កណ្តាល ៖ ក្រុមការងារគណបក្សប្រជាជនកម្ពុជា ប្រចាំឃុំត្រើយស្លា ស្រុកស្អាង ខេត្តកណ្តាល ដែលមានកញ្ញា ធី សុវណ្ណថា ជាអនុប្រធានទី១ នៃគណៈពង្រឹងមូលដ្ឋាននោះ បានចាប់អនុវត្តគម្រោងទី១៦ គឺដាក់ភ្លើងបំភ្លឺផ្លូវ និងបន្ថែមបង្គោលភ្លើងទូទាំង៩ភូមិ ដែលគម្រោងនេះ ធ្វើឡើងបន្ទាប់ពីគម្រោងសាងសង់ផ្លូវ ស្ពាន និងផ្តល់សេវាជាច្រើនដល់ពលរដ្ឋនៅទីនោះ។
កញ្ញា ធី សុវណ្ណថា បានបញ្ជាក់យ៉ាងនេះថា “ចាប់ពីខែនេះ (អនុវត្តគម្រោងទី១៦) ខ្ញុំឧបត្ថម្ភ 900$ / ១ខែ (50ភាគរយ នៃតម្លៃអគ្គិសនីបំភ្លឺផ្លូវ) ដើម្បីជួសជុលខ្សែ អំពូល និងបន្ថែមបង្គោលភ្លើងផ្លូវ ទូទាំង៩ភូមិ នៅឃុំត្រើយស្លា ស្រុកស្អាង ខេត្តកណ្តាល...”។
សូមបញ្ជាក់ថា ប្រធានអង្គការយុវជនកិច្ចការសង្គម កញ្ញា ធី សុវណ្ណថា កាលពីថ្មីៗនេះ បានសម្រេចគម្រោងដ៏ធំមួយ គឺប្រជាពលរដ្ឋនៅឃុំត្រើយស្លា ស្រុកស្អាងទាំងអស់ ទទួលបានសេវាពិនិត្យ ព្យាបាលជំងឺទូទៅ និងសម្រាលកូននៅមណ្ឌលសុខភាពឃុំ ដោយមិនគិតថ្លៃ១០០ភាគរយ។
កញ្ញា ធី សុវណ្ណថា ត្រូវបានសម្តេចអគ្គមហាសេនាបតីតេជោ ហ៊ុន សែន ប្រធានគណបក្ស សម្រេចតែងតាំងជាអនុប្រធានទី១ នៃគណៈពង្រឹងមូលដ្ឋានឃុំត្រើយស្លា ខេត្តកណ្តាល កាលពីថ្ងៃទី០៩ ខែមីនា ឆ្នាំ២០១៨៕
Source: Kampuchea Thmey Daily
0 Comments