ភ្នំពេញ ៖ កីឡាករទម្ងន់ធ្ងន់ម្ចាស់ខ្សែក្រវាត់ ISKA ពិភពលោក វ៉ន វីវ៉ា អ្នកប្រដាល់នៃក្លិបកងរាជអាវុធហត្ថរាជធានីភ្នំពេញ ដែលបាត់មុខពីសង្វៀនជាង៣ឆ្នាំមកនេះ បានលេចមុខមកវិញហើយ ហើយត្រូវឡើងសាកកណ្តាប់ដៃជាមួយកីឡាករថៃភិតសាណាន់ ស៊ីតដនឃីង ខណៈកីឡាករវ័យក្មេងឡុង សំណាង អ្នកប្រដាល់របស់ក្លិបសាលវ័ន្តកីឡា ជួបជាមួយកីឡាករថៃហ្វ៊ុនលូង ប៉េឡេបូរីរាំ នៅលើសង្វៀនស៊ីអិនស៊ី នាថ្ងៃអាទិត្យទី០៣ ខែមិថុនា ឆ្នាំ២០១៨នេះ។
កីឡាករវ៉ន វីវ៉ា កាលមិនទាន់បាត់មុខគេជាជើងខ្លាំងរបស់កម្ពុជា ហើយត្រូវឡើងមកជួបជាមួយកីឡាករថៃភិតសាណាន់ ស៊ីតដនឃីង ក្នុងប្រភេទទម្ងន់៨១គីឡូក្រាម កីឡាករថៃម្នាក់នេះធ្លាប់មកប្រកួតនៅកម្ពុជាដែរ ដោយធ្លាប់ចាញ់ពិន្ទុកីឡាករអុង ភារាក់។
កីឡាករវ៉ន វីវ៉ា ក្នុងការឡើងជួបប្រកួតជាមួយកីឡាករថៃលើកទី១បន្ទាប់ពីវិលចូលសង្វៀនវិញនេះ ត្រូវក្រុមអ្នកវិភាគប្រដាល់ក្នុងស្រុក គេមិនមានជំនឿទុកចិត្តលើវ៉ន វីវ៉ា ឈ្នះច្រើននោះទេ ព្រោះថាវីវ៉ា ខានឡើងសង្វៀនយូរណាមួយឡើងគីឡូទៀតផង អាចវាយស្ពឹកនិងឆាប់អស់កម្លាំងស៊ុហ្វ ការដែលឆាប់អស់ស៊ុហ្វនេះ គេត្រូវវាយឆ្លាតហើយ បើគេផ្ដួលបាន វីវ៉ាមិនប្រណីនោះទេ។ ទោះជាយ៉ាងណាលើកនេះ វ៉ន វីវ៉ាមិនអាចមើលស្រាល អ្នកប្រដាល់ជើងខ្លាំងជនជាតិថៃភិតសាណាន់ ស៊ីតដនឃីង នេះបានឡើយ។ ចាំមើលតើ វ៉ន វីវ៉ា និងភិតសាណាន់ ស៊ីតដនឃីង នរណាជាអ្នកឈ្នះ?។
ដោយឡែកកីឡាករជើងខ្លាំងវ័យក្មេង ឡុង សំណាង បច្ចុប្បន្នកំពុងទទួល បានការគាំទ្រយ៉ាងច្រើនកុះករ ពីអ្នកស្នេហាវិស័យកីឡាប្រដាល់កម្ពុជា ជាមួយនឹងការចេះប្រើក្បាច់គ្រប់ស្នៀត ជាពិសេសរូបគេចូលចិត្តប្រើស្នៀតកណ្តាប់ដៃនិងកែង ដែលអាចវាយចេញជាប្រយោលក៏បាន ចូលកៀកក៏បាន ដើម្បីផ្ដួលគូប្រកួតរបស់ខ្លួន រួមផ្សំជាមួយកម្លាំងស៊ុហ្វដ៍ខ្លាំងរបស់គេផងនោះ ធ្វើឲ្យកីឡាករក្នុងស្រុក និងក្រៅស្រុកត្រូវបានចុះចាញ់ជាបន្តបន្ទាប់។
ក្រុមអ្នកតាមដានកីឡាប្រដាល់និយាយថា កីឡាករ ឡុង សំណាង មួយរយៈចុងក្រោយនេះកំពុងក្តោបក្តាប់សំណាងឈ្នះម្តងហើយម្តងទៀត ស្ទើរតែគ្រប់ការប្រកួតតែម្តង ខណៈដែលសំណាងដែលកីឡាកររូបនេះទទួលបាននោះ គឺមិនមែនបានដោយភាពចៃដន្យនោះទេ ប៉ុន្តែគឺបានមកពីសមត្ថភាពពិតៗតែម្តង។ គូប្រកួតទាំងជើងចាស់ និងជើងថ្មី សុទ្ធតែទទួលស្គាល់ថាឡុង សំណាង ពិតជាពិបាកផ្តួល និងកំពុងធ្វើឱ្យពួកគេក្លាយជាអ្នកចាញ់ជាបន្តបន្ទាប់ ក្នុងការប្រកួតមិត្តភាពជាតិនិងអន្តរជាតិ។ ក្នុងការជួបប្រកួតជាមួយកីឡាករជើងខ្លាំងថៃ ហ្វ៊ុនលូង ប៉េឡេបូរីរាំ ក្នុងប្រភេទទម្ងន់៦២គ.ក្រនេះក៍ត្រូវបានអ្នកវិភាគប្រដាល់អះអាងថា ឡុង សំណាង ប្រាកដជាឈ្នះទៀតជាក់ជាមិនខាន ព្រោះគេកំពុងតែឡើងកូដខ្លាំង ហើយណាមួយក្នុងទឹកដីខ្លួនឯងទៀតផង។ ចាំមើលឡុង សំណាង អាចយកឈ្នះលើហ្វ៊ុនលូង ប៉េឡេបូរីរាំ បានដែរឫយ៉ាងណា?៕
Source: Kampuchea Thmey Daily
0 Comments