បើកឆាក​ខ្សែក្រវាត់​ខា​រ៉ា​បាវ ​៖​ ឡុង ជិន និង យុគ យក្ស​ផ្លែ យកឈ្នះ​ថៃ​ដូចគ្នា​

អ្នក​ប្រដាល់​ជើង​ខ្លាំង​របស់​កម្ពុជា​ឡុង ជិន ក្លិប​ខ្លារខិន​មាន​រិ​ទ្ធ និង យុគ យក្ស​ផ្លែ អ្នក​ប្រដាល់​ក្លិប​បូរី​រាជសីហ៍​មាន​រិ​ទ្ធ បាន​វាយ​ឈ្នះ​អ្នក​ប្រដាល់​ថៃ​ដូចគ្នា នៅក្នុង​ការចាប់ផ្តើម​ថ្ងៃ​ដំបូង នៃ​ព្រឹត្តិការណ៍​ប្រដាល់​ដណ្តើម​ខ្សែក្រវាត់​ខា​រ៉ា​បាវ​រដូវ​កាល​ទី​៦​ទម្ងន់​៥៧​គីឡូក្រាម កាលពី​ថ្ងៃ​សៅរ៍ ទី​០២ ​មិថុនា​២០១៨ នៅ​សង្វៀន​SEATV។

សម្រាប់​ការប្រកួត​ជម្រុះ​ថ្ងៃ​ដំបូង​នេះ ឡុង​ជិន បាន​ផ្តួល​Phat Thou ក្នុង​ទឹក​ទី​១​។ នេះ​ជាការ​ជ័យជំនះ​លើក​ទី​១​របស់​ឡុង ជិន នៅក្នុង​ការប្រកួត​ជម្រុះ​ជុំ​ទី​១​នេះ ។ ឡុង ជិន បាន​ប្រើ​កណ្តាប់​ដៃស្តាំ​ដាល់​ចំ​ចុងដង្ហើម​របស់​Phat Thou ក្នុងពេលដែល​អ្នក​ប្រដាល់​ថៃ​រូបនេះ ព្យាយាម​ចូលមក​រក​វាយ​គេ​នោះ ធ្វើ​ឲ្យ​Phat Thou សន្លប់​លែង​ក្រោក។​

ចំពោះ យុគ យក្ស​ផ្លែ វិញ បាន​ប្រកួត​ឈ្នះ​អ្នក​ប្រដាល់​ថៃ​Phat Seila ដោយ​ពិន្ទុ​។ នេះ​ជាការ​ឈ្នះ​ជុំ​ទី​១ របស់​យុគ យក្ស​ផ្លែ ក្នុងការ​ប្រកួត​ជម្រុះ​ខ្សែក្រវាត់​ខា​រ៉ា​បាវ​នេះដែរ ។​

ការ​ឈ្នះ​របស់​យក្ស​ផ្លែ ចាត់ទុកថា​ជាការ​ហេង​របស់គេ​ហើយ ក្រោយ​ពេលដែល​គេ​គ្រវាសដៃ​ត្រូវ​Phat Seila មួយ​ដៃ​ចំ​កញ្ចឹងក បណ្តាលអោយ​Phat Seila​ដួល​វង្វេងទិស​នោះ ។​តែ​ក្រោយ​អាជ្ញាកណ្តាល​រាប់​ដល់​៨ Phat Seila គេ​ប្រកួត​បន្តទៀត​បាន​រហូតដល់​ចប់​ទឹក​ទី​៥ និង​ចាញ់​ពិន្ទុ​យក្ស​ផ្លែ ដោយ​ការរាប់​ម្តងនេះ​ឯង។

សូមបញ្ជាក់ថា ការប្រកួត​ជើងឯក​ខា​រ៉ា​បាវ​រដូវ​កាល​ទី​៦ ទម្ងន់​៥៧​គីឡូក្រាម​នេះ មាន​អ្នក​ប្រដាល់​ខ្លាំងៗ​ចំនួន ៨ រូប ចូលរួម​ប្រកួត គឺ​ខ្មែរ​៤​នាក់ ថៃ​៤​នាក់ ។ អ្នក​ប្រដាល់​ខ្មែរ​ទាំង​៤​នាក់​នោះ រួមមាន ឈុត សេរី​វ៉ាន់​ថង​ក្លិប​រា​ហ៊ូ​កីឡា​ខេត្តបាត់ដំបង​, ធន មករា សមា គម​កីឡាប្រដាល់​ក្រសួងការពារជាតិ , ឡុង ជិន ក្លិប​ខ្លារខិន​មាន​រិ​ទ្ធ និង យុគ យក្ស​ផ្លែ​ក្លិប បូរី​រាជសីហ៍​មាន​រិ​ទ្ធ ។ ឯ​អ្នក​ប្រដាល់​ថៃ ៤ នាក់​វិញ មាន Kamlay Yuok , Phat Thou , Phat Seila និង Phach Yaksou។

ចំពោះ​ការប្រកួត​ក្រៅពី​គូ​ខ្សែក្រវាត់​នេះ ទី ព​ន្លែ​ត អ្នក​ប្រដាល់​ក្លិប​អង្គរ​មានជ័យ​ខេត្តសៀមរាប បាន​វាយ​ចាញ់​ទេស ជីវ៉ា អ្នក​ប្រដាល់​ក្លិប​កងពលតូច​លេខ​៧០​ដោយ​ពិន្ទុ ហើយ​កំពែង​ខ្មៅ អ្នក​ប្រដាល់​សមាគម​កីឡាប្រដាល់​ក្រសួងកសិកម្ម វាយ​ឈ្នះ​សេន កុសល អ្នក​ប្រដាល់​ក្លិប​មោងឫស្សី​មរតក​គុន​ខ្មែរ​ខេត្តបាត់ដំបង​ដោយ​ពិន្ទុ៕

ឃីម បូរ៉ា ឈ្នះ Phat Chhayak Phum ឯ ហេង សំរាំង ឈ្នះ​អេ​ហ្សី​ប​Mohamad Gamel
​ឃីម បូរ៉ា អ្នក​ប្រដាល់​ក្លិបរ​ស្ម​ភូមិ​គាប​ខេត្តបន្ទាយមានជ័យ និង ហេង សំរាំង អ្នក​ប្រដាល់​ក្លិប​ព្រៃទទឹង​ខេត្តបាត់ដំបង ពួកគេ​ទាំងពីរ​នាក់​នេះ បាន​វាយ​ឈ្នះ​អ្នក​ប្រដាល់​បរទេស​ដូចគ្នា នៅក្នុង​ការជួប​ប្រកួត​គ្នា​លើស​ង្វៀន​Ganzberg របស់ SEA-TV កាលពី​យប់​ថ្ងៃទី​០២​មិថុនា​២០១៨ ។​

ឃីម​បូរ៉ា អ្នក​ប្រដាល់​ជើង​ខ្លាំង បាន​ផ្តួល​អ្នក​ប្រដាល់​ជើង​ខ្លាំង​មកពី​ប្រទេស​ថៃ​ឈ្មោះ Phat Chhayak Phum អោយ​សន្លប់​នៅក្នុង​ទឹក​ទី​២ ។ បូរ៉ា លើក​នេះ គេ​ធ្វើ​បានល្អ ដោយ​ប្រើ​ជង្គង់​បត់​ខ្លី​អុក​ចំ​ចុងដង្ហើម Phat Chhayak Phum បណ្តាល​ឲ្យ​អ្នក​ប្រដាល់​ថៃ​រូបនេះ ដេក​លែង​ក្រោក ។​
Phat Chhayak Phum នេះ ជា​ជើង​ខ្លាំង​ធ្លាប់​វាយ​ឈ្នះ​ចាន់ ប៊ុន​ហឿន អ្នក​ប្រដាល់​ក្លិប​ថ្មគោល​ពោធិ​សែន​ជ័យ​ឲ្យ​សន្លប់​ក្នុង​ទឹក​ទី​៣ តែ​លើក​នេះ​មក​ល័​ក្ខ​ត្រង់​ជង្គង់​របស់​ឃីម បូរ៉ា តែ​ក្នុង​ទឹក​ទី​២ ប៉ុណ្ណោះ ។

ចំពោះ ហេង សំរាំង អ្នក​ប្រដាល់​ក្លិប​ព្រៃទទឹង​ខេត្តបាត់ដំបង បាន​ផ្តួល​អ្នក​ប្រដាល់​ជនជាតិ​អេ​ហ្សី​ប Mohamad Gamel អោយ​បោះបង់​ការប្រកួត​ក្នុង​ទឹក​ទី​៤ ។​អ្នក​ប្រដាល់​ជើងចាស់​របស់​កម្ពុជា និង​អ្នក​ប្រដាល់​អេ​ហ្សី​ប​នេះ ពួកគេ​ទាំងពីរ​ប្រកួត​គ្នា​ក្នុង​ទម្ងន់​៧១​គីឡូក្រាម។

Mohamad Gamel ប្រកួត​ក្នុង​ពីរ​ទឹក​ដំបូង មានប្រៀប​លើ​ហេង សំរាំង ប៉ុន្តែ​ចាប់ពី​ទឹក​ទី​៣​និង​ទឹក​ទី​៤ ក្រោយពី​សំរាំង​ទាត់​ជើង​ក្រោម​និង​ចាប់​អុក​ជង្គង់​ត្រូវ​ច្រើន​នោះ ។ ទីបំផុត ក្នុង​ទឹក​ទី​៤ Mohamad Gamel បានសម្រេច​បោះបង់ចោល​ការប្រកួត បន្ទាប់ពី​សំរាំង វាយ​ដួល​ជា​លើក​ទី​២​នោះ​។
​ចំណែក ពុទ្ធ សំបូរ អ្នក​ប្រដាល់​ក្លិប​ពុទ្ធ​សេរី​វង្ស​កីឡា​វិញ គេ​បាន​វាយ​ឈ្នះ​សូត្រ ខេ​វិ​ន អ្នក​ប្រដាល់​ក្លិប​បក្សី​ស្លាប​ដែក ដោយ​ពិន្ទុ ហើយ​លី ភា អ្នក​ប្រដាល់​ក្លិប​សំរោង​កោង​ខេត្តបាត់ដំបង វាយ​ឈ្នះ​ជ័យ ស៊ី​នេ​ត អ្នក​ប្រដាល់​ក្លិប​ឃ្លាំងមឿង​កីឡា​ខេត្តពោធិសាត់​ដោយ​ពិន្ទុ ៕​



Source: Kampuchea Thmey Daily