពិសោធន៍និងប្រឹក្សាយោបល់ដល់ក្លិបទាំង១២ក្នុងលីគកំពូលកម្ពុជា Metfone Cambodian League 2018។
មន្ត្រីរូបនេះមានឈ្មោះថាJeysing Muthiah អ្នកឯកទេសផ្នែកប្រឹក្សាយោបល់ខាងអាជ្ញាប័ណ្ណក្លិបរបស់សហព័ន្ធកីឡាបាល់ទាត់ទ្វីបអាស៊ី បានជួបប្រជុំជាមួយតំណាងក្លិបទាំង១២នៅកម្ពុជា នៅនៅម៉ោង២និង៣០រសៀល ថ្ងៃពុធទី៣០ ខែឧសភា ឆ្នាំ២០១៨ នៅទីស្នាក់ការសហព័ន្ធកីឡាបាល់ទាត់កម្ពុជា។
លោក ឆាំង ពិសិដ្ឋ លេខាប្រតិបត្តិគណៈកម្មការប្រកួតបាល់ទាត់ជាតិកម្ពុជា ឲ្យដឹងថា លោក Jeysing ជួយពន្យល់ប្រាប់ក្លិបនីមួយៗដែលចង់ក្លាយជាក្លិបស្ដង់ដារមានលក្ខខណ្ឌគ្រប់គ្រាន់ស្របតាមការទាមទាររបស់សហព័ន្ធកីឡាបាល់ទាត់ទ្វីបអាស៊ី ដើម្បីអាចប្រកួតប្រជែងពានកម្រិតអន្តរជាតិបានដូចជា AFC Cup ឬ AFC Champions League។
លោក ឆាំង ពិសិដ្ឋ ត្រូវបានស្រង់សម្តីនៅលើវិបសាយ CNCC ថា «ក្នុងពេលប្រជុំ គាត់និយាយបន្ថែមអំពីអាជ្ញាប័ណ្ណក្លិប ឬ Club Licensing ដើម្បីទទួលបានការទទួលស្គាល់ពី AFC ថាតើក្លិបនោះត្រូវមានលក្ខខណ្ឌអ្វីខ្លះមានលក្ខណៈវិនិច្ឆ័យអ្វីខ្លះ ដើម្បីក្លាយជាក្លិបអាជីពមួយអាចលេង AFC Cup បាន។ ម្យ៉ាងទៀត បើសិនក្លិបមិនទាន់មានលក្ខខណ្ឌគ្រប់តាមតម្រូវការរបស់ AFC ទេ យ៉ាងហោចណាស់ក្លិបទាំងអស់ត្រូវមានអាជ្ញាប័ណ្ណផ្ដល់ដោយសហព័ន្ធដើម្បីលេងក្នុងលីគជាតិដែរ»។
នេះជាលើកទី៣ហើយដែល AFC បញ្ជូនមន្ត្រីមករៀបចំវគ្គ «អាជ្ញាប័ណ្ណក្លិបប្រចាំឆ្នាំ» នៅកម្ពុជា។ អ្វីដែលជាពិសេសនោះ ក្លិបដែលមានអាជ្ញាប័ណ្ណក្លិបប្រចាំឆ្នាំ២០១៨ នេះអាចចេញប្រកួតពានរង្វាន់បាល់ទាត់ផ្លូវការកម្រិតអន្តរជាតិរបស់ AFC បាន។ សូមបញ្ជាក់ថា កាលពីឆ្នាំ២០១៧ កន្លងទៅក្នុងចំណោមក្លិបទាំង១២របស់កម្ពុជា មានតែក្លិបចំនួន៦ប៉ុណ្ណោះ ដែលទទួលបានអាជ្ញាប័ណ្ណពី AFC ដោយក្នុងនោះមានព្រះខ័នរាជស្វាយរៀង, បឹងកេតអែហ្វស៊ី, ណាហ្គាវើល, ក្រសួងការពារជាតិ, ភ្នំពេញក្រោន និងខេមបូឌានថាយហ្គឺរ (អង្គរថាយហ្គឺរ)៕
Source: Kampuchea Thmey Daily
0 Comments