ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រ កម្ពុជា បានចាត់ទុកថា កុមារគឺជាធនធានមនុស្សដែលមិនអាចខ្វះបានសម្រាប់អភិវឌ្ឍប្រទេសជាតិនាពេលអនាគត។ ដូច្នេះដើម្បីឲ្យធនធានមនុស្សប្រកបដោយ សក្ដានុពល ការផ្តល់ការការពារ និងអភិវឌ្ឍកុមារគឺជាភារកិច្ចយ៉ាងសំខាន់ ដែលតម្រូវឲ្យមានការអនុវត្តតាមបែបពហុវិស័យបញ្ចូលគ្នា ហើយសកម្មភាពអាទិភាពទាំងឡាយ ដែលត្រូវអនុវត្តរួមមាន ការងាររៀបចំក្របខ័ណ្ឌគតិយុត្តិ ការកែលម្អយន្តការពិនិត្យតាមដាននិងវាយតម្លៃការអភិវឌ្ឍសមត្ថភាព ការពង្រីកសេវាអប់រំ ការការពារ និងថែទាំសុខភាពដល់កុមារ ការអប់រំមូលដ្ឋានឲ្យបានទាន់ពេលវេលាដល់កុមារ ដោយផ្តោតជាពិសេសលើកុមាររងគ្រោះ កុមារងាយរងគ្រោះនិងកុមារដែលមានជីវភាពក្រីក្រ។
ប្រសាសន៍ខាងលើរបស់សម្តេចតេជោនាយករដ្ឋមន្ត្រី បានធ្វើឡើងនៅក្នុងសារលិខិតរបស់សម្តេច ក្នុងឱកាសអបអរសាទរខួបលើកទី ៦៩ ទិវាកុមារអន្តរជាតិ ១ មិថុនា ខួបលើកទី១០៧ ទិវាពិភពលោកប្រឆាំងពលកម្មកុមារ ១២ មិថុនា និងទិវាកុមារកម្ពុជាឆ្នាំ ២០១៨។ ក្នុងសារលិខិតនោះ ប្រមុខរាជរដ្ឋាភិបាលកម្ពុជាបានធ្វើការអំពាវនាវដល់ទៅឲ្យក្រសួងនិងស្ថាប័នពាក់ព័ន្ធយកចិត្តទុកដាក់ជំរុញឲ្យមានការពន្លឿនសកម្មភាពដើម្បីសម្រេចគោលដៅអភិវឌ្ឍប្រកបដោយចីរភាពស្ដីពីបរិយាកាសដែលមានសុវត្ថិភាព និងសន្តិសុខសម្រាប់កម្មករទាំងអស់ត្រឹមឆ្នាំ២០៣០និងគោលដៅស្ដីពីការបញ្ចប់រាល់ទម្រង់ទាំងអស់នៃពលកម្មកុមារត្រឹមឆ្នាំ២០២៥។
ជាមួយគ្នានោះដែរ ប្រមុខរាជរដ្ឋាភិបាលក៏បានធ្វើការអំពាវនាវចំនួន ៧ ចំណុចទៅដល់ក្រសួងនិងស្ថាប័នពាក់ព័ន្ធដើម្បីគាំទ្រដល់កុមារ រួមមាន៖ ទី១-ក្រុមប្រឹក្សាជាតិកម្ពុជាដើម្បីកុមារត្រូវបន្តដឹកនាំចាត់ចែងអនុវត្តអនុសញ្ញាស្តីពីសិទ្ធិកុមារនិងពង្រឹងការអនុវត្តន៍លិខិតបទដ្ឋានគតិយុត្តិពាក់ព័ន្ធនិងការការពារកុមារជាមួយក្រសួងស្ថាប័នដៃគូអភិវឌ្ឍន៍សង្គមស៊ីវិល ប្រកបដោយប្រសិទ្ធភាពព្រមទាំងកសាង នូវលិខិតបទដ្ឋានគតិយុត្តិបន្ថែម ដើម្បីឲ្យប្រព័ន្ធកិច្ចការពារកុមារមានលក្ខណៈគ្រប់ជ្រុងជ្រោយ។ ទី២- ក្រសួងស្ថាប័ន អាជ្ញាធរមូលដ្ឋាន សហគមន៍ និង ពលរដ្ឋគ្រប់រូបត្រូវចូលរួមអនុវត្តគោលនយោបាយភូមិឃុំមានសុវត្ថិភាពពីសេសពីវិធានការការពារកុមារ ពីអំពើហិង្សាគ្រប់រូបភាពអប់រំកុមារពីរបៀបការពារខ្លួនប្រឆាំងនឹងការរំលោភបំពាន ការសម្លុតគំរាមកំហែងគ្រប់បែបយ៉ាង នឹង ត្រូវធ្វើឲ្យកុមារអាចយល់ដឹងពីវិធីរាយការណ៍ ដល់ អាជ្ញាធរ ឬ មនុស្សពេញវ័យដែលជាអ្នកថែទាំពីគេអំពីការរំលោភបំពានដែលពួកគេតាមគ្រប់រូបភាព។
ទី៣-ក្រសួង ស្ថាប័នពាក់ព័ន្ធ ត្រូវបន្តលើកកម្ពស់ការយល់ដឹង និងផ្សព្វផ្សាយអំពីការទប់ស្កាត់ការប្រើប្រាស់ពលកម្មកុមារនៅគ្រប់សកម្មភាពសេដ្ឋកិច្ចនិងពង្រឹងវិធានការអធិការកិច្ចពលកម្មកុមារ ព្រមទាំងស្វែងរកដំណោះស្រាយសមស្របដើម្បីជួយសង្គ្រោះពលកម្មកុមារ។
ទី៤-ក្រសួងស្ថាប័នពាក់ព័ន្ធ ព្រមទាំងអាជ្ញាធរមានសមត្ថកិច្ចគ្រប់លំដាប់ថ្នាក់ ត្រូវយកចិត្តទុកដាក់ជំរុញកុមារដែលមិនបានរៀនសូត្រ ឬ បោះបង់ការ សិក្សាឲ្យមានឱកាសទទួលបានការអប់រំរៀនសូត្រតាមគ្រប់រូបភាពពិសេសត្រូវខិតខំបង្កលក្ខណៈងាយស្រួលដល់កុមារដែលជាជនពិការឲ្យទទួលបានលទ្ធភាពក្នុងការសិក្សា។
ទី៥-បង្កើនការយល់ដឹងដល់ប្រជាពលរដ្ឋក្នុងការកំណត់អត្តសញ្ញាណអំពើរំលោភបំពានលើកុមារនិងការលើកកម្ពស់ការយល់ដឹងចំពោះផលប៉ះពាល់អវិជ្ជមាននៃអំពើរំលោភបំពាន និង ផ្ដល់ភាពខ្លាំងក្លាហានកុមារនិងគ្រួសារក្នុងការរាយការណ៍ពីការរំលោភបំពាននានា។
ទី៦-ការគ្រប់ស្ថានីយវិទ្យុនិងទូរទស្សន៍របស់រដ្ឋនិងឯកជន ព្រមទាំងប្រព័ន្ធផ្សព្វផ្សាយនានា សូមបន្ត ជួយផ្សាយឲ្យបានទូលំទូលាយអំពីការយកចិត្តទុក ដាក់ លើកស្ទួយវិស័យសុខុមាលភាពកុមារនៅកម្ពុជាជាពិសេសពង្រឹងគុណភាពនៃការផលិតកម្មវិធីសម្រាប់កុមារប្រកបដោយខ្លឹមសារអប់រំដើម្បីបង្ការទប់ស្កាត់កុំឲ្យកុមារក្លាយជាជនរងគ្រោះ។
ទី៧-បង្កើនកិច្ចសហប្រតិបត្តិការរវាងក្រសួងស្ថាប័នរដ្ឋដែនដីគ្រប់លំដាប់ថ្នាក់ដៃគួរអភិវឌ្ឍន៍ អង្គការមិនមែនរដ្ឋាភិបាលជាតិ និង អន្តរជាតិដើម្បីលើក កម្ពស់សេវានានា របស់កុមារដោយបន្តបង្កើនការវិនិយោគលើកុមារដែលជាតម្រូវការចាំបាច់បំផុតរបស់មនុស្ស។
ការអំពាវនាវនេះ ធ្វើឡើងនៅក្នុងសារលិខិតអបអរខួបលើកទី ៦៩ ទិវាកុមារអន្តរជាតិ ១ មិថុនា ដែលបានបញ្ជាក់ថា ការប្រារព្ធទិវាដ៏មានអត្ថន័យគឺបង្ហាញអំពីឆន្ទៈមោះមុតនិងការប្ដេជ្ញាចិត្តរបស់រដ្ឋាភិបាល ក្នុងការបន្តលើកកម្ពស់ការអនុវត្ដសិទ្ធិកុមារដើម្បីលើកស្ទួយវិស័យសុខុមាលភាពកុមារឲ្យកាន់តែល្អប្រសើរ សម្រាប់ឧត្តមប្រយោជន៍នៃកុមារនៅកម្ពុជា។
រាជរដ្ឋាភិបាលកម្ពុជាប្រារព្ធទិវាកុមារពីរប្រធានបទរួមគ្នាគឺទិវាកុមារកម្ពុជា និង កុមារអន្តរជាតិ ១ មិថុនាក្រោមប្រធានបទ«រួមគ្នាការពារកុមារ ដើម្បីអភិវឌ្ឍគ្រួសារនិងសង្គម» និង ទិវាពិភពលោកប្រឆាំងពលកម្មកុមារ ១២ មិថុនា ក្រោមប្រធានបទ «ទប់ស្កាត់គ្រោះថ្នាក់ការងារនិងភាពងាយរងគ្រោះផ្នែកសុខភាពសម្រាប់កម្មករនិយោជិតវ័យក្មេងដើម្បីលុបបំបាត់ពលកម្មកុមារ»។
ប្រមុខរាជរដ្ឋាភិបាលបានបន្ថែមថា ទិវាដ៏សំខាន់នេះនឹងជំរុញឲ្យមានការពន្លឿនសកម្មភាព ដើម្បីសម្រេចគោលដៅអភិវឌ្ឍប្រកបដោយចីរភាព ស្ដីពីបរិយាកាសដែលមានសុវត្ថិភាពនិងសន្តិសុខ សម្រាប់កម្មករទាំងអស់ត្រឹមឆ្នាំ ២០៣០ និង គោលដៅស្ដីពីការបញ្ចប់រាល់ទម្រង់ទាំងអស់នៃពលកម្មកុមារត្រឹមឆ្នាំ២០២៥។
សម្ដេចតេជោនាយករដ្ឋមន្ត្រីបានមានប្រសាសន៍ថា ព្រះរាជាណាចក្រកម្ពុជា កំពុងរក្សាបាននូវស្ថិរភាពនយោបាយ សុខសន្តិភាព និងសណ្ដាប់ធ្នាប់សាធារណៈយ៉ាងល្អប្រសើរទូទាំងប្រទេសដែលកត្តានេះបានបង្កលក្ខណៈងាយស្រួលដែលរាជរដ្ឋាភិបាលក្នុងការអភិវឌ្ឍសង្គមជាតិ ដើម្បីគោលដៅកសាងអនាគតកម្ពុជាមួយដែលរុងរឿង ឆ្លើយតបនឹងបំណងប្រាថ្នារបស់ប្រជាជនគ្រប់វ័យ និងគ្រប់ស្រទាប់វណ្ណៈ។ ជាមួយនឹងប្រធានបទដែលបានលើកឡើងខាងលើទិវាដ៏មានសារៈសំខាន់នេះបានជំរុញឲ្យយើងត្រូវខិតខំឲ្យបានខ្លាំងក្លាថែមទៀតលើការអនុវត្តសិទ្ធិចម្បងទាំងបួនរបស់កុមារឲ្យមានប្រសិទ្ធភាព ក្នុងនោះសិទ្ធិទទួលបានការការពារគឺជាសិទ្ធិអាទិភាពចម្បងមួយដើម្បីការពារកុមារ ឲ្យរួចផុតពីហានីភ័យផ្សេងៗ ដូចជាការរើសអើង ការរំលោភបំពាន ការកេងប្រវ័ញ្ច ការមិនយកចិត្តទុកដាក់ចំពោះកុមារ ដែលមានគ្រួសារសាច់ញាតិនិងកុមារជាជនចំណាកស្រុកជាដើម។
ការប្រារព្ធទិវាពិភពលោកប្រឆាំងពលកម្មកុមារ បង្ហាញឲ្យឃើញពីសារៈសំខាន់យ៉ាងខ្លាំងនៃការធ្វើឲ្យប្រសើរឡើងនូវសុវត្ថិភាព និងសុខភាពសម្រាប់កម្មករវ័យក្មេង។ ជាពិសេសប្រយុទ្ធប្រឆាំងនឹងការងារប្រកបដោយគ្រោះថ្នាក់និងលុបបំបាត់រាល់ទម្រង់ទាំងអស់នៃពលកម្មកុមារ។ កុមារត្រូវការចាំបាច់នូវកាអភិវឌ្ឍផ្នែករាងកាយ បញ្ញា ស្មារតី និងការសិក្សាអប់រំរៀនសូត្រ។ ដូចនេះ កុមារត្រូវការថែទាំ ការជួយទំនុកបម្រុងពីគ្រួសារ និងសង្គម ជាពិសេសការលើកកម្ពស់កិច្ចការពារកុមារ ដោយឲ្យកុមារបានសិក្សាអប់រំ ដើម្បីអភិវឌ្ឍសមត្ថភាព ដែលអាចកសាងគ្រួសារប្រកបដោយសុភមង្គល រស់នៅសេចក្ដីថ្លៃថ្នូរ និងជាធនធានសម្រាប់អភិវឌ្ឍន៍ប្រទេស។
ជាមួយគ្នានេះ សម្តេចតេជោ ហ៊ុន សែន បានបញ្ជាក់ថា កិច្ចការពារកុមារគឺជាការងារពហុវិស័យដែលតម្រូវឲ្យអ្នកពាក់ព័ន្ធទាំងអស់យកចិត្តទុកដាក់អនុវត្ត ដោយការទទួលខុសត្រូវខ្ពស់តាមជំនាញរៀងៗខ្លួន ទាំងការលើកកម្ពស់គុណភាពអប់រំ និងបណ្ដុះបណ្ដាលជំនាញ រួមទាំងការពង្រឹងយន្តការការពារកុមារជាដើម។
បច្ចុប្បន្ននេះ ស្ថានភាពសិទ្ធិកុមារកាន់តែមានភាពល្អប្រសើរជាលំដាប់ ដូចជាអត្រាស្លាប់របស់កុមារថយចុះ ការជួយសង្គ្រោះកុមារពីទម្រង់ធ្ងន់ធ្ងរនៃពលកម្ម ហើយកុមារចុះឈ្មោះចូលរៀនកើនឡើង ដែលអាចឲ្យពួកគេទទួលបានការអប់រំបណ្ដុះបណ្ដាលវិជ្ជាជីវៈ តាមរយៈការខិតខំប្រឹងប្រែងរបស់រាជរដ្ឋាភិបាលកន្លងមក៕
Source: Kampuchea Thmey Daily
0 Comments