បាត់ដំបង ៖ បុគ្គលិកក្រុមហ៊ុនម្នាក់ បានរងរបួសជាទម្ងន់ ព្រមទាំងបានបញ្ជូនទៅកាន់មន្ទីរពេទ្យបង្អែកខេត្ត ដើម្បីសង្គ្រោះផងដែរ ខណៈដែលជនរងគ្រោះរូបនេះ កំពុងអង្គុយធ្វើការនៅក្នុងប៊ុយរ៉ូ ហើយបានងាកបង្វិលកៅអីបន្តិចស្រាប់តែបូមខាងក្រោមបានផ្ទុះឡើងតែម្តង។
ហេតុការណ៍ដ៏កម្រនេះ បានកើតឡើងនៅថ្ងៃទី ៤ ខែមិថុនា ឆ្នាំ២០១៨ វេលាម៉ោង ៨ និង ៣០ នាទី ព្រឹក ត្រង់ចំណុចភូមិថ្មគោលត្បូង ឃុំតាពូង ស្រុកថ្មគោលខេត្តបាត់ដំបង ក្នុងស្តង់លក់ម៉ូតូយីហោ ហ៊ុយ ហួក បង្កនូវការភ្ញាក់ផ្អើលយ៉ាងខ្លាំង និងធ្វើអោយមនុស្សម្នាមួយចំនួន ចង់រាងចាលក្នុងការអង្គុយនៅលើកៅអីបង្វិលនេះ។
បុគ្គលិកក្រុមហ៊ុនដែលរងរបួសនោះមានឈ្មោះ យ៉ាន លីហូវ ភេទប្រុស អាយុ ២១ ឆ្នាំ មានទីលំនៅភូមិក្បាលខ្មោច ឃុំជ្រៃ ស្រុកថ្មគោល ខេត្តបាត់ដំបង ដោយនៅមុនពេលកើតហេតុ គឺបុគ្គលិករូបនេះនៅអង្គុយលើកៅអីជាធម្មតា ប៉ុន្តែខណៈដែលគេបានបង្វិលខ្លួន និងសារ៉េ កៅអី ដោយបានអោនទៅមើលផងនោះ ក៏ស្រាប់តែបូមខាងក្រោម បានផ្ទុះឡើង បណ្តាលអោយបំណែកកៅអីខ្ទាតត្រូវត្រង់គ្រាប់ភ្នែកខាងឆ្វេង រងរបួសជាទម្ងន់។
ភ្លាមៗនោះដែរ ក្រុមហ៊ុនក៏បានបញ្ជូនជនរងគ្រោះទៅកាន់មន្ទីរពេទ្យបង្អែកខេត្ត ដើម្បីសង្គ្រោះ ដោយបញ្ហានេះដែរ គេនៅមិនទាន់ស្គាល់ម៉ាកកៅអីនេះនៅឡើយទេ ដោយសារតែការផ្ទុះបូមនេះវាដូចជាងាយពេក និងធ្វើអោយអ្នកដទៃស្ទើរតែមិនហ៊ានអង្គុយតទៅទៀត៕
Source: Kampuchea Thmey Daily
0 Comments