៦គូបន្តប្រកួតក្នុងសប្ដាហ៍ទី៨ ចុងសប្ដាហ៍នេះ ក្នុងពានរង្វាន់លីគកំពូលកម្ពុជា (Metfone Cambodian League 2018) ដែលរៀបចំពីសំណាក់គណៈកម្មការប្រកួតបាល់ទាត់ជាតិ (CNCC) សេនាធិការរបស់សហព័ន្ធកីឡាបាល់ទាត់កម្ពុជា ខណៈក្រុមណាហ្គាវើល កំពុងឈរកំពូលតារាងបណ្តោះអាសន្នបន្ទាប់ពីមាន១៩ពិន្ទុច្រើនជាងក្រុមដទៃ។
កម្មវិធីប្រកួតសរុបប្រចាំសប្ដាហ៍ទី៨នេះមាន នៅថ្ងៃសៅរ៍ ទី២ ខែមិថុនា ក្រុមអាស៊ីអឺរ៉ុប ជួបក្រុមអគ្គស្នងការដ្ឋាននគរបាលជាតិ នៅម៉ោង៣:០០នាទីរសៀលលើទីលានកីឡដ្ឋាន AEU Park ហើយនៅម៉ោងតំណាលគ្នាក្រុមបឹងកេត ប៉ះអង្គរថាយហ្គឺរ នៅលើទីលានមជ្ឈមណ្ឌលហ្វឹកហ្វឺនកីឡាកងយោធពលខេមរភូមិន្ទ (ស្តាតចាស់) និងនៅម៉ោង៦ល្ងាចក្រុមណាហ្គាវើល ប៉ះក្រុមវិសាខា នៅលើទីលានជាមួយគ្នា។ ចំណែកនៅថ្ងៃអាទិត្យ ទី៣ ខែមិថុនា វិញក្រុមវេស្ទើនភ្នំពេញ ទទួលក្រុមភ្នំពេញក្រោន នៅវេលាម៉ោង៣រសៀលលើទីលានកីឡដ្ឋានវេស្ទើន ហើយក្រុមអគ្គីសនីកម្ពុជា ប៉ះក្រុមសូលទីឡូអង្គរ នៅម៉ោងដំណាលគ្នាលើទីលានកីឡដ្ឋានអគ្គីសនីកម្ពុជា និងចុងក្រោយក្រុមព្រះខ័នរាជស្វាយរៀង ទទួលក្រុមក្រសួងការពារជាតិ នៅម៉ោង៦ល្ងាចលើទីលានកីឡដ្ឋានខេត្តស្វាយរៀង។
សរុបចំណាត់ថ្នាក់ត្រឹមសប្ដាហ៍ទី៧ នេះឃើញថា ក្រុមណាហ្គាវើល ឡើងឈរកំពូលតារាង ៤សប្ដាហ៍ជាប់គ្នាមាន១៩ពិន្ទុ តាមពីក្រោយដោយក្រុមលេខ២បឹងកេត មាន១៧ពិន្ទុ។ ក្រុមលេខ៣គឺអគ្គស្នងការដ្ឋាននគរបាលជាតិ មាន១៣ពិន្ទុ ហើយក្រុមលេខ៤វិសាខា មាន១៣ពិន្ទស្មើគ្នាតែឈ្នះតែមត្រង់ Head to Head។ ក្រុមលេខ៥គឺព្រះខ័នរាជស្វាយរៀង មាន១១ពិន្ទុស្មើគ្នាជាមួយលេខ៦ ភ្នំពេញក្រោន។ ក្រុមអង្គរថាយហ្គឺរ ឈរលេខ៧ មាន១០ពិន្ទុ ក្រសួងការពារជាតិ លេខ៨មាន៩ពិន្ទុ ហើយក្រុមលេខ៩ អាស៊ីអឺរ៉ុប មាន៨ពិន្ទុ ក្រុមក្រុមសូលទីឡូអង្គរ ឈរលេខ១០ មាន៤ពិន្ទុហើយក្រុមអគ្គីសនីកម្ពុជា ឈរលេខ១១ មាន៤ពិន្ទុ និងក្រុមវេស្ទើនភ្នំពេញ ឈរលេខ១២ មិនទាន់មានពិន្ទុ។
ពានរង្វាន់លីគកំពូលកម្ពុជា រដូវកាលនេះនឹងប្រើប្រាស់រូបមន្តប្រកួតសន្សំពិន្ទុវិលជុំចំនួន២ជើងមាន២២សប្ដាហ៍ ដើម្បីស្វែងរកក្រុមខ្លាំងដែលមានពិន្ទុច្រើនជាងគេដណ្តើមជើងឯកប្រចាំឆ្នាំ។ ការប្រកួតចាប់ផ្តើមពីថ្ងៃទី៣ ខែមីនា ដល់ថ្ងៃទី៣០ ខែកញ្ញា ឆ្នាំ២០១៨ ដែលមានសមាជិកចំនួន១២ក្រុម។ ក្រុមជើងឯកនឹងទទួលបានកៅអីទៅចូលរួមប្រកួតក្នុងពានរង្វាន់ AFC Cup 2019, ពានរង្វាន់ Mekong Club Championship និងពានរង្វាន់ Singapore Cup ជាដើម៕
Source: Kampuchea Thmey Daily
0 Comments