រដ្ឋអាជ្ញាបាននិយាយថា មនុស្សពីរនាក់បានរងរបួសនៅក្នុងទីក្រុងមួយនៃភាគខាងត្បូងប្រទេសបារាំងកាលពីថ្ងៃអាទិត្យនៅពេលដែលស្ត្រីម្នាក់ដែលស្រែកថា “Allahu akbar” (ព្រះជាម្ចាស់ដ៏អស្ចារ្យ) បានវាយប្រហារពួកគេនៅក្នុងផ្សារទំនើបមួយជាមួយនឹងកាំបិត។
រដ្ឋអាជ្ញា Bernard Marchal បានប្រាប់ទីភ្នាក់ងារ AFP ថា អតិថិជនម្នាក់ត្រូវបានវាយប្រហារចំទ្រូងក្នុងអំឡុងពេលវាយប្រហារពេលព្រឹកនៅទីតាំង La Seyne-sur-Mer ខាងក្រៅកំពង់ផែ Toulon ប៉ុន្តែរបួសមិនបានគំរាមកំហែងដល់ជីវិតទេ។
ស្ត្រីម្នាក់ដែលកំពុងធ្វើការនៅកន្លែងគិតលុយក៏ត្រូវបានមុតនៅលើភ្នែករបស់នាងផងដែរ។ អ្នករបួសទាំងពីរត្រូវបានបញ្ជូនទៅកាន់មន្ទីរពេទ្យ។
លោក Marchal បាននិយាយថា “វាហាក់ដូចជាករណីដាច់ដោយឡែកមួយដែលបង្កឡើងដោយមនុស្សម្នាក់ដែលមានបញ្ហាចិត្តសាស្ត្របើទោះបីជានោះមិនរាប់បញ្ចូលលទ្ធភាពដែលថា នាងអាចនឹងត្រូវបានគេដាក់មនោគមន៍ឲ្យអនុវត្តការវាយប្រហារក៏ដោយ”។
រដ្ឋអាជ្ញាបាននិយាយថា “សាក្សីជាច្រើនបានដកស្រង់សម្តីរបស់នាងដែលនិយាយថា ព្រះអាឡស់បានប្រាប់នាងឲ្យធ្វើហើយថាពួកគេសុទ្ធតែជាមនុស្សលាក់ពុតនិងថានាងចង់ឲ្យប៉ូលីសសម្លាប់នាង”។ លោកបានបន្ថែមថា “ផ្ទុយទៅនឹងអ្វីដែលត្រូវបានគេនិយាយពីដំបូង នាងមិនមានពាក់ស្បៃមុខទេប៉ុន្តែនាងពាក់អាវរឹបពណ៌ខ្មៅលើខោខ្មៅនិងវ៉ែនតាខ្មៅ”។
ប្រទេសបារាំងបានប្រុងប្រយ័ត្នខ្ពស់បន្ទាប់ពីការវាយប្រហារជីហាដជាច្រើនលើកចាប់តាំងពីដើមឆ្នាំ២០១៥មកដែលជាញឹកញាប់ធ្វើឡើងដោយមនុស្សដែលបានក្លាយទៅជារ៉ាឌីកាល់ឬអះអាងថាបានធ្វើសកម្មភាពក្នុងនាមក្រុមរដ្ឋឥស្លាម។
អ្នកវាយប្រហារអាយុ២៤ឆ្នាំដែលមិនមានកំណត់ត្រាប៉ូលិសគឺត្រូវទប់ទល់ដោយអតិថិជនម្នាក់និងបុគ្គលិកផ្សារទំនើបពីរនាក់ហើយត្រូវបាននាំទៅឃុំខ្លួន។
គួរបញ្ជាក់ជាថ្មីថា មនុស្សជាង២៤០នាក់ត្រូវបានសម្លាប់នៅក្នុងការវាយប្រហារដោយពួកជីហាដចាប់តាំងពីការសម្លាប់រង្គាលនៅក្នុងការិយាល័យរបស់ទស្សនាវដ្តី Charlie Hebdo ក្នុងទីក្រុងប៉ារីសកាលពីខែមករាឆ្នាំ២០១៥៕ AFP
Source: Kampuchea Thmey Daily
0 Comments