ភ្នំពេញ ៖ លោកហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានអះអាងថា បើទោះបីជាមិនមានអង្គការ សមាគម ក្រៅរដ្ឋាភិបាលមួយចំនួន ចូលរួមសង្កេតការណ៍បោះឆ្នោតជ្រើសតាំងតំណាងរាស្ត្រ នាពេលខាងមុខនេះ ក៏មិនមានផលអ្វីប៉ះពាល់ ទៅដល់ដំណើរការ ឬ ភាពត្រឹមត្រូវនៃការបោះឆ្នោតនោះទេ ហើយដំណើរការនេះ នឹងប្រព្រឹត្តិទៅតាមការគ្រោងទុក។
ការលើកឡើងរបស់អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) គឺបន្ទាប់ពីមានអង្គការមួយចំនួនតូចបានប្រកាសមិនចូលរួមសង្កេតការណ៍ នៅក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ ជាពិសេសអង្គការតម្លាភាពកម្ពុជា របស់លោក ព្រាប កុល ដែលទើបប្រកាសមិនចូលរួមសង្កេតការណ៍ កាលពីថ្ងៃទី២០ ខែមិថុនា ថ្មីៗនេះ។
ទាក់ទងបញ្ហានេះ លោក ហង្ស ពុទ្ធា បានអះអាងថា មកដល់ពេលនេះ គ.ជ.ប បានទទួលស្គាល់អង្គការ សមាគមចំនួន៦០ហើយ ដោយមានអ្នកសង្កេតការណ៍ជាង៣៤០០០នាក់ ហើយកំពុងតែពិនិត្យអង្គការ សមាគមចំនួន៤២ទៀត ដែលបានដាក់ពាក្យមក គ.ជ.ប សុំចុះបញ្ជីអ្នកសង្កេតការណ៍ជាង៧ពាន់នាក់ទៀត។
លោកបន្តថា នេះបញ្ជាក់ឲ្យឃើញថា ទោះបីជាមិនមានអង្គការខ្លះ មិនចូលរួមសង្កេតការណ៍ក៏ដោយ ប៉ុន្តែមានអង្គការជាច្រើនបានចូលរួមសង្កេតការណ៍។
តាមលោក ហង្ស ពុទ្ធា គ.ជ.ប ចាត់ទុកថា អ្នកសង្កេតការណ៍ជាភាគីពាក់ព័ន្ធមួយយ៉ាងសំខាន់ ក្នុងការឆ្លុះបញ្ចាំងនៃដំណើរការបោះឆ្នោត។ គ.ជ.ប ទទួលយកការតិះទៀន ដើម្បីស្ថាបនា ប៉ុន្តែក៏មិនទទួលយកការតិះទៀនណាមួយ តាមបែបការផ្តួលរំលំដំណើរការបោះឆ្នោតនៅកម្ពុជានោះទេ ហើយក្នុងនាមស្ថាប័នទទួលខុសត្រូវការបោះឆ្នោតនៅតែបន្តស្វាគមន៍ចំពោះអង្គការមិនមែនរដ្ឋាភិបាលផ្សេងទៀត ដែលមិនទាន់ដាក់ពាក្យ ហើយគ.ជ.ប នៅទទួលរហូតដល់ថ្ងៃទី២៥ ខែកក្កដា។
លោក ហង្ស ពុទ្ធា បានឲ្យដឹងដែរថា រហូតមកដល់ពេលនេះ ស្ថានទូតចំនួន២ បានដាក់អ្នកសង្កេតការណ៍ឃ្លាំមើលការបោះឆ្នោត គឺមានស្ថានទូតចិន និងមីយ៉ាន់ម៉ា ហើយរដ្ឋាភិបាលឥណ្ឌូនេស៊ី កាលពីថ្មីៗនេះ បានបញ្ជាក់ដែរថា នឹងបញ្ជូនអ្នកសង្កេតការណ៍ពីរក្រុមមកសង្កេតការណ៍បោះឆ្នោតជ្រើសតាំងតំណាងរាស្ត្រ នីតិកាលទី៦ នៅថ្ងៃទី២៩ ខែកក្កដាឆ្នាំ ២០១៨ ខាងមុខនេះផងដែរ ហើយតាមឯកអគ្គរដ្ឋទូតឥណ្ឌូណេស៊ីប្រចាំកម្ពុជា លោក SUDIRMAN Haseng បានអះអាងនៅក្នុងជំនួបជាមួយលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិថា អ្នកសង្កេតការណ៍ចំនួនពីរក្រុមនោះ ក្រុមទី១ ដឹកនាំដោយឥស្សរជនជាន់ខ្ពស់របស់ឥណ្ឌូណេស៊ី និងក្រុមទី២ ដឹកនាំដោយអ្នកការទូតជាន់ខ្ពស់របស់ឥណ្ឌូណេស៊ី៕
Source: Kampuchea Thmey Daily
0 Comments