ពានរង្វាន់លីគបាល់ទាត់ក្នុងសាលាឆ្នាំ២០១៨ (National Futsal League 2018) ក្រោមការរៀបចំឡើងដោយសហព័ន្ធកីឡាបាល់ទាត់កម្ពុជា នឹងបន្តប្រកួតសប្ដាហ៍ទី១២ របស់ខ្លួននៅចុងសប្ដាហ៍នេះ ដែលមាន៥គូផ្សេងៗគ្នា ខណៈក្រុមហ្វូតសាល Down Town Spoort កំពុងឈរកំពូលតារាងបណ្តោះអាសន្ន ក្រោយមានពិន្ទុច្រើនជាងរហូតដល់២៦គ្រាប់។
សរុបកម្មវិធីប្រកួតនៅក្នុងសប្ដាហ៍ទី១២ នេះមាននៅថ្ងៃសៅរ៍ ទី២ ខែមិថុនា ឆ្នាំ២០១៨ ក្រុមយុវជន៧មករា ប៉ះក្រុមអាណាចក្របៃតង នៅម៉ោង២និង៣០នាទីរសៀល ហើយនៅម៉ោង៤ល្ងាចក្រុម Panda FC ប៉ះក្រុម Home Sport FC និងនៅម៉ោង៥និង៣០នាទីក្រុមស.ស.យ.ក កំចាយមារ ប៉ះក្រុម Down Town Sport FC។ នៅថ្ងៃអាទិត្យទី៣ ខែមិថុនា ឆ្នាំ២០១៨ ក្រុមឆន្ទៈកីឡា ប៉ះក្រុម Fan Sport FT នៅម៉ោង៤ល្ងាច និងក្រុម B.A United ជួបក្រុមឱម៉ាល់ នៅម៉ោង៥:៣០នាទីល្ងាច។
ងាកមកមើលចំណាត់ថ្នាក់បណ្តោះអាសន្នក្រោយប្រកួតបាន១១លើកម្នាក់មកឃើញថា ក្រុម Down Town Sport FCឈរលេខ១ មាន២៦ពិន្ទុ តាមពីក្រោយដោយក្រុម ស.ស.យ.ក កំចាយមារ ឈរលេខ២ មាន២៤ពិន្ទុ ក្រុមឱម៉ាល់ ឈរលេខ៣ មាន២១ពិន្ទុ ស្មើគ្នាជាមួយក្រុមលេខ៤ Home Sport FC តែខុសគ្រាប់បាល់ចំណេញ។ ក្រុមលេខ៥ អាណាចក្របៃតង មាន១៧ពិន្ទុ ហើយក្រុមលេខ៦ Fan Sport FT មាន១៥ពិន្ទុ។ លេខ៧ ក្រុម Panda FC មាន១៤ពិន្ទុ ហើយក្រុមយុវជន៧មករា ឈរលេខ៨ មាន១០ពិន្ទុ ក្រុមឆន្ទៈកីឡា ឈរលេខ៩ មាន៧ពិន្ទុ និងក្រុមB.A United លេខ១០ មាន៤ពិន្ទុ។
តាមគោលការណ៍កីឡាករដែលអាចចុះឈ្មោះចូលរួមប្រកួតបាន ត្រូវតែមានសញ្ជាតិខ្មែរ ហើយមានអាយុចាប់ពី១៦ឆ្នាំឡើងទៅ (កីឡាករក្រោមអាយុ១៨ឆ្នាំត្រូវមានអត្តសញ្ញាណប័ណ្ណប្រជាជន ឬមានលិខិតអនុញ្ញាតិពីអាណាព្យាបាល)។ ក្រុមនីមួយៗអាចចុះឈ្មោះកីឡាករជា៣ដំណាក់កាលដោយដំបូងត្រូវមានកីឡាករចំនួន២០នាក់ ហើយក្នុងនោះមានអ្នកចាំទី២នាក់។ ដំណាក់កាលទី២ គឺចុះបញ្ជី១២នាក់ចុងក្រោយ (ពីចំនួន២០នាក់ដំបូង) ហើយមានអ្នកចាំទីយ៉ាងតិច២នាក់ និងដំណាក់កាលទី៣ ក្នុងថ្ងៃប្រកួតចុះឈ្មោះកីឡាករ៥នាក់ និងកីឡាករបម្រុង៧នាក់។ កីឡាករដែលមិនអាចចុះឈ្មោះចូលលេងបានគឺជាសមាជិកក្នុងក្លិបដែលចូលលេងក្នុងពានរង្វាន់សម្តេចតេជោ ឆ្នាំ២០១៨ ជាសមាជិកក្នុងក្លិបជាសមាជិកពានរង្វាន់លីគកំពូលកម្ពុជា (Metfone Cambodian League 2018) និងក្លិបជាសមាជិកលីគលំដាប់ទី២ ប្រចាំឆ្នាំ២០១៨។
ការប្រកួតលីគហ្វូតសាលជាលើកដំបូងនៅក្នុងស្រុកនេះ ធ្វើឡើងពីថ្ងៃទី០៣ ខែ មិនា រហូតដល់ថ្ងៃទី២៨ ខែ កក្កដា ឆ្នាំ ២០១៨ ខណៈភាគច្រើនប្រកួតនៅថ្ងៃចុងសប្ដាហ៍ ដែលមានក្រុមជាសមាជិកចំនួន១០ក្រុមលើទីលាន ដឹប្លូស្ព័ត (The Blue Sport) ម្តុំទួលគោក។ ការប្រកួតមានរូបមន្តជាលក្ខណៈប្រកួតបែបលីគ តាមប្រព័ន្ធលីគ២ជុំ (វិលជុំសន្សំពិន្ទុ) ហើយក្រុមដែលមានពិន្ទុច្រើនជាងគេនឹងដណ្តើមបានជើងឯកតែម្តង។ ក្រុមជើងឯកនឹងទទួលបានពានរង្វាន់មួយ មេដាយមាសម្នាក់មួយ និងប្រាក់រង្វាន់២០លានរៀលផងដែរ៕
Source: Kampuchea Thmey Daily
0 Comments