ប្រទេសថៃ ៖ បុរសម្នាក់ ដែលជាពលករខ្មែរ ទៅធ្វើការនៅក្នុងប្រទេសថៃ បានស្លាប់ភ្លាមៗនៅក្នុងហេតុការណ៍នៃគ្រោះធម្មជាតិ ខណៈដែលពួកគេកំពុងសម្រាកនៅក្នុងរោងយ៉ាងលង់លក់ទៅហើយនោះ ក៏ស្រាប់តែមានភ្លៀងធ្លាក់ ថែមទាំងមានខ្យល់បោកបក់យ៉ាងខ្លាំងថែមទៀត។
ហេតុការណ៍នេះដែរ គឺបានកើតឡើង កាលពីវេលាម៉ោងប្រមាណ ១០យប់ ថ្ងៃទី១១ ខែមិថុនា ឆ្នាំ២០១៨ ត្រង់បរិវេណចម្ការកៅស៊ូ មួយកន្លែង ស្ថិតក្នុង ឃុំតៈខៀន ស្រុកតៈខៀន ខេត្តត្រាត ប្រទេសថៃ។
បើតាមប្រភពដែលជាកម្មករដូចគ្នាបាននិយាយថា ពួកគេគឺជាពលករខ្មែរដែលមកធ្វើការនៅក្នុងចម្ការកៅស៊ូនេះ ដោយម្នាក់ៗបានបោះជំរំ ធ្វើរោងសម្រាប់ស្នាក់នៅ ក្នុងចម្ការតែម្តង។ នៅមុនពេលកើតហេតុ គឺមានភ្លៀងធ្លាក់យ៉ាងខ្លាំង ព្រមទាំងមានខ្យល់ព្រមទាំងបក់ថែមទៀត ចៃដន្យស្រាប់តែមានដើមកៅស៊ូមួយដើម បានបាក់មកស្រស់ៗ ហើយបានសង្កត់ទៅលើរោងដែលមានកម្មករកំពុងស្នាក់នៅ បណ្តាលអោយត្រូវចំពលករ ខ្មែរម្នាក់ឈ្មោះ ចាន់ ដា ភេទប្រុស អាយុ៣២ឆ្នាំ បាក់ កស្លាប់ភ្លាមៗនៅនឹងកន្លែង។
ក្រោយពីមានការចុះត្រួតពិនិត្យពីសំណាក់សមត្ថកិច្ចថៃរួចមក ទើបសពត្រូវបានប្រគល់ទៅអោយសាច់ញាតិ ក្នុងការរៀបចំបញ្ជូនទៅកាន់ស្រុកកំណើតវិញ ដើម្បីរៀបចំធ្វើបុណ្យតាមប្រពៃណី នៅស្រុកខ្មែរ ដែលជាស្រុកកំណើត៕
Source: Kampuchea Thmey Daily
0 Comments