កណ្ដាល ៖ សារធាតុញៀនមេតំហ្វេតាមីនចំនួន៣កញ្ចប់ទម្ងន់១,២៤ក្រាម និង ជញ្ជីងសម្រាប់ថ្លឹង សម្ភារៈវេចខ្ចប់ ត្រូវបានកម្លាំងនគរបាលស្រុកពញាឮចាប់បង្ក្រាបពីជនសង្ស័យប្រុសស្រី២នាក់កាលពី ថ្ងៃទី៣១ ខែឧសភា ឆ្នាំ២០១៨ វេលាម៉ោង ១៥និង១៥នាទី នៅចំណុច ផ្លូវ៥១ ភូមិភូមិដំណាក់ព្រីង ឃុំទំនប់ធំ ស្រុកពញាឮ ខេត្តកណ្តាល។
លោកវរសេនីយ៍ឯក ដួង តេង អធិការនគរបាលស្រុកពញាឮបានឲ្យដឹងថា ជនសង្ស័យចំនួន០២ នាក់ (ឃាត់ខ្លួន) ១ឈ្មោះ ពូន ស៊ីណា ហៅ ញ៉ាញ់ ភេទប្រុស អាយុ២២ឆ្នាំ ជនជាតិខ្មែរ មុខរបរ កម្មករ មាន ទីលំនៅភូមិដំណាក់ព្រីង ឃុំទំនប់ធំ ស្រុកពញាឮ ខេត្តកណ្តាល។ ២ឈ្មោះ ប្រេស ស្រីមុំ ភេទស្រី អាយុ៣៤ឆ្នាំ ជនជាតិខ្មែរ មុខរបរនៅផ្ទះ មានទីលំនៅភូមិអង្គ្រង ឃុំព្រះស្រែ ស្រុកឧត្តុង្គ ខេត្តកំពង់ស្ពឺ។
វត្ថុតាងចាប់យកបាន រួមមានសារធាតុញៀនមេតំហ្វេតាមីន ចំនួន០៣កញ្ចប់តូច ( កញ្ចប់ធំ០១ និង កញ្ចប់តូច០២) ទម្ងន់ ១,២៤ក្រាម,ជញ្ជីងថ្លឹងសារធាតុញៀន០១គ្រឿង,ទូរស័ព្ទ Nokia ចុចពិល០១គ្រឿង និងឧបករណ៍វេចខ្ចប់ មួយចំនួន។
បើតាមលោកអធិការឲ្យដឹងថា នៅថ្ងៃកើតហេតុកម្លាំងផ្នែកជំនាញប្រឆាំងគ្រឿងញៀន និងកម្លាំងផ្នែកនគរបាលយុត្តិធម៌ ចុះល្បាត តាមបណ្តោយផ្លូវ៥១ លុះដល់ចំណុចកើតហេតុ មានប្រជាពលរដ្ឋ រាយការណ៍ថា ជនសង្ស័យខាងលើ កំពុងលក់ថ្នាំញៀន នៅកន្លែងកើតហេតុ ក្រោយពីទទួលព័ត៌មានភ្លាម កម្លាំងផ្នែកជំនាញ សហការជាមួយកម្លាំងប៉ុស្តិ៍រដ្ឋបាលទំនប់ធំ បានចេញប្រតិបត្តិការភ្លាមក៏ជួបជនសង្ស័យ ដែលជាមុខសញ្ញាជួញដូរគ្រឿងញៀន។
កម្លាំងជំនាញបានឃាត់ឆែកឆេរ រកឃើញសារធាតុញៀនចំនួន០៣កញ្ចប់ដូចខាងលើ និងបន្តការឆែកឆេរ កន្លែងដេករបស់ជនសង្ស័យ ចាប់យកមាន ជញ្ជីងថ្លឹងសារធាតុញៀន០១គ្រឿង និងឧបករណ៍វេចខ្ចប់មួយចំនួន។
នៅចំពោះមុខសមត្ថកិច្ចជនសង្ស័យឈ្មោះ ពូន ស៊ីណា ហៅញ៉ាញ់ បានសារភាពថា ថ្នាំញៀន ដែលខ្លួនយកមកធ្វើសកម្មភាពរាល់ថ្ងៃគឺឈ្មោះប្រេស ស្រី មុំ ភេទស្រី នៅភូមិអង្គ្រង ឃុំព្រះស្រែ ស្រុកឧត្តុង្គ ខេត្តកំពង់ស្ពឺជាអ្នកលក់ឲ្យគឺ បីថ្ងៃទៅយកម្តង ក្នុងម្តងតម្លៃ៤០០០០០៛ ( សែសិបម៉ឺនរៀល) ដើម្បីយកមកលក់បន្ត។ ផ្តើមចេញពីចម្លើយសារភាព របស់ជនសង្ស័យឈ្មោះ ពូន ស៊ីណា ហៅញ៉ាញ់ អធិការដ្ឋាននគរបាលស្រុកពញាឮ បានសហការជាមួយអធិការដ្ឋាននគរបាលស្រុកឧត្តុង្គ ស្រាវជ្រាវឃាត់ខ្លួនជនសង្ស័យឈ្មោះ ប្រេស ស្រីមុំ នៅវេលាម៉ោង ១៧ និង៣០នាទី ថ្ងៃដដែលបច្ចុប្បន្នជនសង្ស័យ បានឃាត់ខ្លួននៅអធិការដ្ឋាននគរបាលស្រុកពញាឮ ដើម្បីចាត់ការបន្តតាមនីតិវិធី៕
Source: Kampuchea Thmey Daily
0 Comments