វិញ្ញាសាបាល់ទាត់បុរស-នារី ស្ថិតក្នុងប្រភេទកីឡាមួយក្នុងចំណោមប្រភេទកីឡាទាំង២៧ប្រភេទ ក្នុងព្រឹត្តិការណ៍កីឡាជាតិលើកទី២ ឆ្នាំ២០១៨ (National Games) ដោយក្នុងនោះក្រុមបាល់ទាត់បុរស មានចំនួន២៥ក្រុម ចែកចេញជា៨ពូល ហើយបាល់ទាត់នារី មាន៨ក្រុមចែកជា២ពូល ខណៈនៅថ្ងៃសុក្រ ទី០១ ខែមិថុនា គណៈកម្មការបានរកឃើញក្រុមឡើងដល់វគ្គផ្តាច់ព្រ័ត្រហើយ។
សរុបលទ្ធផលប្រកួតវគ្គពាក់កណ្ដាលផ្តាច់ព្រ័ត្រផ្នែកបុរសមានក្រុមខេត្តត្បូងឃ្មុំ ចាញ់ក្រុមខេត្តស្វាយរៀង ដោយលទ្ធផល ៣ទល់១ ហើយក្រុមខេត្តកំពង់ឆ្នាំង ចាញ់ក្រុមឧត្តរមានជ័យ ៣ទល់១ លើទីលានមជ្ឈមណ្ឌល និង សាលាបាល់ទាត់ជាតិបាទី។ ចំណែកវិញ្ញាសាផ្នែកនារី វិញក្រុមខេត្តបាត់ដំបង ឈ្នះស្វាយរៀង ដោយបាល់ប៉េណាំងទីកាត់សេចក្តី៥ទល់៣ ក្រោយស្មើគ្នា១ទល់១ នៅម៉ោងពេញ ហើយក្រុមខេត្តកំពង់ស្ពឺ ឈ្នះសៀមរាប ២ទល់០ លើទីលានដូចគ្នា។ ចំណែកកម្មវិធីប្រកួតវគ្គផ្តាច់ព្រ័ត្រ និងវគ្គដណ្តើមចំណាត់ថ្នាក់លេខ៣ នឹងធ្វើឡើងនៅថ្ងៃអាទិត្យ ចុងសប្ដាហ៍នេះដោយប្រើប្រាស់ទីលានមជ្ឈមណ្ឌលនិងសាលាបាល់ទាត់ជាតិបាទី ក្នុងខេត្តតាកែវ ដួចគ្នា។
តាមការកំណត់របស់សហព័ន្ធកីឡាបាល់ទាត់កម្ពុជា វិញ្ញាសាបាល់ទាត់បុរសគឺកំណត់យកក្រោមអាយុ១៧ឆ្នាំ (U17) ហើយក្រុមបាល់ទាត់នារីវិញ យកអាយុ១៦ឆ្នាំឡើងទៅ។ ក្រុមបាល់ទាត់បុរស មានពូល A មាន ពោធិ៍សាត់ បាត់ដំបង ឧត្ដរមានជ័យ សៀមរាប ពូល B មាន ព្រៃវែង ព្រះវិហារ កែប ពូល C មាន បន្ទាយមានជ័យ ព្រះសីហនុ ស្ទឹងត្រែង ពូល D មាន កំពង់ឆ្នាំង កោះកុង ក្រចេះ ពូល E កណ្ដាល ត្បូងឃ្មុំ ក្រសួងការពារជាតិ ពូល F ភ្នំពេញ កំពត ស្វាយរៀង ពូល G មណ្ឌលគីរី រតនគីរី កំពង់ចាម និង ពូល H ប៉ៃលិន កំពង់ស្ពឺ តាកែវ។ ចំណែកក្រុមបាល់ទាត់នារី ពូល A មាន កំពង់ស្ពឺ កំពង់ឆ្នាំង ពោធិ៍សាត់ ស្វាយរៀង ឯពូល B មាន បាត់ដំបង បន្ទាយមានជ័យ សៀមរាប កណ្ដាល។
កាលពីប្រកួតព្រឹត្តិការណ៍កីឡាជាតិលើកទី១ ឆ្នាំ២០១៦ ក្រុមមកពីខេត្តសៀមរាប ដណ្ដើមបានមេដាយមាសផ្នែកបុរស ហើយក្រុមមកខេត្តប៉ៃលិន ដណ្ដើមបានមេដាយមាសផ្នែកនារី។ តាមគម្រោងព្រឹត្តិការណ៍កីឡាជាតិលើកទី២ នឹងធ្វើឡើងចាប់ពីថ្ងៃទី២៥ ឧសភា ដល់ថ្ងៃទី០៥ មិថុនា ឆ្នាំ២០១៨ ដោយមានអត្តពលិកមកពី២៨ក្រសួង និង រាជធានី-ខេត្ត ចូលរួមប្រជែងលើ២៧ប្រភេទកីឡា។
ព្រឹត្តិការណ៍កីឡាជាតិ ឬហៅថា National Games រៀបចំឡើង២ឆ្នាំម្ដង ក្រោមការរៀបចំឡើងដោយក្រសួងអប់រំយុវជននិងកីឡា សហការជាមួយភាគីពាក់ព័ន្ធដើម្បីឲ្យសហព័ន្ធទាំងអស់បានត្រៀមខ្លួនសម្រាប់ព្រឹត្តិការណ៍ស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ National Games ធ្វើឡើងដូចទៅនឹងស៊ីហ្គេម ដោយមានការបើកកម្មវិធី និងបិទកម្មវិធី ហើយវាជាការត្រៀមខ្លួនល្អមួយសម្រាប់កម្ពុជាក្នុងការទទួលរៀបចំព្រឹត្តិការណ៍ធំៗនៅពេលខាងមុខ៕
Source: Kampuchea Thmey Daily
0 Comments